ក្នុងរបាយការណ៍ដែលចេញផ្សាយកាលពីថ្ងៃព្រហស្បតិ៍ទី១៥កញ្ញា ធនាគារពិភពលោកបានអំពាវនាវដល់អ្នកបង្កើតគោលនយោបាយរូបិយវត្ថុក្នុងប្រទេសដែលមានសេដ្ឋកិច្ចធំៗ សហការ និងសម្របសម្រួលសកម្មភាពរបស់ពួកគេ ធ្វើយ៉ាងណាកុំមានការរឹតបន្តឹងគោលនយោបាយខ្លាំងពេក។
ត្រូវបានដឹកនាំដោយធនាគារកណ្តាលនៃរដ្ឋសហព័ន្ធអាមេរិក ធនាគារកណ្តាលប្រទេសនានា បានចាប់ផ្តើមដំឡើងអត្រាការប្រាក់ជាបន្តបន្ទាប់ក្នុងមួយរយៈពេលចុងក្រោយនៃឆ្នាំ២០២២នេះ ក្នុងគោលបំណងដើម្បីទប់ទល់នឹងអតិផរណា។ អតិផរណាដែលកំពុងរីកប៉ោងខ្លាំង ហើយមានខ្លះកើនដល់តួលេខពីរខ្ទង់ នៅក្នុងប្រទេសមានសេដ្ឋកិច្ចជឿនលឿនមួយចំនួនផងដែរ។ ដោយឡែក តម្លៃថាមពល និងអាហារបានកើនខ្ពស់ដូចគ្នា បន្ទាប់ពីការលុកលុយរបស់រុស្ស៊ីលើអ៊ុយក្រែនកាលពីចុងខែកុម្ភៈ ដែលបណ្តាលឲ្យជីវភាពរស់នៅរបស់ប្រជាពលរដ្ឋជួបវិបត្តិ។
ដើម្បីជៀសវាងការធ្វើឱ្យអតិផរណាបន្តកើនឡើងឥតឈប់ ការដំឡើងអត្រាការប្រាក់គោលខ្ពស់ពេកមិនមែនជាជម្រើសល្អនោះទេ។ ធនាគារពិភពលោកបានជំរុញឱ្យរដ្ឋាភិបាលផ្តល់ជំនួយសង្គ្រោះដល់ក្រុមគ្រួសារនិងបុគ្គលដែលងាយរងគ្រោះជំនួសវិញ។
អត្ថបទគួរអាន
ប្រធានធនាគារពិភពលោក លោក David Malpass បាននិយាយថា សន្ទុះសេដ្ឋកិច្ចពិភពលោកកំពុងធ្លាក់ចុះ ហើយប្រទេសជាច្រើនទៀតកំពុងធ្លាក់ចូលទៅក្នុងវិបត្តិសេដ្ឋកិច្ចរួចទៅហើយ។ លោកបានបន្ថែមថា ការព្រួយបារម្ភយ៉ាងខ្លាំងរបស់លោក គឺនិន្នាការទាំងនេះនឹងបន្តកើតមានជាមួយនឹងផលវិបាកយូរអង្វែង បំផ្លិចបំផ្លាញដល់ប្រជាជននៅក្នុងប្រទេសនិងទីផ្សារដែលកំពុងរីកចម្រើន ក៏ដូចជាប្រទេសកំពុងអភិវឌ្ឍន៍នៅឡើយ។ លោកបានអំពាវនាវឱ្យមានសកម្មភាពបន្ថែមទៀតក្នុងការជំរុញផលិតកម្ម ដើម្បីបន្ធូរបន្ថយសម្ពាធអតិផរណា ជាជាងការផ្តោតសំខាន់លើការទប់ស្កាត់ការចំណាយ។ ការបង្កើនការវិនិយោគនឹងធ្វើឲ្យប្រសើរឡើងនូវផលិតភាព និងការបែងចែកមូលធន ដែលជាកត្តាសំខាន់សម្រាប់កំណើន និងការកាត់បន្ថយភាពក្រីក្រ។
ទោះយ៉ាងណា ធនាគារពិភពលោកមិនបានព្យាករថ្មីសម្រាប់សេដ្ឋកិច្ចពិភពលោកទេ ប៉ុន្តែបានកត់សម្គាល់ថា ទស្សនវិស័យសេដ្ឋកិច្ចសម្រាប់ឆ្នាំក្រោយឆ្នាំ២០២៣ បានធ្លាក់ចុះ ដោយសារតែទាំងប្រទេសអ្នកមាន និងប្រទេសក្រីក្រ សុទ្ធតែបានឆ្លើយតបនឹងអតិផរណាខ្ពស់នៅឆ្នាំនេះតាមរយៈការរិតត្បិតលើការចំណាយ។
គួរជម្រាបថា ធនគារកណ្តាលអាមេរិកនឹងដំឡើងអត្រាការប្រាក់គោល ០,៧៥%បន្ថែមទៀតនៅសប្តាហ៍ក្រោយ ខណៈធនាគាកណ្តាលអង់គ្លេសក៏គ្រោងនឹងដំឡើង ០,៥%ទៀតដូចគ្នាដែរ។ ប្រសិនបើកម្រិតនៃអតិផរណានៅតែមានខ្ពស់ ហើយធនាគារកណ្តាលនៅតែបន្តដំឡើងអត្រាការប្រាក់ នោះកំណើនសេដ្ឋកិច្ចពិភពលោកនឹងធ្លាក់ចុះមកត្រឹម ០,៥% នៅឆ្នាំ ២០២៣ ពោលគឺវានឹងធ្លាក់ចូលក្នុងវិបត្តិតែម្តង។ នេះបើយោងតាមធនាគារពិភពលោក៕
