ផលប៉ះពាល់នេះ ក៏នឹងធ្វើឲ្យសេដ្ឋកិច្ចថៃអាចនឹងមានកំណើនទាបជាងអ្វីដែលបានគ្រោងទុកផងដែរ ពោលគឺនៅឆ្នាំ២០២២នេះ កំណើនផលិតផលក្នុងស្រុកសរុបរបស់ថៃត្រូវបានព្យាករថានឹងមាន មកត្រឹម ២% ទៅ ៣%ប៉ុណ្ណោះ ក្នុងករណីដែលសង្គ្រាមអូសបន្លាយរយៈពេលពេញ១ឆ្នាំ។ នេះបើយោងតាមការសិក្សាថ្មីចុងក្រោយមួយរបស់សកលវិទ្យាល័យសភាពាណិជ្ជកម្មថៃ ។
លោក Thanavath Phonvichai ប្រធានសាកលវិទ្យាល័យ សភាពាណិជ្ជកម្មថៃ (UTCC) បាននិយាយថា សេដ្ឋកិច្ចថៃទំនងជានឹងកើនឡើងក្នុងអត្រា ២% ទៅ ៣% ប៉ុណ្ណោះ នៅក្នុងឆ្នាំ២០២២នេះ ជាមួយនឹងអតិផរណានឹងមាន ៥% ប្រសិនបើសង្គ្រាមរុស្ស៊ី និងអ៊ុយក្រែនត្រូវបានអូសបន្លាយពេញមួយឆ្នាំនេះ។ ស្ថិតនៅក្នុងសេណារីយ៉ូនេះ នឹងធ្វើឲ្យប្រទេសថៃ សេដ្ឋកិច្ចថៃ មានការថយចុះ បញ្ហាអតិផរណាមានការកើនឡើង និងអត្រាអ្នកគ្មានការងារធ្វើនឹងកើនខ្ពស់ផងដែរ។
លោក Phonvichai បានបញ្ជាក់ដែរថា ផលប៉ះពាល់ ដែលបានប៉ាន់ប្រមាណជាង៧ពាន់លានដុល្លារ ដែលអាចបាត់បង់នៅក្នុងសេដ្ឋកិច្ចថៃនេះ គឺគ្រាន់តែជាលទ្ធផលនៃជម្លោះរុស្ស៊ី-អ៊ុយក្រែនប៉ុណ្ណោះ ដោយមិនទាន់រាប់បញ្ចូលការផ្ទុះឡើងផ្សេងទៀត ដូចជាការរីករាលដាលយ៉ាងឆាប់រហ័សនៃ មេរោគបំប្លែងថ្មី អូមីក្រុង នោះទេ។
ប្រធានសាកលវិទ្យាល័យសភាពាណិជ្ជកម្មថៃរូបនេះ បានបញ្ជាក់ទៀតថា ផលប៉ះពាល់នៃជម្លោះរុស្ស៊ី-អ៊ុយក្រែនលើសេដ្ឋកិច្ចពិភពលោកត្រូវបានគេរំពឹងថា នឹងបន្តរយៈពេល ១ ទៅ ៣ ឆ្នាំ ហើយពិបាកក្នុងការទស្សន៍ទាយពីស្ថានភាពនៅពេលខាងមុខណាស់។
អ្នកជំនាញសេដ្ឋកិច្ចរូបនេះ បានសង្កេត់ធ្ងន់ទៀតថា គ្រោះថ្នាក់នៃសេដ្ឋកិច្ចពិភពលោក និងមហាហន្ដរាយសេដ្ឋកិច្ចសម្រាប់ប្រទេសទាំងអស់ ក៏ត្រូវបានប្រមើលមើលទុកមុនផងដែរ ប្រសិនបើតម្លៃប្រេងឆៅពិភពលោកកើនឡើងដល់ ២០០ ទៅ ៣០០ ដុល្លារក្នុងមួយធុងបារ៉ែលមែននោះ។ បើដូច្នេះមែន នោះសេដ្ឋកិច្ចថៃ ត្រូវបានរំពឹងថា នឹងត្រូវដាំក្បាលចុះដល់កំណើនដក នៅឆ្នាំ២០២២នេះ។
អត្ថបទគួរអាន
អ្នកជំនាញបញ្ជាក់ថា រាល់ការកើនឡើងតម្លៃប្រេង ១ ដុល្លារក្នុងមួយបារ៉ែល នឹងធ្វើឲ្យធ្វើឱ្យផលិតផលក្នុងស្រុកសរុបរបស់ថៃធ្លាក់ចុះពី ០,៣ ទៅ ០,៤ ពិន្ទុភាគរយ។
ទោះបីជាយ៉ាងណាក្តី លោក Sanan Angubolkul ប្រធានសភាពាណិជ្ជកម្មថៃបានមានប្រសាសន៍ថា វិស័យធុរកិច្ចបានបន្តឃ្លាំមើលយ៉ាងដិតដល់ចំពោះជម្លោះរុស្ស៊ី និងអ៊ុយក្រែន ដែលឥឡូវនេះ ស្ថានភាពត្រូវបានគេរំពឹងថានឹងបន្តអូសបន្លាយ ហើយទំនងជាមិនបញ្ចប់ក្នុងពេលឆាប់ៗនេះទេ។ លោកបាននិយាយថា ការកើនឡើងយ៉ាងខ្លាំងនៃតម្លៃប្រេងពិភពលោក ដោយសារជម្លោះរុស្ស៊ី-អ៊ុយក្រែន អាចធ្វើឱ្យចក្ខុវិស័យកំណើនសេដ្ឋកិច្ចរបស់ប្រទេសថៃចុះខ្សោយ ដូច្នេះរាជរដ្ឋាភិបាលចាំបាច់ត្រូវរៀបចំវិធានការបន្ថែម ដើម្បីកាត់បន្ថយពន្ធគយលើប្រេងម៉ាស៊ូត និង ប្រេង ដែលប្រើប្រាស់សម្រាប់ផលិតអគ្គិសនី (Bunker oil)៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
