ទោះជាបែបនេះក្តីមានអតិថិជនមួយចំនួនមានការបារម្ភថា ការរៀបចំឥណទានឡើងវិញនេះអាចធ្វើឱ្យពួកគេជួបលំបាកក្នុងការទទួលបានកម្ចីនៅពេលក្រោយ ដ្បិតព័ត៌មាននៃការរៀបចំឥណទានឡើងវិញនេះត្រូវបានកត់ត្រានៅក្នុងប្រព័ន្ធរបស់ការិយាល័យឥណទាន (CBC) ។ តើការរៀបចំឥណទានឡើងវិញ ពិតជាអាចបង្កការរាំងស្ទះដល់អ្នកដែលត្រូវការទុនបន្ថែមមែនដែរ ឬទេ?
លោកជំទាវ ជា សិរី អគ្គទេសាភិបាលធនាគារជាតិនៃកម្ពុជា បានគូសបញ្ជាក់ថា ការរៀបចំឥណទានឡើងវិញមិនបានបង្កការរាំងស្ទះដល់អ្នកដែលត្រូវការទុនបន្ថែមនោះទេ បើទោះបីការរៀបចំឥណទានឡើងវិញនេះត្រូវបានកត់ត្រាទុកក្នុងប្រព័ន្ធរបស់ការិយាល័យឥណទាន ដើម្បីឱ្យគ្រឹះស្ថានធនាគារនានា មានឯកសារសម្រាប់ផ្ទៀងផ្ទាត់ក្នុងការផ្តល់កម្ចីជូនអតិថិនជនក៏ដោយ។ បើតាមថ្នាក់ដឹកនាំរូបនេះ ឯកសារព័ត៌មានរបស់អតិថិជនរៀបចំឥណទានឡើងវិញនឹងត្រូវរក្សាទុកក្នុងប្រព័ន្ធរបស់ CBC ត្រឹមតែរយៈពេល១២ខែប៉ុណ្ណោះ ហើយក្រោយពីរយៈពេល១២ខែ គឺឯកសារព័ត៌មានរបស់អតិថិជនដែលរៀបចំឥណទានឡើងវិញនឹងលែងមានតែម្ដង ខណៈការកត់ត្រាឯកសារព័ត៌មានរបស់អតិថិជន ក៏មិនមានន័យថា ជាការរៀបចំដាក់ពិន័យដល់អតិថិជននោះដែរ។
អត្ថបទគួរអាន
ពាក់ព័ន្ធនឹងបញ្ហានេះដែរ ទាំងលោក រ័ត្ន សោភ័ណ ប្រធានសមាគមធនាគារនៅកម្ពុជា និងលោក សុខ វឿន អនុប្រធានក្រុមប្រឹក្សាភិបាលសមាគមមីក្រូហិរញ្ញវត្ថុ បានអះអាងថា ព័ត៌មានពាក់ព័ន្ធនឹងការៀបចំឥណទានឡើងវិញរបស់អតិថិជន មិនមែនជាឧបសគ្គសម្រាប់អតិថិជនក្នុងការទទួលបានកម្ចីបន្ថែមពីគ្រឹះស្ថានធនាគារនិងហិរញ្ញវត្ថុនោះទេ។ បើតាមការអះអាងរបស់ថ្នាក់ដឹកនាំទាំងពីររូបនេះ របាយការណ៍របស់ CBC គ្រាន់តែជាផ្នែកមួយប៉ុណ្ណោះ ដ្បិតថា គ្រឹះស្ថានធនាគារ និងមីក្រូហិរញ្ញវត្ថុមានកត្តាវាយតម្លៃជាច្រើនទៀត ជាពិសេសពាក់ព័ន្ធនឹងលំហូរសាច់ប្រាក់របស់អតិថិជនតែម្តង។
បើតាមការអះអាងរបស់លោកជំទាវ ជា សិរី ការរៀបចំឥណទានឡើងវិញរបស់គ្រឹះស្ថានធនាគារ និងហិរញ្ញវត្ថុមិនអាចធ្វើឡើងគ្រប់អតិថិជនទាំងអស់គ្នានោះទេ ពោលគឺអាចរៀបចំតែលើអតិថិជនដែលមានបញ្ហាលំហូរសាច់ប្រាក់ពិតប្រាកដតែប៉ុណ្ណោះ។
សូមបញ្ជាក់ថា ការរៀបចំឥទានឡើងវិញ គឺជាគោលនយោបាយមួយដែលធនាគារជាតិនៃកម្ពុជា បានដាក់ចេញតាំងពីខែមីនា ឆ្នាំ២០២០មក ពោលគឺនៅពេលដែលកម្ពុជាទទួលរងនូវការឆ្លងរីករាលដាលនៃជំងឺកូវីដ-១៩ ដើម្បីជួយសម្រាលបន្ទុកដល់អតិថិជន ដែលរងផលប៉ះពាល់ដោយផ្ទាល់ និងប្រយោលពីការឆ្លងរីករាលដាលនេះ៕
អត្ថបទ៖ បូ ដូឡា
