លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល បានឲ្យដឹងថា នេះមិនមែនជារឿងថ្មីឡើយសម្រាប់គម្រោងអភិវឌ្ឍន៍ព្រលានយន្តហោះប៉ោយប៉ែតនេះ ព្រោះគម្រោងនេះ ធ្លាប់បានសុំគោលការណ៍ ពីរាជរដ្ឋាបាលម្តងហើយកាលពីឆ្នាំ២០០៦ ប៉ុន្តែ ត្រូវបានពន្យារពេលដោយសារឆ្នាំ២០០៧-២០០៨ កម្ពុជាទទួលរងឥទ្ធិលពលវិបត្តិសេដ្ឋកិច្ចពិភពលោក ប៉ុន្តែ ការទទួលបានគោលការណ៍ថ្មីនេះអាចមានភាពវិជ្ជមានច្រើន។
លោកបន្ថែមថា គម្រោងអភិវឌ្ឍន៍ព្រលានយន្តហោះរបស់វិស័យឯកជននេះ នឹងជំរុញឲ្យការធ្វើពាណិជ្ជកម្មរបស់កម្ពុជាកាន់តែប្រសើរឡើងថែមទៀត ពិសេស នៅតំបន់ប៉ោយប៉ែត សកម្មភាពអាជីវកម្មកាន់តែល្អ ជាមួយនឹងការអភិវឌ្ឍតំបន់សេដ្ឋកិច្ចពិសេស តំបន់ឧស្សាហកម្ម និងការរីកចម្រើនក្នុងវិស័យកាស៊ីណូ និងក៏ជាការតភ្ជាប់យ៉ាងសំខាន់សម្រាប់ការដឹកជញ្ជូនផង។
តើអ្នកបានអានអត្ថបទនេះ ឬនៅ?
លោក ស៊ិន ចាន់សិរីវុត្ថា បានឲ្យដឹងទៀតថា គម្រោងវិនិយោគនេះ ត្រូវចំណាយពេលវេលាសិក្សាឡើងវិញពី២ទៅ៣ឆ្នាំទៀត បន្ទាប់ពីក្រុមហ៊ុននេះ ទទួលបានគោលការណ៍ពីរាជរដ្ឋាភិបាលដែលគម្រោងនេះ នឹងត្រូវពិភាក្សាជាមួយដៃវិនិយោគនិងស្វែងរកក្រុមហ៊ុនឌីហ្សាញ។
ជារួម ការសិក្សាពីគម្រោងអភិវឌ្ឍន៍ព្រលាននេះ ត្រូវការពេលយ៉ាងហោចណាស់ពី ៣ ទៅ ៥ឆ្នាំ ហើយបើមិនមានបញ្ហារាំងស្ទះណាមួយទេ គម្រោងនេះអាចចាប់ផ្តើមសាងសង់នៅឆ្នាំ២០២០ ខាងមុខនេះ។
សូមជម្រាបថា រាជរដ្ឋាភិបាលកម្ពុជាបានចេញគោលការណ៍អនុញ្ញាតឲ្យក្រុមហ៊ុន PoyPet Airport Investment ដែលជាក្រុមហ៊ុនវិនិយោគសាងសង់ព្រលានយន្តហោះ រួចរាល់ហើយ។ គម្រោងព្រលានយន្តហោះនេះ នឹងសាងសង់ឡើងលើផ្ទៃដីប្រមាណជាង ១០០ហិកតា នៅក្រុងប៉ោយប៉ែត។ ចំពោះទំហំទឹកប្រាក់វិញ អាចចំណាយទឹកប្រាក់ចំនួនចន្លោះពី ៤០ ទៅ ៥០លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
