បន្ថែមពីលើការបើកភ្លើងខៀវខាងលើ មន្ត្រីការបរទេសជាន់ខ្ពស់ក្រុងវ៉ាស៊ីនតោនរូបនេះ បានបង្ហើបឲ្យដឹងដែរថា អាមេរិកកំពុងសហការលើកិច្ចព្រមព្រៀងជាមួយប៉ូឡូញ សម្រាប់ការផ្គត់ផ្គង់យន្តហោះចម្បាំងប៉ូឡូញទៅឲ្យអ៊ុយក្រែនផងដែរ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
អំឡុងដំណើរទស្សនកិច្ចក្នុងប្រទេសម៉ូលដាវី លោកប្លីងខេន បានលើកឡើងយ៉ាងដូច្នេះថា ៖ «ច្បាស់ហើយ! ពួកគេ (ណាតូ) នឹងទទួលបានភ្លើងខៀវដើម្បីផ្តល់យន្តហោះចម្បាំងទៅឲ្យអ៊ុយក្រែន ដូចដែលយើងបានផ្តល់ជំនួយសព្វាវុធ ដល់ទីក្រុងគៀវកន្លងមកដែរ»។
ប្រមុខការទូតទីក្រុងវ៉ាស៊ីនតោនរូបនេះ បានបន្តអះអាងថា៖ ឥឡូវនេះអាមេរិកកំពុងស្វែងរកលទ្ធភាពជាមួយប៉ូឡូញ ដើម្បីបញ្ជូនយន្តហោះរបស់ប៉ូឡូញឱ្យអ៊ុយក្រែន រកមើលពីរបៀបដែលយើងអាចនឹងបញ្ជូនយន្តហោះបានដោយរបៀបណា។ យ៉ាងណាក៏ដោយ លោកប្លីងខេន មិនបានបង្ហើបថា យន្តហោះចម្បាំងនឹងត្រូវបញ្ជូនទៅអ៊ុយក្រែននៅពេលណានោះទេ គ្រាន់តែគេដឹងថា អាមេរិកកំពុងធ្វើការយ៉ាងសកម្មលើរឿងនេះ។
អត្ថបទគួរអាន
បើតាមរបាយការណ៍ ដែលទីភ្នាក់ងារសារព័ត៌មានបារាំង AFP ទទួលបាន កិច្ចសហការរវាងអាមេរិក និងប៉ូឡូញ គ្រោងនឹងប្រគល់យន្តហោះចម្បាំងប្រភេទ MIG-29 ដែលប៉ូឡូញមានស្រាប់ ហើយសហរដ្ឋអាមេរិកនឹងផ្តល់យន្តហោះចម្បាំងប្រភេទ F-16 របស់ខ្លួនទៅឱ្យប៉ូឡូញទុកប្រើជំនួសវិញ។ យន្តហោះចម្បាំងប៉ូឡូញប្រភេទ MIG-29 នេះជាយន្តហោះមានបច្ចេកវិទ្យាផលិត ពីជំនាន់សហភាពសូវៀត ហើយត្រូវបានគេអភិរក្ស និងកែលម្អបន្ថែមរហូតដល់សព្វថ្ងៃ ខណៈដែលកងទ័ពអ៊ុយក្រែន ក៏មានការយល់ច្បាស់ថ្នឹកនឹងយន្តហោះប្រភេទបែបនេះស្រាប់។
គួរកត់សម្គាល់ថា ការនិយាយពីការបើកភ្លើងខៀវពីលោកប្លីងខេន ក្នុងការបញ្ជូនយន្តហោះចម្បាំងឲ្យអ៊ុយក្រែននេះ ធ្វើឡើងក្រោយពេលតែមួយថ្ងៃប៉ុណ្ណោះ បន្ទាប់ពីរដ្ឋមន្ត្រីការបរទេសអ៊ុយក្រែន លោក Dmytro Kuleba បានទទូចខ្លាំងៗ ឲ្យលោកខាងលិចបញ្ជូនយន្តហោះចម្បាំងមកជួយប្រទេសខ្លួន។
សូមជម្រាបលោកអ្នកនាងផងដែរថា ក្រោយច្បាំងតទល់នឹងរុស្ស៊ីអស់ពេលជិត២សប្តាហ៍មកនេះ តម្រូវការខ្ពស់បំផុតដែលអ៊ុយក្រែនចង់បានបច្ចុប្បន្ន គឺយន្តហោះចម្បាំង យន្តហោះប្រតិកម្មវាយប្រហារ និងប្រព័ន្ធការពារដែនអាកាស។ រដ្ឋមន្ត្រីការបរទេសអ៊ុយក្រែនធ្លាប់បានលើកឡើងថា បើរុស្ស៊ីមានប្រៀបលើអ៊ុយក្រែន លើដែនអាកាស នោះនឹងមានឈាមស្រោចលើដីកាន់តែច្រើន។ ហេតុនេះ ហើយទើបកន្លងមក អ៊ុយក្រែនបានស្នើឲ្យលោកខាងលិច ជួយដាក់ដែនអាកាសខ្លួនជាតំបន់គ្មានការហោះហើរ តែត្រូវបានបដិសេធ។
គួរកត់សម្គាល់ថា ប្រទេសរុស្ស៊ីមានកម្លាំងទ័ពអាកាសដ៏ធំមួយ និងខ្លាំងក្លា ខ្លាំងជាងអ៊ុយក្រែនឆ្ងាយណាស់ ហើយប្រសិនបើមានការដាក់បញ្ជាទ្រង់ទ្រាយណាមួយ នោះអ៊ុយក្រែននឹងត្រូវហ្មត់ខ្ទេចខ្ទីជាក់ជាមិនខានឡើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
