តើការចូលរួមក្នុងយន្តការ៦ប្រទេសផ្តល់ទិដ្ឋាការរួម ដើម្បីគោលដៅតែ១ អាចផ្តល់ផលវិជ្ជមាន និងអវិជ្ជមានយ៉ាងណាដល់វិស័យទេសចរណ៍កម្ពុជា?

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានគាំទ្រចំពោះយន្តការផ្តល់ទិដ្ឋាការរួមគ្នារវាងប្រទេសទាំង៦នៅតំបន់អាស៊ាន ដើម្បីគោលដៅទេសចរណ៍តែមួយ។ តែយ៉ាងណា អ្នកជំនាញរូបនេះយល់ឃើញថា ប្រទេសជាសមាជិកគួរតែពិនិត្យមើលលើគោលនយោបាយរបស់ថៃ អំពីតម្លាភាពនៃការទទួលបានផលប្រយោជន៍ផងដែរ។ សម្រាប់អ្នកជំនាញរូបនេះ ការផ្តល់ទិដ្ឋាការរួមគ្នារវាងប្រទេសទាំង៦ ក្នុងគោលដៅទេសចរណ៍តែមួយនេះ ហាក់មិនមានហានិភ័យគួរឱ្យព្រួយបារម្ភឡើយ ដោយសារតែកម្ពុជាមានច្បាប់អន្តោប្រវេសន៍ និងប្រព័ន្ធដឹកនាំល្អ។

ជាការកត់សម្គាល់របស់លោក ធួន ស៊ីណាន កន្លងមកភ្ញៀវបរទេសមកពីតំបន់អឺរ៉ុប តែងតែយកបណ្ដាប្រទេសជិតខាងកម្ពុជាធ្វើជាប្រទេសខ្សែទស្សនកិច្ចតែមួយ ហើយវាជាមធ្យោបាយល្អសម្រាប់កម្ពុជា នៅពេលបានចូលរួមក្នុងគោលដៅទេសចរណ៍តែមួយនេះ។ ទន្ទឹមនេះ លោកស្នើឱ្យភាគីពាក់ព័ន្ធត្រូវចាប់យកឱកាសនេះ ដើម្បីធ្វើជាយន្តការពិសេសក្នុងការប្រកួតប្រជែងជាមួយបណ្ដាប្រទេសទាំង៦ បើពុំដូច្នោះទេ កម្ពុជាអាចនឹងបាត់បង់ផលប្រយោជន៍ពីការចូលរួមនេះ។

ដោយឡែក លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជាយល់ឃើញថា ការផ្តល់ទិដ្ឋាការរួមគ្នារវាងប្រទេសទាំង៦នៅតំបន់អាស៊ានសម្រាប់គោលដៅទេសចរណ៍តែមួយ គឺជាគំនិតផ្ដួចផ្ដើមល្អដែលអាចបង្កភាពងាយស្រួលដល់អ្នកទេសចរបរទេស ដែលចង់មកលេងកម្សាន្តនៅបណ្ដាប្រទេសក្នុងតំបន់អាស៊ាន។ ទោះជាយ៉ាងណាអ្នកជំនាញរូបនេះ ហាក់មានក្ដីបារម្ភចំពោះប្រទេសជាសមាជិកដូចជាកម្ពុជា ឡាវ និងប្រ៊ុយណេថា អាចនឹងទទួលបានផលប្រយោជន៍តិចពីគំនិតផ្តួចផ្តើមនេះ ខណៈប្រទេសថៃ ម៉ាឡេស៊ី និងវៀតណាមមានអ្នកទេសចរនាំមុខតាំងពីមុន និងក្រោយការរាតត្បាតជំងឺកូវីដ-១៩ ហើយផ្ទុយទៅវិញបណ្ដាប្រទេសទាំងនេះអាចនឹងទទួលបានផលប្រយោជន៍បន្ថែមទៀតពីគំនិតផ្តួចផ្តើមនេះ។

គួរបញ្ជាក់ថា រដ្ឋមន្រ្តីក្រសួងទេសចរណ៍កម្ពុជាបានគាំទ្រ និងចូលរួមជាមួយគំនិតផ្តួចផ្តើមជួយសម្រួលដល់ការធ្វើដំណើររបស់ភ្ញៀវទេសចរតាមរយៈការផ្តល់ទិដ្ឋាការរួមគ្នារវាងប្រទេសទាំង៦ នៅតំបន់អាស៊ាន ក្នុងគោលដៅទេសចរណ៍តែមួយនេះ ខណៈប្រទេសថៃ នឹងក្លាយជាមជ្ឈមណ្ឌលទេសចរណ៍ក្នុងតំបន់។ ប្រទេសទាំង៦នោះរួមមានប្រ៊ុយណេ កម្ពុជា ឡាវ ម៉ាឡេស៊ី វៀតណាម និងថៃ។ ហើយគំនិតផ្តួចផ្តើម "៦ប្រទេស គោលដៅ១" មានគោលបំណងជំរុញកិច្ចសហប្រតិបត្តិការទេសចរណ៍ និងសេដ្ឋកិច្ចរវាងប្រទេសទាំង៦នេះ៕

អត្ថបទ៖ បូ ដូឡា,រូបភាពឯកសារ