![មេដឹកនាំអាម៉េរិក](https://cdn.cambonomist.com/media/images/kr11111.2e16d0ba.fill-960x540.jpg)
ស្របពេលយុទ្ធនាការពិភាក្សាដេញដោលសម្រាប់បេក្ខជនប្រធានាធិបតីអាម៉េរិកនឹងចាប់ផ្ដើមនៅសប្ដាហ៍ក្រោយនោះ ក្រុមទីភ្នាក់ងារស៊ើបការណ៍សម្ងាត់អាម៉េរិក បានវាយតម្លៃថា ចិនគ្មានការពេញចិត្តច្បាស់លាស់រវាងបេក្ខជនទាំងពីរនេះទេ។ នេះបើតាមការឱ្យដឹងរបស់មន្ត្រីអាម៉េរិកមួយចំនួនដែលសុំលាក់អត្តសញ្ញាណ។
ការសន្និដ្ឋាននេះបានបង្ហាញថា ទាំងមន្ត្រីចិន និងមន្ត្រីអាម៉េរិក ជឿថា ទំនាក់ទំនងរវាងប្រទេសមហាអំណាចពិភពលោកទាំងពីរនេះនឹងបន្តស្ថិតនៅលើគន្លងធ្លាក់ចុះរយៈពេលវែង ទោះបីជាថ្មីៗនេះមានការកើនឡើងនូវកិច្ចប្រជុំកម្រិតខ្ពស់ដែលគេបានចាត់ទុកថា ជាការប្រឹងប្រែងដើម្បីគ្រប់គ្រងការខ្វែងគំនិតគ្នាក៏ដោយ ក្រោយពីប្រទេសទាំងពីរបានប៉ះទង្គិចគ្នាលើអ្វីៗគ្រប់យ៉ាងតាំងពីបច្ចេកវិទ្យារហូតដល់សិទ្ធិមនុស្ស និងសមុទ្រចិនខាងត្បូងនៅប៉ុន្មានឆ្នាំចុងក្រោយនេះ។
ការវាយតម្លៃរបស់អាម៉េរិក គឺត្រូវគ្នានឹងការយល់ឃើញរបស់មន្ត្រីចិនមួយចំនួន ដែលគេបានសម្ភាសក្នុងពេលកន្លងមកដោយមន្ត្រីចិនទាំងនោះយល់ឃើញថា បេក្ខជនទាំងពីរនេះមានចេតនាដូចគ្នាក្នុងការទប់ស្កាត់ និងរារាំងការរះឡើងនូវឥទ្ធិពលរបស់ប្រទេសចិនក្នុងតំបន់ក៏ដូចជាក្នុងពិភពលោកផងដែរ។
លោក ចៅ ជីខៃ (Gao Zhikai) អតីតអ្នកការទូតចិនម្នាក់បាននិយាយថា ក្នុងចំណោមបេក្ខជនទាំងពីរនេះ គឺគ្មានបេក្ខជនណាមួយល្អឥតខ្ចោះនោះទេសម្រាប់ចិន។ លោកអះអាងថា លោក បៃដិន គឺជាអ្នកចម្បាំងសង្រ្គាមត្រជាក់ដែលមិនខ្វល់ថា លោករុញពិភពលោកឱ្យធ្លាក់ក្នុងជម្លោះកម្រិតណានោះទេ។ ចំណែកលោក ត្រាំ វិញប្រហែលជានឹងដាក់ទណ្ឌកម្ម និងពន្ធលើប្រទេសចិននៅពេលលោកបានធ្វើជាប្រធានាធិបតីអាម៉េរិក៕
អត្ថបទ៖ សុខ មង្គល