លោក តេដ្រូសប្រធានអង្គការសុខភាពពិភពលោក បានប្រាប់អ្នកសារព័ត៌មានអំឡុងពេលលោកកំពុងស្ថិតនៅប្រទេសហុងគ្រី ថាលោកពិតជាខកចិត្តខ្លាំងមែនទែនចំពោះនិន្នាការនៃវ៉ាក់សាំងបង្ការកូវីដ១៩ក្នុងពេលបច្ចុប្បន្ន។ ប្រធានអង្គការសុខភាពពិភពលោក បានសង្កត់ធ្ងន់ថា ស្របពេលដែលប្រទេសក្រីក្រស្វះស្វែងរកវ៉ាក់សាំងសម្រាប់ចាក់ដូសទី១ ឬទី២ មិនចង់បានផង បែរជាប្រទេសអ្នកមានសំងំនាំគ្នាសោយសុខប្រមូលវ៉ាក់សាំងទុកក្នុងចំនួនដ៏ច្រើនលើសលុប និង បើកយុទ្ធនាការចាក់ដូសទី៣ ឬ ដូសជំរុញដល់ពលរដ្ឋខ្លួនថែមទៀត។
ក្បាលម៉ាស៊ីនដឹកនាំអង្គការសុខភាពពិភពលោក WHO បានអំពាវនាវឲ្យប្រទេសដែលកំពុងចាក់វ៉ាក់សាំងដូសទី៣ ឬដូសជំរុញទាំងអស់ ផ្អាកការចាក់នេះ២ខែសិនទៅ ហើយបង្វែរវ៉ាក់សាំងទាំងនេះដោយចែករំលែកជាមួយប្រទេសដទៃដែលកំពុងត្រូវការវ៉ាក់សាំងជាបន្ទាន់សម្រាប់ដូសទី១ និង ទី២។
អត្ថបទទាក់ទង
គួរជម្រាបថា បច្ចុប្បន្នប្រទេសមួយចំនួនរួមមាន សហរដ្ឋអាមេរិក អ៊ីស្រាអែល និង ហុងគ្រី ក៏ដូចជាប្រទេសដទៃទៀតនៅតំបន់អឺរ៉ុប មជ្ឈឹមបូព៌ា និង ទ្វីបអាស៊ីផងដែរ បាននិងកំពុងផ្តល់ជូនវ៉ាក់សាំងការពារជំងឺកូវីដ១៩ដូសទី៣ ឬដូសជំរុញនេះ។
សហរដ្ឋអាមេរិកកាលពីពេលថ្មីៗនេះ ទើបបានសម្រេចដាក់ចេញផែនការចាក់វ៉ាក់សាំងដូសជំរុញទូទាំងប្រទេស ដោយនឹងចាប់ផ្តើមពីខែកញ្ញាឆ្នាំនេះតទៅ ខណៈប្រទេសហុងគ្រី កាលពីដើមខែសីហា បានក្លាយជាប្រទេសដំបូងគេនៅតំបន់អឺរ៉ុប ដែលអនុញ្ញាតឲ្យពលរដ្ឋចាប់ផ្តើមចុះឈ្មោះដើម្បីទទួលយកវ៉ាក់សាំងដូសជំរុញនេះ។ គិតមកត្រឹមថ្ងៃទី២៣សីហា មានពលរដ្ឋហុងគ្រីជិត ២០ម៉ឺននាក់ហើយ ដែលបានទទួលការចាក់វ៉ាក់សាំងដូសជំរុញ។
សូមបញ្ជាក់ថា មកទល់នឹងពេលនេះ មានវ៉ាក់សាំងបង្ការកូវីដ១៩សរុបជិត ៥ពាន់លានដូសហើយ ត្រូវបានចរាចរទៅពាសពេញពិភពលោក ប៉ុន្តែ ៧៥% នៃវ៉ាក់សាំងទាំងអស់នោះ បានធ្លាក់ដល់ដៃតែសម្រាប់ ១០ប្រទេសធំៗ ខណៈដែលការប្រើប្រាស់វ៉ាក់សាំងនៅក្នុងទ្វីបអាហ្វ្រិកមានត្រឹម ២% នៃចំនួនវ៉ាក់សាំងសរុបរបស់ពិភពលោកប៉ុណ្ណោះ។ នេះបើតាមទិន្នន័យរបស់អង្គការសុខភាពពិភពលោក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
