ក្រុមហ៊ុនបច្ចេកវិទ្យាវៀតណាម VNG ដែលមានការិយាល័យកណ្ដាលនៅក្រុងហូជីមិញ បានចេញសេចក្ដីថ្លែងការណ៍មួយផ្ញើទៅកាន់គណៈកម្មការមូលបត្រអាម៉េរិក (SEC) ថា ខ្លួនបានសម្រេចចិត្តមិនឡើង IPO ក្នុងសហរដ្ឋអាម៉េរិក នៅពេលនេះទេ ហើយមានបំណងដាក់ពាក្យស្នើសុំឡើង IPO សាជាថ្មីនៅថ្ងៃអនាគត។
ទោះជាយ៉ាងណា ក្រុមហ៊ុន VNG មិនបានទម្លាយហេតុផលដែលខ្លួនដកពាក្យស្នើសុំឡើង IPO និងពេលវេលាជាក់លាក់ណាមួយសម្រាប់ការស្នើសុំពាក្យឡើង IPO សាជាថ្មីនៅថ្ងៃអនាគតនោះឡើយ។
ប្រភពច្បាស់ការមួយបានទម្លាយឱ្យដឹងថា ក្រុមហ៊ុន VNG មិនអាចបំពេញបានតាមកាលកំណត់ជាក់លាក់មួយចំនួនសម្រាប់ការចុះបញ្ជី ដូច្នេះហើយក៏ដកខ្លួនចេញវិញ ប៉ុន្តែនឹងបន្តស្វែងរកឱកាសចុះបញ្ជីលើកក្រោយទៀត។ ប៉ុន្តែទាក់ទិនបញ្ហានេះ ក្រុមហ៊ុន VNG បដិសេធមិនឆ្លើយបំភ្លឺនោះទេ។
អត្ថបទគួរអាន
ក្រុមហ៊ុន VNG កាលពីខែកញ្ញា ឆ្នាំ២០២៣ បានពន្យារពេលផែនការឡើង IPO របស់ខ្លួននៅសហរដ្ឋអាម៉េរិក ដោយសារតែស្ថានភាពទីផ្សារប្រែប្រួលឡើងចុះប្រកបដោយហានិភ័យ។ នេះបើយោងតាមទីភ្នាក់ងារព័ត៌មាន Reuters ដកស្រង់ប្រភពច្បាស់ការ និងចុះផ្សាយនៅពេលនោះ។
ក្រុមហ៊ុនបច្ចេកវិទ្យា VNG ត្រូវបានបង្កើតឡើងក្នុងឆ្នាំ២០០៤ ហើយវាបានក្លាយក្រុមហ៊ុន Start-up ដំបូងបង្អស់របស់វៀតណាម ដែលមានតម្លៃលើសពី១ពាន់លានដុល្លារអាម៉េរិក។
អាជីវកម្មរបស់ក្រុមហ៊ុនបច្ចេកវិទ្យាមួយនេះរួមមានហ្គេមអនឡាញ ការទូទាត់ សេវាកម្ម Cloud និងកម្មវិធីផ្ញើសារដ៏ពេញនិយមបំផុតរបស់វៀតណាម ឈ្មោះថា ហ្សាឡូ (Zalo) ហើយការឡើង IPO នឹងធ្វើឱ្យក្រុមហ៊ុន VNG ក្លាយជាក្រុមហ៊ុនបច្ចេកវិទ្យាវៀតណាម ដំបូងគេបង្អស់ដែលបានចុះបញ្ជីនៅសហរដ្ឋអាម៉េរិក៕
ដោយ: តែម សុខុម
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
