លោកស្រី រ៉ូណា ស្មីត បាននិយាយនៅក្នុងសេចក្តីថ្លែងការណ៍ ចុះថ្ងៃពុធ ទី២៥ ខែកញ្ញា ថា ៖ «ដល់ពេលត្រូវកំណត់វិធីសាស្រ្តឡើងវិញលើបញ្ហាសិទ្ធិមនុស្សនិងសេរីភាពនៅកម្ពុជា និងធានាថា សិទ្ធិនិងសេរីភាពទាំងអស់ ដែលទទួលយកដោយស្ម័គ្រចិត្តដោយរដ្ឋាភិបាល ត្រូវបានមនុស្សគ្រប់គ្នានៅក្នុងប្រទេសពេញចិត្តទាំងអស់គ្នា។»
លោកស្រី រ៉ូណា ស្មីត បាននិយាយបន្តថា «តាមនិយមន័យ សិទ្ធិមនុស្ស គឺអំពីមនុស្ស មិនមែនអំពីនយោបាយទេ។»
លោកស្រី រ៉ូណា ស្មីត បាននិយាយថា សំឡេងឆ្នោតចំនួន ៤២ភាគរយនៃចំនួនប្រជាជនដែលបានបោះឆ្នោតឲ្យគណបក្សសង្គ្រោះជាតិនៅថ្នាក់ឃុំ សង្កាត់ នៅតែត្រូវបានបដិសេធចោល ហើយមិនទាន់ត្រូវបានដោះស្រាយនៅឡើយទេ។
អត្ថបទទាក់ទង
អ្នករាយការណ៍ពិសេសេឯករាជ្យរូបនេះ ក៏បានអំពាវនាវជាថ្មីម្តងទៀត ឲ្យដោះលែងលោក កឹម សុខា ពីការឃុំខ្លួនបណ្តោះអាសន្ន និងការបញ្ចប់ការស៊ើបអង្កេត ដើម្បីធានាសិទ្ធិក្នុងការទទួលបានការជំនុំជម្រះដោយយុត្តិធម៌ក្នុងរយៈពេលសមស្រប។
លោកស្រីក៏បានអំពាវនាវដល់គ្រប់ភាគីនយោបាយ ឲ្យផ្តោតលើការជជែកវែកញែកប្រកបដោយការស្ថាបនា ជាជាងវាយប្រហារលើបុគ្គល ដើម្បីទទួលបានសន្តិភាពនិងការអភិវឌ្ឍប្រកបដោយចីរភាព។
លោក សុខ ឥសាន អ្នកនាំពាក្យគណបក្សកាន់អំណាច បាននិយាយថា លោកស្រី រ៉ូណា ស្មីត ត្រូវយកប្រជាជនជាធំ ព្រោះថា ប្រជាជនកម្ពុជាជាង ៨៣% បានសម្រេចឆន្ទៈរបស់ខ្លួន ក្នុងការបោះឆ្នោតរួចហើយ។
លោក សុខ ឥសាន បានចោទសួរដូច្នេះថា «ហេតុម៉េចបានជាលោកស្រីមិនគោពសិទ្ធិរបស់ប្រជាជនកម្ពុជា?»
លោក សុខ ឥសាន បានបន្តថា ការចាប់ខ្លួន កឹម សុខា ទាំងកណ្តាលអធ្រាត្រ ព្រោះជាបទល្មើសព្រហ្មទណ្ឌជាក់ស្តែង ដែលអភ័យឯកសិទ្ធិមិនអាចការពារបាន និងដើម្បីកុំឲ្យរត់ចូលទូតបរទេសទាន់។
លោក សុខ ឥសាន បាននិយាយដូច្នេះថា ៖ «រាជរដ្ឋាភិបាលកម្ពុជា មិនបានចោទសហរដ្ឋអាមេរិក អារឿង កឹម សុខា ទេ គឺ កឹម សុខា ខ្លួនឯងផ្ទាល់ បាននិយាយយ៉ាងហំហែងថា រដ្ឋាភិបាលអាមេរិកជាអ្នកបង្គាប់បញ្ជាខ្លួនឲ្យធ្វើតាម»៕
