តើមានកត្តាអ្វីខ្លះធ្វើឱ្យប្រាក់ដុល្លារអាម៉េរិកធ្លាក់ថ្លៃខ្លាំងបំផុតនៅ៣សប្ដាហ៍មកនេះ?

សន្ទស្សន៍ហាងឆេងអត្រាប្ដូរប្រាក់ដុល្លារអាម៉េរិក បានធ្លាក់ចុះ០,៤% កាលពីថ្ងៃពុធ ទី៣ ខែកក្កដា ដែលជាការធ្លាក់ចុះខ្លាំងបំផុតចាប់តាំងពីថ្ងៃទី១២ ខែមិថុនា មក។ ប្រាក់ដុល្លារអាម៉េរិក បានធ្លាក់ថ្លៃបើធៀបនឹងរូបិយប័ណ្ណសំខាន់ៗ នៃប្រទេសជាច្រើនរួមមានរូបិយប័ណ្ណក្រូន (Krone) របស់ន័រវែស រូបិយប័ណ្ណក្រូណា (Krona) របស់ស៊ុយអែត ហើយប្រាក់ដុល្លារអូស្រ្តាលី បានហក់ឡើងថ្លៃនាំមុខគេ។ ចំណែកឯប្រាក់យ៉េន ជប៉ុន បានហក់ឡើងថ្លៃរហូតដល់០,៤% មកនៅក្រោម១៦១យ៉េន ក្នុង១ដុល្លារអាម៉េរិក។

សញ្ញានៃការធ្លាក់ចុះសន្ទុះសេដ្ឋកិច្ចបានជំរុញឱ្យមានការរំពឹងទុកថា ធនាគារកណ្តាលអាម៉េរិកនឹងចាប់ផ្តើមបញ្ចុះអត្រាការប្រាក់នៅមុនដំណាច់ឆ្នាំ២០២៤ នេះ។ ការរំពឹងទុកនេះបានធ្វើឱ្យប្រាក់ដុល្លារអាម៉េរិកធ្លាក់ថ្លៃ ខណៈដែលធនាគារកណ្ដាលអាម៉េរិក រង់ចាំមើលវឌ្ឍនភាពបន្ថែម ដែលបង្ហាញកាន់តែច្បាស់ថា អតិផរណានៅលើទឹកដីសហរដ្ឋអាម៉េរិក កំពុងធ្លាក់ចុះជាលំដាប់ មុននឹងឈានដល់ការសម្រេចបញ្ចុះអត្រាការប្រាក់។

សូមបញ្ជាក់ថា វិស័យសេវាកម្មនៅសហរដ្ឋអាម៉េរិក បានធ្លាក់ចុះកាលពីខែមុន ដោយសារការធ្លាក់ចុះយ៉ាងខ្លាំងនូវសកម្មភាពអាជីវកម្ម និងការបញ្ជាទិញ។ របាយការណ៍មួយផ្សេងទៀតកាលពីថ្ងៃពុធ ទី៣ ខែកក្កដា បានបង្ហាញថា ទីផ្សារការងារនៅសហរដ្ឋអាម៉េរិក ក៏កំពុងធ្លាក់ចុះដែរ ដោយសារក្រុមហ៊ុននានាបានបង្អង់ល្បឿនជ្រើសរើសបុគ្គលិកក្នុងខែមិថុនា ហើយកំណើនប្រាក់ឈ្នួលក៏បានធ្លាក់ចុះ។ នេះបើយោងតាមវិទ្យាស្ថានស្រាវជ្រាវ ADP ។

សូមបញ្ជាក់ថា ពេលនេះ បណ្ដាពាណិជ្ជករកំពុងរង់ចាំអ៊ុតមើលលទ្ធផលនៃរបាយការណ៍ប្រចាំខែដែលវាស់ស្ទង់ស្ថានភាពទីផ្សារការងារនៅសហរដ្ឋអាមេរិក ដែលគ្រោងនឹងចេញផ្សាយនៅថ្ងៃសុក្រ ទី៥ ខែកក្កដា៕

ដោយ: តែម សុខុម