ការិយាល័យឥណទានជាតិថៃបានព្រមានថា ពលរដ្ឋដែលកើតពីឆ្នាំ១៩៨១ ដល់ឆ្នាំ ១៩៩៦ បានជំពាក់បំណុលយ៉ាងច្រើន។ អ្នកសេដ្ឋកិច្ចបានលើកឡើងថា នៅក្នុងស្ថានភាពដែលសេដ្ឋកិច្ចកំពុងតែស្ថិតទ្រឹងបែបនេះ ធនាគារនានានៅក្នុងប្រទេសត្រូវតែយកចិត្តទុកដាក់ជាពិសេស។ សិ្ថតិដែលដកស្រង់ដោយសារព័ត៌មានឌឹណេសិនបានឲ្យដឹងថា បំណុលដែលបន្សល់ទុកពីសេវាកម្មឥណទានទិញរថយន្តនិងម៉ូតូបង់រំលោះនៅពេលនេះ ឡើងដល់ទំហំជាង១២ ភាគរយ។
លោក ស៊ូរ៉ាពុល អូប៉ាសាធៀន ( Surapol Opasatien) នាយកប្រតិបត្តិនៃការិយាល័យឥណទានជាតិថៃ បានបញ្ជាក់ថា ប្រព័ន្ធការិយាល័យឥណទានបានកត់ត្រាបំណុលយានយន្តសរុបមានទំហំរហូតដល់ ២,៦ ទ្រីលានបាត ឬប្រមាណជា ៧៥ ពាន់លានដុល្លារ។
តួរលេខបានបង្ហាញថា ក្នុងត្រីមាសទី ១ នៃឆ្នាំ ២០២២ ធនាគារនៅថៃមានកិច្ចសន្យាកម្ចីរថយន្តសរុបរហូតដល់ ៣ សែន ៥ ម៉ឺន ដែលក្នុងនោះ ៥៣ ភាគរយជាបំណុលរបស់អ្នកដែលស្ថិតក្នុងវ័យពី ២៧ ទៅ ៤២ ឆ្នាំ។ ក្នុងចំណោមកិច្ចសន្យាទាំងនេះ, ចំនួន ៦៧ ភាគរយមានកម្ចីចាប់ពី ៥០ ម៉ឺនបាត ទៅ ២ លានបាត ឬពី ១ ម៉ឺន ៥ ពាន់ដុល្លារ ទៅជិត ៦ ម៉ឺនដុល្លារ។
អត្ថបទគួរអាន
ស្ថិតិបង្ហាញទៀតថា ក្រុមកូនបំណុលវ័យពី ២៧ ទៅ ៤២ ឆ្នាំ មានចំនួនគណនីច្រើនបំផុតដែលបង់ប្រាក់រំលោះកម្ចីយឺតជាង ៣០ ថ្ងៃ។ សមាមាត្រនៃគណនីដែលបង់សំណងយឺតជាង ៣០ ថ្ងៃក្នុងចំណោមកូនបំណុលទាំងនេះគឺខ្ពស់បំផុត។ ទន្ទឹមនឹងនេះដែរ ចំនួនគណនីដែលបង់សំណងយឺតជាងកាលកំណត់លើសពី ៣០ ថ្ងៃក្នុងចំណោមអ្នកមានវ័យក្មេងៗ គឺជិតស្មើនឹង ៤ សែនគណនី។ ការបង់សំណងយឺតយ៉ាវសម្រាប់ប្រាក់កម្ចីរថយន្តក្នុងចំណោមពួកគេបានកើនឡើងជាបន្តបន្ទាប់ ក្នុងចន្លោះពី ៣១ ទៅ ៦០ ថ្ងៃ។
បញ្ហាបំណុលរបស់ពលរដ្ឋថៃជាបញ្ហាដែលជះឥទ្ធិពលដល់ស្ថានភាពសេដ្ឋកិច្ចរបស់ប្រទេសនេះអស់រយៈពេលជាច្រើនទសវត្សរ៍មកហើយ ដោយមកដល់ពេលនេះការិយាល័យឥណទានជាតិថៃបានអះអាងថា ប្រហែល ២៥ ភាគរយនៃចំនួនប្រជាជនសរុបរបស់ប្រទេសមានបន្ទុកបំណុលធ្ងន់ធ្ងរ។ ការណ៍នេះជំរុញឱ្យធនាគារកណ្តាលថៃកំពុងតែរឹតបណ្តឹងបទប្បញ្ញតិ្តស្តីពីអាជីវកម្មទាក់ទងនឹងសេវាកម្មកម្ចី ជាពិសេសសេវាទិញដោយបង់រំលោះ។
អ្នកជំនាញបានអះអាងថា នេះគឺជាក្តីបារម្ភមួយដែលមានផលប៉ះពាល់ធ្ងន់ធ្ងរបំផុត ពីព្រោះបំណុលដែលថៃកំពុងតែមាននៅពេលនោះ គឺជាប្រភេទបំណុលដែលគ្មានផលិតភាព ពោលគឺបំណុលដែលមិនផ្ដល់ចំណូលមកវិញ ហើយមធ្យោបាយតែមួយគត់ដើម្បីកែលម្អបញ្ហាបំណុលគឺតាមរយៈការជំរុញកំណើនសេដ្ឋកិច្ច៕
ដោយៈ សរ សុជាតិ
