![វិស័យកសិកម្ម](https://cdn.cambonomist.com/media/images/krkhchkhtdnsrv22222333.2e16d0ba.fill-960x540.jpg)
ឯកឧត្តម ងិន ឆាយ ប្រតិភូររាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានគូសបញ្ជាក់ថា មកទល់ពេលនេះមានដំណាំស្រូវជាង៥ម៉ឺនហិកតា នៅតាមបណ្តាខេត្តចំនួន៥ បានរងការវាយប្រហារពីសត្វល្អិតចង្រៃរុយ ស។ ខេត្តទាំង៥នេះ រួមមាន ខេត្តស្វាយរៀង តាកែវ ព្រៃវែង ត្បូងឃ្មុំ និងខេត្តកណ្តាល ហើយក្នុងចំណោមខេត្តទាំងនេះ ដំណាំស្រូវក្នុងខេត្តព្រៃវែង រងការបំផ្លិចបំផ្លាញច្រើនជាងគេ ដែលមានរហូតដល់ជាង១ម៉ឺនហិចតាឯណោះ។
បើតាមមន្ត្រីជាន់ខ្ពស់រូបនេះ ការបំផ្លាញស្រូវរបស់រុយ ស នេះ គឺមានស្ទើរគ្រប់ដំណាក់កាលនៃការដាំដុះរបស់ស្រូវ ពោលគឺប្រសិនបើរុយ ស បានបំផ្លាញស្រូវនៅក្នុងដំណាក់កាលស្រូវផើម ឬចេញគួរនោះ គឺអាចរងផលប៉ះពាល់ខ្លាំងតែម្តង ដែលអាចធ្វើឱ្យទិន្នផលស្រូវថយចុះផងដែរ។ ឯកឧត្តម ងិន ឆាយ បានបញ្ជាក់ដែរថា ស្រែដែលរងផលប៉ះពាល់ធ្ងន់ធ្ងរជាងគេនោះ គឺដោយសាររងការបំផ្លាញចម្រុះពីសត្វល្អិតចង្រៃនានា ពោលគឺបន្ទាប់ពីរងការបំផ្លាញពីរុយ ស ហើយ ក៏ត្រូវរងការបំផ្លាញពីដង្កូវមូរបន្ថែមពីលើទៀត។ តែយ៉ាងណា ឯកឧត្តម បានអះអាងថា មកទល់ពេលនេះ ការរាតត្បាតរបស់សត្វល្អិតចង្រៃ រុយ ស នេះ គឺមិនទាន់មានសភាពធ្ងន់ធ្ងរគួរឱ្យព្រួយបារម្ភនោះទេ ពោលគឺស្ថានភាពអាចគ្រប់គ្រងបាន។
គួរជម្រាបថា តាមការបញ្ជាក់របស់ឯកឧត្តម ងិន ឆាយ ស្រូវដែលត្រូវបានបំផ្លាញពីសត្វល្អិតចង្រៃរុយ ស នេះ ភាគច្រើនកើតលើពូជស្រូវស្រាលមិនប្រកាន់រដូវ ខណៈពូជស្រូវប្រកាន់រដូវមិនរងការបំផ្លាញនោះទេ។ តាមរយៈកិច្ចអន្តរាគមន៍របស់ក្រសួងកសិកម្ម រុក្ខាប្រមាញ់ និងនេសាទ ព្រមទាំងអាជ្ញាធរពាក់ព័ន្ធក្នុងការកម្ចាត់ពពួកសត្វល្អិតចង្រៃបំផ្លាញដំណាំស្រូវរបស់ប្រជាកសិករក្នុងពេលកន្លងមកនេះ គឺសម្រេចបានជោគជ័យគួរឱ្យកត់សម្គាល់៕