![ធនាគារពិភពលោក](https://cdn.cambonomist.com/media/images/thnkrpphplk.2e16d0ba.fill-960x540.jpg)
តែយ៉ាងណាសេដ្ឋវិទូជាន់ខ្ពស់ប្រចាំស្ថាប័នរូបនេះអះអាងថា សេដ្ឋកិច្ចកម្ពុជាអាចនឹងបន្តប្រឈមនឹងបញ្ហាមួយចំនួន ដែលទាមទារឱ្យកម្ពុជាបន្តបង្កើនការយកចិត្តទុកដាក់ និងកែប្រែចំណុចខ្វះខាតមួយចំនួន ដើម្បីអាចឈានទៅសម្រេចគោលដៅកំណើនសេដ្ឋកិច្ចរបស់ខ្លួន។
នាពិធីផ្សព្វផ្សាយរបាយការណ៍ស្តីពី«វិស័យនាំចេញទំនិញ និងសេវាកម្មរបស់កម្ពុជាបានជំរុញឱ្យមានសកម្មភាពសេដ្ឋកិច្ច»នៅព្រឹកថ្ងៃទី៦ ខែមិថុនា ឆ្នាំ២០២៤ ធនាគារពិភពលោកបានបង្កើនការព្យាករកំណើនសេដ្ឋកិច្ចរបស់កម្ពុជាពីកម្រិត៥,៦%ក្នុងឆ្នាំ២០២៣ ទៅ៥,៨% នៅឆ្នាំ២០២៤ ហើយអាចប្រសើរឡើងបន្ថែមទៀតដល់កម្រិត៦,១% នៅឆ្នាំ២០២៥ និង៦,៤% នៅឆ្នាំ២០២៦។ ធនាគារពិភពលោកប្រចាំកម្ពុជាបានចាត់ទុកការកសាងទ្រនាប់សារពើពន្ធឡើងវិញ និងការការពារស្ថិតរភាពហិរញ្ញវត្ថុ គឺកិច្ចការសំខាន់ដែលកម្ពុជាត្រូវធ្វើ ដើម្បីរក្សាកំណើនសេដ្ឋកិច្ចប្រកបដោយចីរភាព។
លោក លី សុដេត អ្នកសេដ្ឋកិច្ចជាន់ខ្ពស់នៃធនាគារពិភពលោកប្រចាំនៅកម្ពុជាបានគូសបញ្ជាក់ថា កត្តាដែលជំរុញឱ្យធនាគារពិភពលោកបង្កើនការព្យាករកំណើនសេដ្ឋកិច្ចរបស់កម្ពុជា គឺក្រោយស្ថាប័ននេះមើលឃើញពីភាពល្អប្រសើរឡើងវិញលើការនាំចេញវិស័យកាត់ដេរ ទំនិញធ្វើដំណើរ និងស្បែកជើង រួមទាំងការងើបឡើងវិញនៃការមកដល់របស់ភ្ញៀវទេសចរ។
កត្តាដែលធ្វើឱ្យការនាំចេញទំនិញរបស់កម្ពុជាមានភាពល្អប្រសើរ គឺដោយសារតម្រូវការប្រើប្រាស់នៅប្រទេសជាដៃគូ ជាពិសេសសហរដ្ឋអាម៉េរិក ដែលជាទីផ្សារនាំចេញទំនិញធំជាងគេរបស់កម្ពុជាមានភាពល្អប្រសើរ។ តែយ៉ាងណាសេដ្ឋកិច្ចកម្ពុជាអាចនឹងបន្តប្រឈមនឹងបញ្ហាមួយចំនួន ជាពិសេសការថមថយកំណើនសេដ្ឋកិច្ចពិភពលោក ជាពិសេសប្រទេសដៃគូពាណិជ្ជកម្មធំៗរបស់កម្ពុជា។
