ស្ថាប័នមូលនិធិរូបិយវត្ថុអន្តរជាតិ IMF បានជំរុញឱ្យក្រុមមេដឹកនាំក្នុងវិស័យហិរញ្ញវត្ថុទូទាំងពិភពលោករឹតបន្តឹងហិរញ្ញវត្ថុរបស់ខ្លួន និងព្រមានថា ពិភពលោកនឹងប្រឈមនឹងវិបត្តិបំណុលរហូតដល់ទៅ១០០ទ្រីលានដុល្លារ ដែលអាចនឹងផ្ទុះឡើងក្នុងពេលដ៏ខ្លីខាងមុខ។ សូមបញ្ជាក់ថា ការព្រមាននេះធ្វើឡើងតែប៉ុន្មានថ្ងៃប៉ុណ្ណោះមុនពេលក្រុមមេដឹកនាំក្នុងវិស័យហិរញ្ញវត្ថុទូទាំងពិភពលោកត្រូវទៅចូលរួមក្នុងកិច្ចប្រជុំនៅរដ្ឋធានីវ៉ាស៊ីនតោន សហរដ្ឋអាម៉េរិក។
ក្រុមរដ្ឋមន្ត្រីហិរញ្ញវត្ថុ និងប្រធានធនាគារកណ្តាលនៃប្រទេសនានា ត្រូវបានជំរុញឱ្យរឹតបន្តឹងថវិការបស់ពួកគេតាមដែលអាចធ្វើទៅបាន ខណៈដែលការបោះឆ្នោតជ្រើសរើសប្រធានាធិបតីនៅសហរដ្ឋអាម៉េរិក នឹងត្រូវធ្វើឡើងនៅខែវិច្ឆិកា ដ៏ខ្លីខាងមុខនេះ ហើយវិបត្តិអតិផរណាក្នុងពិភពលោកក៏ទើបតែបញ្ចប់កាលពីពេលថ្មីៗនេះ។
ស្ថាប័នមូលនិធិរូបិយវត្ថុអន្តរជាតិ IMF ដែលកិច្ចប្រជុំប្រចាំឆ្នាំរបស់ខ្លួននឹងចាប់ផ្តើមនៅថ្ងៃទី២១ ខែតុលា បានលើកឡើងរួចហើយអំពីបញ្ហាសំខាន់ៗដែលខ្លួនសង្ឃឹមថា នឹងបញ្ចេញការព្យាករសេដ្ឋកិច្ចពិភពលោកនៅប៉ុន្មានថ្ងៃខាងមុខ។
ស្ថាប័នមូលនិធិរូបិយវត្ថុអន្តរជាតិ IMF ដែលគ្រោងនឹងបញ្ចេញរបាយការណ៍ដែលមានឈ្មោះថា Fiscal Monitor ឬការត្រួតពិនិត្យសារពើពន្ធរបស់ខ្លួននៅថ្ងៃទី២៣ ខែតុលា បានព្រមានថា បំណុលសាធារណៈរបស់ពិភពលោកទាំងមូលនឹងកើនឡើងរហូតដល់១០០ទ្រីលានដុល្លារអាម៉េរិក នៅឆ្នាំ២០២៤ នេះ ដែលភាគច្រើនដោយសារតែការកើនឡើងបំណុលរបស់មហាយក្សចិន និងសហរដ្ឋអាម៉េរិក។
អត្ថបទគួរអាន
នាយកគ្រប់គ្រងស្ថាប័នមូលនិធិរូបិយវត្ថុអន្តរជាតិ IMF លោកស្រី គ្រីស្តាលីណា ចចជីវ៉ា (Kristalina Georgieva) បានសង្កត់ធ្ងន់ថា បំណុលដ៏ច្រើនសម្បើមនេះបូករួមជាមួយនឹងកំណើនសេដ្ឋកិច្ចទាប កំពុងដាក់សម្ពាធមកលើសេដ្ឋកិច្ចរបស់ពិភពលោក។ ស្ថាប័នមូលនិធិរូបិយវត្ថុអន្តរជាតិ IMF បានព្រមានរដ្ឋមន្ត្រីហិរញ្ញវត្ថុអង់គ្លេស លោកស្រី រ៉ាឆែល រីហ្វ (Rachel Reeves) អំពីហានិភ័យនៃវិបត្តិហិរញ្ញវត្ថុក្នុងទីផ្សារ ប្រសិនបើបំណុលរបស់អង់គ្លេស មិនត្រូវបានគ្រប់គ្រងឱ្យបានល្អទេនោះ ហើយប្រទេសបារាំង ក៏ប្រឈមនឹងស្ថានភាពស្រដៀងគ្នានេះដែរ។
ស្ថាប័នមូលនិធិរូបិយវត្ថុអន្តរជាតិ IMF បានសង្កត់ធ្ងន់ថា បំណុលគរដូចភ្នំ និងគោលនយោបាយសារពើពន្ធមិនប្រាកដប្រជានៅក្នុងប្រទេសធំៗដូចជាប្រទេសចិន និងសហរដ្ឋអាម៉េរិកជាដើមអាចធ្វើឱ្យថ្លៃដើមនៃកម្ចី និងហានិភ័យបំណុលសម្រាប់បណ្ដាប្រទេសផ្សេងទៀតកើនឡើង។
ទន្ទឹមនេះ ក្រុមអ្នកជំនាញសេដ្ឋកិច្ចបានព្យាករថា ក្នុងពេលដ៏ខ្លីខាងមុខប្រទេសកាណាដា នឹងបញ្ចុះអត្រាការប្រាក់ ខណៈដែលរុស្ស៊ី នឹងដំឡើងអត្រាការប្រាក់ ហើយរបាយការណ៍សេដ្ឋកិច្ចសំខាន់ៗពីសហរដ្ឋអាម៉េរិក និងកាណាដា រួមទាំងការលក់ផ្ទះ និងការបញ្ជាទិញទំនិញផងក៏នឹងត្រូវបានឃ្លាំមើលយ៉ាងដិតដល់ផងដែរ។
មិនខុសពីតំបន់ផ្សេងៗទៀតប៉ុន្មានឡើយ អឺរ៉ុបនឹងផ្ដោតការយកចិត្តទុកដាក់ភាគច្រើនលើក្រុងវ៉ាស៊ីនតោន ដោយសមាជិកជាច្រើននៃធនាគារកណ្តាលអឺរ៉ុប ក៏គ្រោងនឹងចូលរួមកិច្ចប្រជុំនៅសហរដ្ឋអាម៉េរិកផងដែរ៕
ដោយ: តែម សុខុម
