![បច្ចេកវិទ្យា OpenAI](https://cdn.cambonomist.com/media/images/brks123hhhddd.2e16d0ba.fill-960x540.jpg)
យោងតាមការចុះផ្សាយរបស់សារព័ត៌មាន BBC កាលពីថ្ងៃសុក្រ ទី២៦ ខែកក្កដា ឱ្យដឹងថា ក្រុមហ៊ុនបច្ចេកវិទ្យាបញ្ញាសិប្បនិម្មិតអាម៉េរិក OpenAI ដែលកំពុងមានឈ្មោះល្បីរន្ទឺពាសពេញពិភពលោកកំពុងកែលម្អមុខងារស្វែងរកព័ត៌មាន AI Chat ឬ AI Chatbot របស់ខ្លួន ដើម្បីប្រកួតប្រជែងជាមួយនឹងមុខងារស្វែងរកព័ត៌មាន Search Engine របស់ក្រុមហ៊ុន Google ដែរ។
ពេលនេះក្រុមហ៊ុន OpenAI ដែលមានក្រុមហ៊ុនយក្ស Microsoft ជាខ្នងបង្អែកដ៏ធំរបស់ខ្លួនកំពុងសាកល្បងមុខងារស្វែងរកថ្មី ដែលផ្តល់ព័ត៌មាន និងតំណភ្ជាប់ ឬលីង នៅក្នុង ChatGPT ដែលបច្ចុប្បន្នមានសម្រាប់តែអ្នកប្រើប្រាស់មួយចំនួននៅសហរដ្ឋអាម៉េរិក ប៉ុណ្ណោះ។
នៅទីបំផុត មុខងារថ្មីនេះនឹងត្រូវបានដាក់បញ្ចូលទៅក្នុង ChatGPT ដែលទទួលបានការគាំទ្រ និងពេញនិយមយ៉ាងឆាប់រហ័សក្នុងឆ្នាំ២០២២។
សូមបញ្ជាក់ថា មុខងារថ្មីនេះក៏នឹងអនុញ្ញាតឱ្យអ្នកប្រើប្រាស់អាចសួរសំណួរបញ្ជាក់បន្ថែមពីលើសំណួរ ដែលធ្លាប់បានសួររួចមកហើយផងដែរ៕
ដោយ: តែម សុខុម