យ៉ាងណាក៏ដោយដើម្បីអាចឈានទៅសម្រេចបានគោលដៅកំណើនសេដ្ឋកិច្ចដូចអ្វីដែលបានព្យាករ លោក លី សុដេត ជំរុញឱ្យរាជរដ្ឋាភិបាលកម្ពុជាកែលម្អបរិយាកាសធុរកិច្ច ជាពិសេសពាក់ព័ន្ធនឹងនីតីវិធីនៃការស្នើសុំការវិនិយោគ ដោយសារបច្ចុប្បន្នការស្នើសុំវិនិយោគនៅកម្ពុជាហាក់មានរយៈពេលយូរជាងបណ្តាប្រទេសក្នុងតំបន់។
ជាមួយគ្នានេះលោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំកម្ពុជាបានគូសបញ្ជាក់ថា ដើម្បីរក្សាបានកំណើនសេដ្ឋកិច្ចបន្ត កម្ពុជាត្រូវរក្សាស្ថិរភាពម៉ាក្រូហិរញ្ញវត្ថុ ដោយការស្ដារឡើងវិញនូវលំហសារពើពន្ធ និងការការពារវិស័យហិរញ្ញវត្ថុរបស់ខ្លួន។ សម្រាប់អ្នកជំនាញរូបនេះ កម្ពុជាអាចពង្រឹងភាពប្រកួតប្រជែងរបស់ខ្លួនតាមរយៈការកែលម្អបរិយាកាសធុរកិច្ច សម្រួលនីតិវិធីពាណិជ្ជកម្មនៅតាមព្រំដែន ធ្វើឱ្យការផ្គត់ផ្គង់ថាមពលកាន់តែអាចទុកចិត្តបាន និងពង្រឹងវិស័យអប់រំ។
ទន្តឹមនឹងនេះ នៅក្នុងរបាយការណ៍បច្ចុប្បន្នភាពសេដ្ឋកិច្ចរបស់ធនាគារពិភពលោកប្រចាំនៅកម្ពុជាមានផ្នែកមួយផ្ដោតពិសេសទៅលើការពិនិត្យមើលរបៀប ដែលកម្ពុជាអាចពង្រឹងប្រព័ន្ធអប់រំរបស់ខ្លួន ដើម្បីបង្កើនពលកម្មដែលមានជំនាញ និងបង្កើនផលិតភាព។ ក្នុងនោះស្ថាប័នហិរញ្ញវត្ថុនេះជំរុញឱ្យកម្ពុជាបង្កើនការវិនិយោគលើការអប់រំកុមារតូច និងនៅបឋមសិក្សា លើកកម្ពស់ប្រសិទ្ធភាពគ្រូបង្រៀន និងធ្វើឲ្យការបែងចែកធនធានកាន់តែមានសមធម៌។
បើយោងតាមរបាយការរបស់ធនាគារពិភពលោកប្រចាំនៅកម្ពុជា ការមកដល់របស់ភ្ញៀវទេសចរអន្តរជាតិមានការប្រសើរឡើងនៅក្នុងត្រីមាសទី១ ដែលឈានដល់កម្រិត៨៤% នៃការមកដល់មុនពេលមានជំងឺរាតត្បាតកូវីដ-១៩។ ការនាំចេញសម្លៀកបំពាក់ ទំនិញធ្វើដំណើរ និងស្បែកជើង បានស្ទុះងើបឡើងវិញ ខណៈដែលការនាំចេញទំនិញមិនមែនសម្លៀកបំពាក់ ជាពិសេសទំនិញកសិកម្ម នៅតែមានភាពធន់។ ទោះជាយ៉ាងណាក៏ដោយ ក៏សកម្មភាពក្នុងវិស័យសំណង់នៅតែមានតិចតួច ខណៈដែលទីផ្សារអចលនទ្រព្យនៅតែបន្តធ្លាក់ចុះ។ ជាលទ្ធផល កំណើនឥណទានក្នុងស្រុកបានធ្លាក់ចុះយ៉ាងខ្លាំង បណ្ដាលឱ្យមានការកាត់បន្ថយការចំណាយឯកជន និងប៉ះពាល់ដល់ការប្រមូលចំណូលក្នុងស្រុក៕