លោក ហ៊ឹម ពិសិដ្ឋ អនុប្រធានសមាគមស្ករត្នោតកំពង់ស្ពឺ បានបញ្ជាក់ប្រាប់សារព័ត៌មានឌីជីថលខេមបូណូមីសថា ការផលិតស្ករត្នោតរបស់សមាគមនាឆ្នាំនេះ អាចជួបបញ្ហាប្រឈមមួយចំនួន ដូចជា បញ្ហាអាកាសធាតុ គួបផ្សំនឹងការថយចុះនៃចំនួនអ្នកផលិតស្ករត្នោតជាដើម។ បើតាមលោក ហ៊ឹម ពិសិដ្ឋ នាឆ្នាំនេះ ការផលិតស្ករត្នោតនៅខេត្តកំពង់ស្ពឺ អាចសម្រេចបានក្នុងបរិមាណ ប្រហែល ៨០តោនប៉ុណ្ណោះ ខណៈតម្រូវការទីផ្សារវិញ មានរហូតដល់ចន្លោះពី១៥០តោន ទៅ២០០តោន។ ក៏ប៉ុន្តែ បើទោះជា តម្រូវការកើនឡើងក៏ពិតមែន ប៉ុន្ដែ តម្លៃស្ករត្នោតកំពង់ស្ពឺឆ្នាំនេះ គឺមិនមានការប្រែប្រួលគួរឲ្យកត់សម្គាល់នោះទេ បើធៀបនឹងឆ្នាំមុន ហើយទីផ្សារនាំចេញទៅក្រៅប្រទេស ក៏មិនមានការប្រែប្រួលផងដែរ។ ក្នុងនោះ តម្លៃស្ករត្នោតកំពង់ស្ពឺ នាឆ្នាំនេះ អាចលក់បានចន្លោះចាប់ពី ៥ពាន់រៀល ទៅ ៧ពាន់រៀល ក្នុងមួយគីឡូក្រាម តាមប្រភេទស្ករនីមួយៗ។
បើតាមការគូសបញ្ជាក់ពីអនុប្រធានសមាគមស្ករត្នោតកំពង់ស្ពឺ បញ្ហាអាកាសធាតុ គឺជាឧបសគ្គចម្បងក្នុងការផលិតស្ករត្នោតនាឆ្នាំនេះ ខណៈអ្នកប្រកបរបរឡើងត្នោតមួយចំនួនក៏បានបោះបង់ខ្លះៗដែរ ក្នុងចំណោមសមាជិក បច្ចុប្បន្ន មានចំនួន ១៥៨គ្រួសារ ដែលកត្តានេះអាចធ្វើឲ្យការផលិតស្ករត្នោតឆ្នាំនេះ ជួបបញ្ហាខ្វះខាត ដើម្បីផ្គត់ផ្គង់ទីផ្សារ។ ស្របពេលនឹងបង្ហាញពីការព្រួយបារម្ភចំពោះការផលិតស្ករត្នោត ក្នុងឆ្នាំនេះ លោក ហ៊ឹម ពិសិដ្ឋ ក៏បានបង្ហាញពីភាពវិជ្ជមានមួយចំនួនដែរ ចំពោះខ្សែចង្វាក់ផលិតស្ករត្នោត របស់កសិករខ្មែរ ដោយលោកបានអះអាងថា បច្ចុប្បន្ន កំពុងមានក្រុមហ៊ុនអន្តរជាតិ មួយចំនួនបានចាប់អារម្មណ៍ ក្នុងការបញ្ជាទិញស្ករត្នោតកំពង់ស្ពឺ ផងដែរ។ កត្តានេះ បានធ្វើឲ្យអនុប្រធាសមាគមរូបនេះ មានក្ដីរំពឹងយ៉ាងមុតមាំថា តម្លៃស្ករត្នោត នៅឆ្នាំក្រោយនឹងកាន់តែប្រសើរឡើងថែមទៀត។
បើតាមសមាគមស្ករត្នោតកំពង់ស្ពឺ បច្ចុប្បន្ន មានក្រុមហ៊ុនប្រមាណ ១០ក្រុមហ៊ុន ដែលបានប្រមូលទិញស្ករត្នោតកំពង់ស្ពឺ ដើម្បីនាំចេញទៅកាន់ទីផ្សារអន្តរជាតិ។ ខណៈទីផ្សារសំខាន់ៗ សម្រាប់នាំចេញស្ករត្នោតកំពង់ស្ពឺ មានដូចជា សហគមន៍អឺរ៉ុប,កូរ៉េ,តៃវ៉ាន់,ជប៉ុន,ចិន,ម៉ាឡេស៊ី,វៀតណាម និងថៃ ជាដើម៕
