មាជិកសភាមួយចំនួនដូចជាលោក ម៉ៃ ហ្គាឡាហ្គឺ (Mike Gallagher) មកពីគណបក្ស សាធារណរដ្ឋ លោក រ៉ាចា គ្រីស្នាមូធី (Raja Krishnamoorthi) មកពីគណបក្សប្រជាធិបតេយ្យ និងតំណាងរាស្ត្ររដ្ឋមីឈីហ្គេន គឺលោកស្រី ហាលី ស្ទេវិន (Haley Stevens) និងលោក ចន មូឡេណា (John Moolenaar) បានផ្ញើលិខិតមួយទៅកាន់លោកស្រី ខាធឺរីន ថៃ (Katherine Tai) ដោយបានជំរុញឱ្យតំណាងពាណិជ្ជកម្មសហរដ្ឋអាម៉េរិក ដំឡើងពន្ធ ២៥%សម្រាប់យានយន្តដែលផលិតដោយក្រុមហ៊ុនចិននាពេលបច្ចុប្បន្ន។
សមាជិកសភាទាំងនេះបានសរសេរនៅក្នុងលិខិតមួយថា វាចាំបាច់ណាស់ដែលអាម៉េរិក មិនត្រឹមតែបន្តយកពន្ធទៅលើរថយន្តរបស់ចិនប៉ុណ្ណោះទេ ប៉ុន្តែត្រូវតែបង្កើនយកពន្ធថែមទៀត ដើម្បីទប់ស្កាត់ការកើនឡើងនូវការនាំចូលយានយន្តរបស់ចិនផងដែរ។ បច្ចុប្បន្នរដ្ឋបាលលោក បៃដិន បានយកពន្ធលើរថយន្តរបស់ចិន ក្នុងអត្រា ២៥% ដោយបានបន្តពីចំណាត់ការរបស់អតីតប្រធានាធិបតីលោក ដូណាល់ ត្រាំ។
សារលិខិតនោះបាននិយាយថា ក្រសួងហិរញ្ញវត្ថុអាម៉េរិក គួរតែពិចារណាចាប់ផ្តើមការស៊ើបអង្កេតថ្មី លើយានជំនិះរបស់ចិន និងគ្រោះថ្នាក់ដែលបង្កដល់ឧស្សាហកម្មរថយន្តអាម៉េរិក និងកម្មករអាម៉េរិក ព្រមទាំងរកវិធានការ ដើម្បីទប់ទល់នឹងយុទ្ធសាស្រ្តឧស្សាហកម្មរបស់ចិន ក្នុងការគ្របដណ្តប់ទីផ្សាររថយន្តពិភពលោក។
អត្ថបទគួរអាន
លិខិតនេះក៏បានសរសេរដែរថា អាម៉េរិកក៏ត្រូវតែត្រៀមខ្លួនដោះស្រាយរលកថ្មីនៃរថយន្តរបស់ចិន ដែលនឹងត្រូវនាំចេញពីប្រទេសដៃគូពាណិជ្ជកម្មផ្សេងទៀតរបស់អាម៉េរិកដូចជា ប្រទេសម៉ិកស៊ិកជាដើម ខណៈដែលក្រុមហ៊ុនរថយន្តរបស់ចិន សម្លឹងរកការបង្កើតប្រតិបត្តិការជាយុទ្ធសាស្ត្រនៅខាងក្រៅប្រទេសចិន ដើម្បីទាញយកអត្ថប្រយោជន៍ពីការចូលទៅដល់ទីផ្សារអាម៉េរិកជាអាទិភាពតាមរយៈកិច្ចព្រមព្រៀងពាណិជ្ជកម្មសេរីរបស់អាម៉េរិក។
សូមបញ្ចាក់ថា ការលើកឡើងពីបំណងរបស់សមាជិកសភា ដែលចង់ឲ្យរដ្ឋបាលលោកចូ បៃឌិន យកពន្ធបន្ថែមលើយានយន្ដផលិតដោយក្រុមហ៊ុនចិននេះ គឺធ្វើឡើងនៅចំពេលដែល រដ្ឋមន្ត្រីក្រសួងហិរញ្ញវត្ថុអាម៉េរិក លោកស្រី ជេណិត យេឡិន មានជំនួបជាមួយឧបនាយករដ្ឋមន្ត្រីចិន លោក ហេ លីហ្វឹង (He Lifeng) ដើម្បីពិភាក្សាពីទំនាក់ទំនងទ្វេភាគីរវាងប្រទេសទាំង២ និងបញ្ហាពិភពលោកផ្សេងទៀត ក្នុងរយៈពេលពីរថ្ងៃ ចាប់ពីថ្ងៃ០៩ ដល់ថ្ងៃទី ១០ខែវិច្ឆិកានេះ។
កិច្ចពិភាក្សារបស់លោកស្រី យេឡិន ជាមួយមន្ត្រីសេដ្ឋកិច្ចថ្មីរបស់ចិននេះនឹងកំណត់ពីដំណាក់កាលសម្រាប់កិច្ចប្រជុំ ដែលគេបានរំពឹងខ្ពស់ថា នឹងអាចកើតឡើងរវាងប្រធានាធិបតីអាម៉េរិក លោក បៃដិន និងប្រធានាធិបតីចិនលោក ស៊ី ជីនពីង នៅសប្តាហ៍ក្រោយនេះ នៅអំឡុងវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅទីក្រុងសាន់ហ្វ្រាន់ស៊ីស្កូ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
