សារព័ត៌មានបស្ចិមប្រទេសធំៗបានរាយការណ៍ថា ឆ្នាំនេះជាលើកទីមួយហើយដែលរង្វាស់នៃលំហូរទុនវិនិយោគបរទេសចូលក្នុងប្រទេសចិន ដែលជាទីផ្សារធំមានប្រជាជនជាង១ពាន់៤រយលាននាក់ នៅលើពិភពលោកបានប្រែទៅជាអវិជ្ជមានក្នុងរយៈពេល២៥ឆ្នាំ។
លោកស្រី អាហ្វសាណេ បេឆេឡូស (Afsaneh Beschloss) ស្ថាបនិក និងជាប្រធានប្រតិបត្តិក្រុមហ៊ុនបណ្តាក់ទុន RockCreek Group ដែលមានមូលដ្ឋាននៅទីក្រុងវ៉ាស៊ីនតោន បាននិយាយថា ស្ថានភាពបានបង្ហាញថា ក្រុមហ៊ុនបរទេសជាច្រើនកំពុងតែសម្រុកនាំគ្នាដកលុយដែលពួកគេបណ្តាក់ទុនចេញពីប្រទេសចិន ជាជាងវិនិយោគនៅក្នុងប្រជាជាតិនេះ។
លោកស្រី បានបញ្ជាក់ថា មនុស្សជាច្រើនកំពុងនាំគ្នាសម្រុកដកប្រាក់ពីប្រទេសចិន ហើយអ្នកដែលមិនទាន់បានដកក៏កំពុងតែរៀបចំនិន្នាការនៃការដក ដោយសារតែពួកគេរង់ចាំរោងចក្រនៅកន្លែងផ្សេងរបស់ពួកគេដាក់ដំណើរការសិន។
តាមរបាយការណ៍មួយដែលបានចេញដោយរដ្ឋបាលគ្រប់គ្រងអត្រាប្តូរប្រាក់បរទេសរបស់ចិន បានអះអាងថា នៅត្រីមាសទី៣ ទិន្នន័យនៃការដកប្រាក់ទុនវិនិយោគចេញពីប្រទេសចិន គឺមានតម្លៃរហូតដល់ទៅជិត១២ពាន់លានដុល្លារ។
អត្ថបទគួរអាន
ដោយឡែកក្រសួងពាណិជ្ជកម្មចិនវិញបានអះអាងថា នៅក្នុងរយៈពេល៩ខែ ដើមឆ្នាំ២០២៣ នេះ លំហូរទុនវិនិយោគចូលប្រទេសចិន បង្ហាញពីការធ្លាក់ចុះ៨,៤ភាគរយ ខណៈដែលកាលពី៨ខែ អត្រាលំហូរទុនវិនិយោគធ្លាក់ចុះតែ៥,១ភាគរយប៉ុណ្ណោះ។
ប្រភពដដែលបានអះអាងថា លំហូរវិនិយោគទុនបរទេសចូលប្រទេសចិននេះ ចាប់ផ្តើមមានទំនោរថមថយនៅពេលដែលចិន ប្រឈមមុខនឹងបញ្ហាសង្រ្គាមសេដ្ឋកិច្ច និងការប្រកួតប្រជែង ខាងភូមិសាស្រ្តនយោបាយជាមួយនឹងសហរដ្ឋអាម៉េរិក។
ក្រុមហ៊ុនវិនិយោគអាម៉េរិកមួយ ដែលមានឈ្មោះថា BlackRock បានប្រកាសថា ខ្លួននឹងបិទក្រុមហ៊ុននៅទីក្រុងសៀងហៃ ប្រទេសចិន នៅក្នុងរង្វង់ខែធ្នូ ឆ្នាំនេះ។ ដោយឡែកក្រុមហ៊ុនបណ្តាក់ទុនអាម៉េរិកមួយទៀតដែលមានឈ្មោះថា Vanguard ក៏បានប្រកាសពីការកាត់បន្ថយប្រតិបត្តិការនៅក្នុងប្រទេសចិនផងដែរ។ ក្រុមហ៊ុននេះបានអះអាងថា ខ្លួនបានចុះកិច្ចសន្យាការងារថ្មី តែជាមួយនឹងបុគ្គលិក១០នាក់ប៉ុណ្ណោះ សម្រាប់ប្រតិបត្តិការនៅក្នុងការិយាល័យសៀងហៃ។
លោក កីត ហ្វីលីប (Keith Phillips) ប្រធានប្រតិបត្តិកនៃក្រុមហ៊ុន Piedmont Lithium LLC បានអះអាងថា ក្រុមហ៊ុនមួយចំនួនក៏មានទំនោរនឹងការដកប្រាក់វិនិយោគរបស់ពួកគេចេញពី ចិនផងដែរ ប៉ុន្តែទោះបីជាយ៉ាងណាក៏ដោយ គឺនៅចាំមើលជំហរនិងប្រតិកម្មរបស់លោក ស៊ី ជីនភីង ប្រធានាធិបតីចិន ដែលគ្រោងនឹងធ្វើដំណើរទៅកិច្ចប្រជុំកំពូល APEC នៅសប្តាហ៍ក្រោយនៅសាន់ហ្រ្វាន់ស៊ីស្កូសិន។
អ្នកវិភាគផ្សេងៗទៀតក៏បានអះអាងស្រដៀងគ្នានេះផងដែរថា បញ្ហាវាអាចនឹងមានការប្រែប្រួលខ្លះប្រសិនបើលោក ស៊ី បង្ហាញនូវគោលជំហរវិជ្ជមាន និងផ្តល់ជំនឿទុកចិត្តជាថ្មីដល់អ្នកវិនិយោគបរទេសនៅក្នុងប្រទេសចិន។ ពាក់ព័ន្ធនឹងស្ថានភាពសេដ្ឋកិច្ចនេះ អាជ្ញាធរចិន កាលពីចុងខែមុនបាន អនុម័តមូលបត្របំណុលអធិបតេយ្យមានតម្លៃដល់មួយទ្រីលានយ័ន ឫប្រមាណជា ១៣៧ពាន់លានដុល្លារ ដើម្បីគាំទ្រសេដ្ឋកិច្ច៕
ដោយៈ សរ សុជាតិ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
