ទោះបីជាមានការពុះដីទ្បូត៍លក់យ៉ាងគគ្រឹកគគ្រេងដែលជារូបភាពមួយឃើញថា វាល្អក៏ពិតមែន ប្រសិនបើម្ចាស់គម្រោងពុះដីឡូត៍ទាំងអស់នោះគោរពតាមបទដ្ឋាននគរូបនីយកម្មត្រឹមត្រូវ បានន័យថា រាល់គម្រោងនៃការពុះដីឡូត៍ ម្ចាស់គម្រោងត្រូវរក្សាចំណីផ្លូវ យ៉ាងតិចទទឹងផ្លូវឲ្យបាន ៨ម៉ែត្រ មានប្រព័ន្ធលូត្រឹមត្រូវ។
ប៉ុន្តែ បើសិនជាមិនបានគោរពទៅតាមបទដ្ឋានទាំងអស់នេះទេ នោះវានឹងធ្វើឲ្យការកកស្ទះចរាចរណ៍ ស្ទះលូ និងបង្កផលប៉ះពាល់ផ្សេងៗ ចំពោះការអភិវឌ្ឍរាជធានីភំ្នពេញនៅពេលក្រោយ។
ដឹងហើយថា ការពុះបំបែកប្លង់ដីជាឡូត៍តូចៗដើម្បីលក់បន្តនេះ គឺជាផ្នែកមួយក្នុងការកៀងគរប្រជាជនឲ្យទៅរស់នៅតំបន់ជាយក្រុងកាន់តែច្រើន ខណៈដែលនៅទីក្រុងកាន់តែចង្អៀតទៅៗ និងតម្លៃដីធ្លីទៀតសោត ក៏ខ្ពស់ហួសពីលទ្ធភាពសម្រាប់អ្នកដែលមានចំណូលទាបផងដែរ។
បើផ្អែកតាមអ្នកជំនាញអចលនទ្រព្យកម្ពុជា លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ KFA ការពុះដីទ្បូត៍លក់បានផ្តល់ប្រយោជន៍ដល់អ្នកដែលមានចំណូលទាបដែលត្រូវការសាងសង់លំនៅដ្ឋានស្នាក់នៅ។
លោកឧកញ៉ា នួន រិទ្ធី ប្រធានក្រុមហ៊ុនអចលនទ្រព្យ KFA
លោកឧកញ៉ា នួន រិទ្ធី បានបញ្ជាក់ថា វាគឺជារឿងប្រសើរហើយបើសិនជាម្ចាស់គម្រោងគោរពទៅតាមបទដ្ឋានច្បាស់លាស់ មានន័យថា ម្ចាស់គម្រោងត្រូវរក្សាចំណីផ្លូវយ៉ាងតិចទទឹងផ្លូវឲ្យបាន៨ម៉ែត្រ រៀបចំប្រព័ន្ធលូឲ្យបានត្រឹមត្រូវ។ ប៉ុន្តែ មិនដូច្នេះទេ វានឹងធ្វើឲ្យប៉ះពាល់ដល់ដំណើរការអភិវឌ្ឍន៍រាជធានីភ្នំពេញដែរ។
លោកឧកញ៉ា នួន រិទ្ធី បញ្ជាក់ថា ៖ «អត្ថប្រយោជន៍នៃគម្រោងពុះដីឡូត៍លក់ គឺផ្តល់លទ្ធភាពទៅឲ្យពលរដ្ឋធ្វើការវិនិយោគ ឬធ្វើការអភិវឌ្ឍជាលំនៅដ្ឋានស្នាក់នៅ ពិសេសអ្នកដែលមានចំណូលទាបតែម្តង។ រីឯបញ្ហាមួយចំនួនដែលធ្វើឲ្យរាំងស្ទះដល់ដំណើរការអភិវឌ្ឍន៍វិញគឺដោយសារតែមានគម្រោងមួយចំនួនមិនស្ថិតនៅក្នុងប្លង់គោលនៃគម្រោងអភិវឌ្ឍន៍របស់រដ្ឋាភិបាល ដែលត្រូវបានកំណត់ថា ការកសាងលំនៅដ្ឋានមួយ ភូមិមួយ ត្រូវតែមានផ្លូវ ត្រូវតែមានប្រព័ន្ធ ទឹក ភ្លើង និងប្រព័ន្ធលូបណ្តោះទឹកស្អុយជាដើម។ អ្នកអភិវឌ្ឍដីឡូត៍ចាំបាច់ត្រូវតែមានជំនាញវិជ្ជាជីវៈសម្រាប់ការអភិវឌ្ឍនេះ»។
