![ទីផ្សារមាស](https://cdn.cambonomist.com/media/images/1_tGZaZCe.2e16d0ba.fill-960x540.jpg)
ការកើនឡើងតម្លៃមាសជាបន្តបន្ទាប់នេះ ត្រូវបានអ្នកជំនាញវាយតម្លៃថា គឺដោយសារតែការវិវត្តន៍ភាពតានតឹងនៃស្ថានការណ៍ពិភពលោក ខណៈមកទល់ពេលនេះនៅពុំទាន់មានសញ្ញាណាមួយបង្ហាញពីការធ្លាក់ចុះមកវិញនៅឡើយទេ។ អ្នកជំនាញជឿជាក់ថា តម្លៃមាសនឹងអាចហក់ឡើងដល់២ពាន់៥រយដុល្លារក្នុងអោន(១អោនជាង៨ជីមាស) ឬជាង៣ពាន់ដុល្លារក្នុង១តម្លឹង នៅឆ្នាំ២០២៤។
នៅក្នុងរយៈពេល៣សប្តាហ៍កន្លងកមកនេះ ហាងឆេងមាសនៅលើទីផ្សារកម្ពុជា បានហក់ឡើងថ្លៃជាបន្តបន្ទាប់ ពោលគឺគិតត្រឹមថ្ងៃទី២១ ខែឧសភា មាសមួយតម្លឹងត្រូវបានលក់ចេញក្នុងតម្លៃ២ពាន់៩រយដុល្លារ កើនឡើងប្រមាណ១០០ដុល្លារក្នុង១តម្លឹង បើធៀបនឹងតម្លៃលក់ចេញកាលពីខែមេសា។ តើមានកត្តាអ្វីបានជាជំរុញឱ្យតម្លៃមាសនៅលើទីផ្សារកម្ពុជាហក់ឡើងថ្លៃជាបន្តបន្ទាប់បែបនេះ?
ឆ្លើយតបនឹងសំណួរនេះ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរីធី បានគូសបញ្ជាក់ថា កត្តាដែលជំរុញឱ្យតម្លៃមាសនៅកម្ពុជា ក៏ដូចជាលើទីផ្សារពិភពលោកហក់ឡើងជាបន្តបន្ទាប់នេះ គឺដោយសារការវិវត្តន៍ភាពតានតឹងផ្នែកភូមិសាស្ត្រនយោបាយសកល ជាពិសេសបញ្ហាសង្គ្រាមនៅអ៊ុយក្រែន និងនៅតំបន់មជ្ឈិមបូព៌ា។ ស្ថិតក្នុងភាពនេះបានជំរុញឱ្យអ្នកវិនិយោគ ក៏ដូចជាប្រទេសមួយចំនួនជាពិសេសចិន បាននាំគ្នាវិនិយោគ និងទិញមាសសម្រាប់ស្តុកទុក ដ្បិតថា មាសគឺលោហៈធាតុតម្លៃ ដែលមានសុវត្ថិភាពខ្ពស់ក្នុងការវិនិយោគ និងជាទុនបម្រុងអន្តរជាតិដ៏សំខាន់។
ទន្ទឹមនឹងតម្លៃមាសបានហក់ឡើងជាបន្តបន្ទាប់នេះ លោក ឡុង សំណាង អះអាងថា មកទល់ពេលនេះ ពុំទាន់មានសញ្ញាណាមួយបង្ហាញថា ហាងឆេងមាសនឹងមានការធ្លាក់ចុះមកិវិញនោះទេ ខណៈបញ្ហាភូមិសាស្រ្តនយោបាយនៅតែបន្តតានតឹង ហើយប្រសិនបើប្រាក់ដុល្លាររបស់អាម៉េរិកនៅតែធ្លាក់ចុះនោះតម្លៃមាសនឹងបន្តឡើងថ្លៃបន្ថែមទៀត។
អ្នកជំនាញក្នុងវិស័យមាសព្យាករថា តម្លៃមាសនៅឆ្នាំនេះនឹងហក់ឡើងថ្លៃដល់២ពាន់៥រយដុល្លារក្នុង១អោន ឬជាង៣ពាន់ដុល្លារ ក្នុង១តម្លឹងនៅឆ្នាំ២០២៤ ខណៈបច្ចុប្បន្នតម្លៃមាសបានហក់ឡើងដល់ជាង២ពាន់៣រយដុល្លារក្នុង១អោន។ យ៉ាងណាមិញ អ្នកជំនាញព្រមានថា បញ្ហាមាសឡើងថ្លៃនេះអាចនឹងធ្វើឱ្យអាជីវករទិញលក់មាសមួយចំនួនប្រឈមមុខនឹងហានិភ័យ ប្រសិនបើពួកគេពុំមានការគិតគូរ និងប្រយ័ត្នប្រយែងឱ្យបានខ្ពស់ក្នុងការទិញលក់មាសនៅក្នុងអំឡុងពេលនេះទេ៕
អត្ថបទ៖ បូ ដូឡា