ថ្លែងប្រាប់ក្រុមអ្នកសារព័ត៌មាននៅថ្ងៃចុងក្រោយនៃដំណើរទស្សនកិច្ចនៅរដ្ឋធានីវៀងចន្ទន៍ ប្រទេសឡាវ នាយករដ្ឋមន្ត្រីសិង្ហបុរី លោក ឡរ៉េន វង់ បាននិយាយថា មេដឹកនាំពិភពលោកនៅក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធកាលពីសប្ដាហ៍មុនបានសម្ដែងក្ដីបារម្ភស្រដៀងៗគ្នាអំពីអនាគត នៃការវិវត្តរបស់ស្ថានការណ៍ភូមិសាស្ត្រនយោបាយដែលកំពុងកើនឡើងទៅជាជម្លោះ និងការគំរាមកំហែងនៃការប្រែប្រួលអាកាសធាតុជាដើម។
លោក វង់ បាននិយាយថា ស្របពេលអាស៊ាន កំពុងធ្វើដំណើរឆ្ពោះទៅមុខ ឥឡូវនេះអាស៊ានកំពុងស្ថិតក្នុងដំណាក់កាលនៃការវិវត្តមួយទៀត ដែលពិភពលោកកំពុងជាប់ផុងនឹងការប្រកួតប្រជែងភូមិសាស្ត្រនយោបាយ និងការប្រកួតប្រជែងគ្នាយ៉ាងខ្លាំងបន្ទាប់ពីធ្វើសកលភាវូបនីយកម្មអស់រយៈពេល៣០ឆ្នាំមកនេះ។ ស្របពេលមានខ្លះចាត់ទុកបញ្ហាភាពតានតឹងផ្នែកភូមិសាស្ត្រនយោបាយបច្ចុប្បន្នជាសង្រ្គាមត្រជាក់ថ្មី នាយករដ្ឋមន្ត្រីសិង្ហបុរី យល់ឃើញថា ក្នុងបរិបទបែបនេះ វាមានសារសំខាន់ជាងពេលណាៗទាំងអស់សម្រាប់អាស៊ានក្នុងការសម្លឹងមើលការពង្រឹងសមាហរណកម្មក្នុងតំបន់ និងធ្វើឱ្យប្រាកដថា អាស៊ាន អាចមានសំឡេងកាន់តែខ្លាំងនៅលើឆាកពិភពលោក។
លោក ក៏បានកត់សម្គាល់ដែរថា ប្រទេសជាច្រើនបានដឹងខ្លួនថា បានទទួលផលប៉ះពាល់នៃការប្រែប្រួលអាកាសធាតុ ហើយមានប្រទេសមួយចំនួននៅអាស៊ីអាគ្នេយ៍បានរងការវាយប្រហារដោយព្យុះទីហ្វុងយ៉ាហ្គី (Yagi) ក្នុងពេលថ្មីៗកន្លងមក ខណៈដែលផ្នែកមួយចំនួននៃសហរដ្ឋអាម៉េរិកត្រូវបានវាយប្រហារដោយព្យុះសង្ឃរាដែលបង្កការបំផ្លិចបំផ្លាញ និងការបាត់បង់ជីវិតផងដែរ។
លោក Wong បានបន្ថែមថា ក្នុងនាមជាមេដឹកនាំសិង្ហបុរី លោកនឹងព្យាយាមឱ្យអស់ពីសមត្ថភាព ដើម្បីដឹកនាំលទ្ធផលក្នុងទិសដៅវិជ្ជមានបន្ថែមទៀត មិនថាជាសកម្មភាពពាក់ព័ន្ធនឹងការប្រែប្រួលអាកាសធាតុ ឬវិធីដែលលោកអាចធានាបាននូវការដោះស្រាយជម្លោះដោយសន្តិវិធី និងមានការសន្ទនាក្នុងន័យស្ថាបនារវាងភាគីផ្សេងៗនោះទេ៕
អត្ថបទ៖ សុខ មង្គល