ជាមួយគ្នានេះដែរ លោក សុត វីរៈ ប្រធានផ្នែកយុទ្ធសាស្រ្តនៃក្រុមអចលនទ្រព្យ ស៊ីភីអិល (CPL) បានឲ្យដឹងថា ការសម្រេចទិញលំនៅដ្ឋាន ឬដីធ្លីសម្រាប់សាងសង់លំនៅដ្ឋាន ជាចាំបាច់ត្រូវមើលពីស្ថានភាពរស់នៅនៃពលរដ្ឋ និងប្រព័ន្ធហេដ្ឋារចនាសម្ព័ន្ធ គោរពតាមប្លង់មេនៃផែនការអភិវឌ្ឍន៍ក្រុងរបស់រាជរដ្ឋាភិបាលបានល្អ នោះតម្លៃអចលនទ្រព្យអាចនឹងកើនឡើងបន្ទាប់ពីទិញរួច។
វិស័យដីធ្លី និងអចលនទ្រព្យនៅកម្ពុជា រីកលូតលាស់ខ្លាំងប៉ុន្មានឆ្នាំចុងក្រោយនេះ។
លោក សុត វីរៈ បានគូសបញ្ជាក់ថា៖ «បើពលរដ្ឋទិញផ្ទះ ឬទិញដីដើម្បីអភិវឌ្ឍលំនៅដ្ឋានស្នាក់នៅ ខុសពីគម្រោងអភិវឌ្ឍន៍បុរី តែចំទីតាំងមានហេដ្ឋារចនាសម្ព័ន្ធល្អ តម្លៃដីនៅឆ្នាំបន្ទាប់ប្រាកដណាស់ នឹងមានតម្លៃទីផ្សារល្អដូចគ្នានឹងគម្រោងអភិវឌ្ឍន៍បុរីលំនៅដ្ឋានធំៗដែរ ប៉ុន្តែបើពលរដ្ឋទិញដីធ្លីប៉ះចំគម្រោងពុះដីឡូត៍ដែលមិនមានហេដ្ឋារចនាសម្ព័ន្ធល្អ ខ្វះទីធ្លាសាធារណៈ អាចនឹងប្រឈមផលប៉ះពាល់ ហើយតម្លៃដីធ្លីក៏នឹងមិនអាចឡើងថ្លៃខ្ពស់ឡើយ»។
តាមទីផ្សារប្រកាសលក់ដីឡូត៍បច្ចុប្បន្ន មានតម្លៃខុសៗគ្នាទៅតំបន់ និងទំហំដីជាក់ស្តែង។ ដីឡូត៍នៅតំបន់ខ្លះមានតម្លៃជាមធ្យម ៩ពាន់ដុល្លារទៅ១ម៉ឺន៥ពាន់ដុល្លារក្នុងមួយឡូត៍ និងតំបន់ខ្លះទៀតមានតម្លៃជាមធ្យម ១ម៉ឺន២ពាន់ដុល្លារ ទៅ ២ម៉ឺនដុល្លារក្នុងមួយឡូត៍។
ជាការចូលរួមចំណែកក្នុងការពង្រឹងការអនុវត្តផែនការកំណត់ចំណីផ្លូវនៅតាមតំបន់គម្រោងពុះដីឡូត៍លក់នេះដែរ លោក វីរៈ ក៏បានស្នើទៅដល់រដ្ឋាភិបាលមេត្តាពិនិត្យទៅលើគម្រោងប្លង់មេ នូវរាល់គម្រោងពុះដីឡូត៍ជាមុន មុននឹងអនុញ្ញាតឲ្យមានការពុះដីឡូត៍ចេញលក់ជាសាធារណៈ។
យោងតាមសេចក្តីប្រកាសរបស់សាលាខណ្ឌ រាល់គម្រោងនៃការពុះដីឡូត៍ ម្ចាស់គម្រោងត្រូវរក្សាចំណីផ្លូវ យ៉ាងតិចទទឹងផ្លូវឲ្យបាន ៨ម៉ែត្រ។
ការកំណត់ទំហំផ្លូវនេះគឺដើម្បីបញ្ជៀសការកកស្ទះចរាចរណ៍ និងដើម្បីបង្ការផលប៉ះពាល់ផ្សេងៗនៃការអភិវឌ្ឍក្រុងនៅពេលក្រោយ។
គួរបញ្ជាក់ថា កាលពី២ឆ្នាំមុនសកម្មភាពពុះដីឡូត៍ឃើញមានតែនៅតំបន់ភ្នំពេញថ្មី ចោមចៅ ចម្ការដូង និងទួលសង្កែ ប៉ុន្តែ ឥឡូវសកម្មភាពនេះបានបន្តរីករាលដាលខ្លាំងឡើងៗនៅតំបន់ បឹងជើងឯក តំបន់ទំនប់កប់ស្រូវ និងតាមបណ្តោយផ្លូវជាតិលេខ២ ផ្លូវជាតិលេខ៣ និងផ្លូវជាតិលេខ៤ គឺកំពុងតែធ្វើការផ្សព្វផ្សាយយ៉ាងខ្លាំង និងក៏មានតម្រូវការទិញច្រើនទៀតផង៕
