សង្គ្រាមពាណិជ្ជកម្មកាន់តែឡើងកម្ដៅ ក្រោយចិន ព្រមានចាត់វិធានការ ប្រឆាំងនឹងចំណាត់ការរបស់អឺរ៉ុបជុំវិញការដំឡើងពន្ធលើរថយន្តអគ្គិសនីចិន

រដ្ឋមន្ត្រីពាណិជ្ជកម្មចិន លោក វ៉ាង វិនថាវ (Wang Wentao) បានលើកឡើងក្នុងជំនួបជាមួយក្រុមធុរជនចិន ក្នុងប្រទេសអេស្ប៉ាញ កាលពីថ្ងៃសៅរ៍ ចុងសប្ដាហ៍កន្លងទៅថា ក្រុងប៉េកាំង ចង់ដោះស្រាយជម្លោះសេដ្ឋកិច្ច និងពាណិជ្ជកម្មតាមរយៈការសន្ទនា និងជៀសវាងជម្លោះរីកកាន់តែធំមិនអាចគ្រប់គ្រងបាន។ លោកបានលើកឡើងបន្ថែមទៀតថា មេដឹកនាំបារាំង អាល្លឺម៉ង់ និងសហភាពអឺរ៉ុប បានបញ្ជាក់រួចហើយថា ពួកគេមានបំណងបញ្ចៀសសង្គ្រាមពាណិជ្ជកម្ម។

សូមបញ្ជាក់ថា សហភាពអឺរ៉ុប បានបើកការស៊ើបអង្កេតពាណិជ្ជកម្មលើក្រុងប៉េកាំង ក្រោមហេតុផលលក់បង្ខូចតម្លៃទីផ្សារ និងការឧបត្ថម្ភធនដោយមិនត្រឹមត្រូវ ជាពិសេសក្នុងវិស័យបច្ចេកវិទ្យាស្អាតដែលរួមមានទាំងរថយន្តអគ្គិសនីផងដែរ។ សហភាពអឺរ៉ុប ត្រូវជូនដំណឹងដល់បណ្ដាក្រុមហ៊ុននាំចេញរថយន្តអគ្គិសនីចិនថា ខ្លួនមានបំណងកំណត់អត្រាពន្ធក្នុងកម្រិតខ្ពស់ណាមួយនៅដើមខែមិថុនា នេះ ហើយអត្រាពន្ធទាំងនោះអាចនឹងចូលជាធរមាននៅមួយខែបន្ទាប់។

ជាការឆ្លើយតប ប្រទេសចិន បានបើកការស៊ើបអង្កេតករណីលក់បង្ខូចតម្លៃទីផ្សារលើស្រាអឺរ៉ុបរួចហើយ ជាពិសេសលើស្រាគោញាក់បារាំងតែម្ដង។ ប្រព័ន្ធផ្សព្វផ្សាយរដ្ឋចិន ក៏បានផ្តល់សញ្ញាដែរថា ក្រុងប៉េកាំង​ អាចនឹងសងសឹកវិញលើរថយន្ត និងសាច់ជ្រូករបស់អឺរ៉ុប។

រដ្ឋមន្ត្រីពាណិជ្ជកម្មចិន លោក វ៉ាង វិនថាវ (Wang Wentao) បានលើកឡើងថា សហភាពអឺរ៉ុប បានប្រើលេសផលិតកម្មឧស្សាហកម្មច្រើនហួសកម្រិត ការប្រកួតប្រជែងមិនយុត្តិធម៌ និងការចោទប្រកាន់ផ្សេងៗទៀត ដើម្បីបើកការស៊ើបអង្កេតលើរថយន្តអគ្គិសនី ផ្លូវដែក ថាមពលសូឡា ឧបករណ៍វេជ្ជសាស្ត្រ និងវិស័យផ្សេងទៀតរបស់ចិន ដែលកត្តាទាំងនេះបានបង្កើនហានិភ័យដែលអាចឈានទៅដល់ការផ្ទុះជម្លោះរវាងមហាយក្សចិន និងសហភាពអឺរ៉ុប។

ទន្ទឹមនេះ លោកបានជំរុញឱ្យសហភាពអឺរ៉ុប បោះចោលនូវគោលនយោបាយគាំពារនិយម ហើយងាកមកស្វែងរកកិច្ចសន្ទនា និងកិច្ចសហប្រតិបត្តិការជំនួសវិញ ដើម្បីទទួលបានដំណោះស្រាយឈ្នះឈ្នះ៕

ដោយ: តែម សុខុម