ក្រុមហ៊ុនរុករកប្រេងនិងឧស្ម័នសឹង្ហបុរីដែលមានឈ្មោះថា KrisEnergy ជាអ្នកទទួលសិទ្ធិរុករកនិងបូមប្រេងនៅកម្ពុជាកំពុងប្រឈមនឹងវិបត្តិស្ដារបំណុលរបស់ខ្លួន នៅចំពេលដែលការបូមប្រេងនៅកម្ពុជាកំពុងបង្ហាញពីទិន្នផលទាបជាងអ្វីដែលក្រុមហ៊ុនបានព្យាករទុកពីមុនមក។ ជុំវិញនឹងបញ្ហានេះថ្នាក់ដឹកនាំអគ្គនាយកដ្ឋានប្រេងកាត នៃក្រសួងរ៉ែ និងថាមពលបានអាងថា ខាងអាជ្ញាធរកម្ពុជាកំពុងតាមដានយ៉ាងយកចិត្តទុកដាក់លើបញ្ហាដោះស្រាយបំណុលរបស់ក្រុមហ៊ុន KrisEnergy បន្ទាប់ពីក្រុមហ៊ុននេះបរាជ័យក្នុងការរៀបចំរចនាសម្ព័ន្ធបំណុលរបស់ខ្លួនកាលពីពេលថ្មីៗ។ ទោះបីយ៉ាងនេះក្តី ការបូមប្រេងនៅកម្ពុជារបស់ក្រុមហ៊ុនសិង្ហបុរីមួយនេះ កំពុងនៅបន្ដដំណើរការជាធម្មតា ពោលគឺមិនទាន់មានការផ្អាកអ្វីនោះទេគិតមកទល់ពេលនេះ។
អត្ថបទទាក់ទង
ឯកឧត្តម ជៀប សួរ អគ្គនាយកនៃអគ្គនាយកដ្ឋានប្រេងកាតកម្ពុជានៃក្រសួងរ៉ែ និងថាមពលបានអះអាងថា ក្រុមហ៊ុន Kris Energy ដែលជាដៃគូរុករក និងបូមប្រេងរបស់កម្ពុជា បានជូនដំណឹងមកកម្ពុជារួចហើយពាក់ព័ន្ធការបរាជ័យក្នុងការរៀបចំរចនាសម្ព័ន្ធបំណុលឡើងវិញ ជាមួយធនាគារ DBS របស់សិង្ហបុរី។ ការបរាជ័យនេះ គឺដោយសារតែក្រុមហ៊ុននេះ មិនអាចបំពេញតាមលក្ខខណ្ឌដូចបានចែងពាក់ព័ន្ធសមត្ថភាពក្នុងការទាញយកប្រេងនៅកម្ពុជា។
ឯកឧត្តមបានគូសបញ្ជាក់ថា កម្ពុជាកំពុងតាមដានយ៉ាងយកចិត្តទុកដាក់ពាក់ព័ន្ធនឹងបញ្ហារបស់ក្រុមហ៊ុន KrisEnergy ខណៈបច្ចុប្បន្ន ក្រុមហ៊ុនរុករក និងបូមប្រេងរបស់សិង្ហបុរីមួយនេះកំពុងស្វែងរកជម្រើសផ្សេងក្នុងការកៀរគរប្រភពទុន ដើម្បីបន្តដំណើរការបូមប្រេងនៅកម្ពុជា។
ឯកឧត្តម ជៀប សួរ បានបញ្ជាក់កន្លងមកថា ក្នុងករណីក្រុមហ៊ុន Kris Energy មិនអាចបំពេញលក្ខខណ្ឌតាមកិច្ចព្រមព្រៀងកាលពីពេលកន្លងទៅទេ នោះកិច្ចព្រមព្រៀងរវាងភាគីទាំងពីរអាចនឹងត្រូវបញ្ចប់នៅពាក់កណ្តាលទី។ ប៉ុន្តែ ឯកឧត្តម បានបញ្ជាក់ថា កម្ពុជាមិនចង់ឃើញហេតុការណ៍នេះកើតឡើងនោះទេ។
កាលពីថ្ងៃទី២០ ខែមេសា កន្លងទៅថ្មីៗ សារព័ត៌មាន Business Times របស់សិង្ហបុរីបានចុះផ្សាយថា ក្រុមហ៊ុន Kris Energy មិនអាចរៀបចំរចនាសម្ព័ន្ធបំណុលជាមួយធនាគារ DBS របស់សិង្ហបុរីឡើងវិញបាននោះទេ ដោយសារក្រុមហ៊ុននេះ មិនអាចបំពេញតាមលក្ខខណ្ឌ ដែលបានចែងពាក់ព័ន្ធសមត្ថភាពទាញយកប្រេងនៅកម្ពុជា។ ពោលគឺក្រោយការទាញយកប្រេងនៅកម្ពុជារបស់ក្រុមហ៊ុននេះ ទទួលបានលទ្ធផលខុសគ្នាឆ្ងាយពីការរំពឹងទុក៕
ចុច Like Facebook Page របស់ខេមបូណូមីសនិងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
