សំណង់អគារនេះ ត្រូវបាននិងកំពុងចាប់ផ្ដើមសាងសង់ឡើងដោយក្រុមហ៊ុនជប៉ុន និងអូស្ត្រាលី និងគ្រោងបញ្ចប់ការសាងសង់នៅឆ្នាំ២០២៦ខាងមុខនេះ។ នេះបើតាមការរាយការណ៍ដោយសារព័ត៌មានជប៉ុន Kyodo។
ក្រុមហ៊ុនជប៉ុន Obayashi Corp និងក្រុមហ៊ុនអូស្ត្រាលី Built Pty Ltd បាននិងកំពុងចាប់ផ្ដើមសាងសង់អគារកូនកាត់ដែលធ្វើឡើងពីឈើដែលមិនប៉ះពាល់ដល់បរិស្ថាន។ គម្រោងអគារ ដែលមានឈ្មោះថា Atlassian Central នេះ មានកម្ពស់១៨២ម៉ែត្រ មាន៣៩ជាន់ គ្រោងបញ្ចប់ការសាងសង់ជាស្ថាពរនៅឆ្នាំ២០២៦ ដែលវានឹងត្រូវគេប្រើប្រាស់សម្រាប់ជាទីតាំងការិយាល័យ និងហាងលក់ទំនិញជាច្រើនផ្សេងទៀត។ នេះបើតាមសេចក្ដីប្រកាសព័ត៌មានរបស់ក្រុមហ៊ុននេះ។
ក្រុមហ៊ុនសាងសង់អគារនេះ បានអះអាងថា ពួកគេមានគោលបំណងកាត់បន្ថយការបំភាយកាបូនឌីអុកស៊ីត អំឡុងពេលសាងសង់ឲ្យបាន៥០% ឬច្រើនជាងនេះ បើធៀបនឹងអគារសាងសង់ដែលប្រើប្រាស់បេតុង និងដែកធម្មតា ហើយថាមពលអគ្គិសនី សម្រាប់ប្រើប្រាស់នៅក្នុងអគារនេះទាំងមូល គឺនឹងប្រើប្រាស់តែថាមពលកកើតឡើងវិញតែប៉ុណ្ណោះ
អត្ថបទគួរអាន
ប្រភព័ត៌មានបានគូសបញ្ជាក់ថា ការសាងសង់អគារ Atlassian Centralនេះ ចាប់ពីជាន់ទី៧ឡើងទៅ គឺមានការសាងសង់ដោយប្រើឈើ ដែលរួមផ្សំជាមួយនឹងការចាប់ជាប់ជាមួយស៊ុមដែក និងការតុបតែងរចនាមួយចំនួនទៀត។
ការងារសាងសង់ដោយប្រើឈើនេះ មានការបញ្ចេញឧស្ម័នកាបូនតិចជាងការសាងសង់ដោយប្រើបេតុង ខណៈដែលវាក៏អាចកែច្នៃឡើងវិញសម្រាប់ការប្រើប្រាស់ផ្សេងទៀតផងដែរ។
ដោយឡែកចាប់ពីជាន់ទី៧ចុះមកក្រោម គឺត្រូវសាងសង់ដោយប្រើប្រាស់បេតុងដែក សម្រាប់ជាគ្រឹះរឹងមាំរបស់អគារនោះ។
ថ្នាក់ដឹកនាំរបស់ក្រុមហ៊ុនអូស្ត្រាលី ដែលបានសាងសង់អគារនេះបានលើកឡើងថា អគារនេះត្រូវបានរចនា និងអភិវឌ្ឍឡើង ដើម្បីជាសបញ្ជាក់ពីគំនិតសម្រាប់អនាគតនៃការសាងសង់អគារ គួរតែគិតគូរសាងសង់ឡើងតាមរបៀបថ្មីនេះ ដើម្បីកាត់បន្ថយផលប៉ះពាល់ដល់បរិស្ថានទាំងនៅក្នុងការងារសាងសង់ និងប្រតិបត្តិការ៕
