អត្រាអ្នកការងារធ្វើនៅសហរដ្ឋអាម៉េរិក ត្រូវបានគេវាយតម្លៃថា នឹងហក់ឡើងដល់៤,៥% នៅចុងឆ្នាំនេះ មានការកើនឡើងបន្តិចបើធៀបនឹងអត្រាបច្ចុប្បន្ន។
អាម៉េរិកដែលជាមហាអំណាចសេដ្ឋកិច្ចផុតលេខនៅលើពិភពលោក ត្រូវបានអ្នកជំនាញសេដ្ឋកិច្ចព្យាករថា នឹងសម្រេចបានកំណើន២,៣% នៅឆ្នាំ២០២៤ នេះ ហើយនឹងបន្តធ្លាក់ចុះដល់២% នៅឆ្នាំ២០២៥។ នេះបើយោងតាមការព្យាកររបស់អ្នកសេដ្ឋកិច្ច ដែលស្ទង់មតិដោយសារព័ត៌មាន Financial Times។
តាមរយៈលទ្ធផលនៃការស្ទង់មតិនេះបានបង្ហាញឱ្យឃើញថា សេដ្ឋកិច្ចអាម៉េរិក បានបង្ហាញពីទំនោរចុះខ្សោយ ខណៈកាលពីពេលកន្លងទៅមូលនិធិរូបិយវត្ថុអន្តរជាតិ (IMF) ព្យាករថា សហអាម៉េរិកនឹងសម្រេចបានកំណើនសេដ្ឋកិច្ចក្នុងរង្វង់២,៨% នៅឆ្នាំនេះ។
ការសិក្សាស្រាវជ្រាវថ្មីនេះ ក៏បានព្យាករផងដែរថា អត្រាអ្នកអត់ការងារធ្វើនៅសហរដ្ឋអាម៉េរិកនឹងហក់ឡើងដល់៤,៥% នៅចុងឆ្នាំនេះ មានការកើនឡើងបន្តិចបើធៀបនឹងអត្រាបច្ចុប្បន្ន ដែលមានក្នុងរង្វង់៤,២%។ ចំណែកសន្ទស្សន៍ចំណាយផ្ទាល់ខ្លួនរបស់ពលរដ្ឋម្នាក់ៗ ដែលជាស្នូលសំខាន់នៃរង្វាស់អតិផរណា ដែលជាក្តីកង្វល់របស់ធនាគារកណ្តាលអាម៉េរិក នឹងធ្លាក់ចុះពី២,៦% នៅខែកក្កដា មកនៅត្រឹម២,២% នៅចុងឆ្នាំ បើទោះបីអត្រាអតិផរណាកំពុងបោះជំហានឈានទៅរកគោលដៅ២% ក៏ដោយ។
ការបញ្ចេញរបាយការណ៍ព្យាករកំណើនសេដ្ឋកិច្ចរបស់អាម៉េរិកនេះ ធ្វើឡើងមុនមានការរំពឹងថា ធនាគារកណ្តាលអាម៉េរិក អាចនឹងបញ្ចុះអត្រាការប្រាក់ចន្លោះពី០,២៥% ទៅ០,៥០% នៅក្នុងអំឡុងខែកញ្ញានេះ។
អ្នកសេដ្ឋកិច្ចល្បីៗនៅសហរដ្ឋអាម៉េរិក៣៧នាក់ ដែលបានចូលរួមឆ្លើយសំណួរក្នុងការស្ទង់មតិរបស់សារព័ត៌មាន Financial Time ចន្លោះថ្ងៃទី១១ ដល់ថ្ងៃទី១៣ ខែកញ្ញា ពួកគេភាគច្រើនសុទ្ធតែមានទស្សនៈសុទិដ្ឋិនិយមថា ធនាគារកណ្តាលអាម៉េរិកនឹងកាត់បន្ថយអត្រាការប្រាក់ដោយផ្អែកលើសូចនាករសេដ្ឋកិច្ចដែលសហរដ្ឋអាម៉េរិកសម្រេចបានកន្លងមកនេះ។ តាមការរំពឹងទុកធនាគារកណ្តាលអាម៉េរិកនឹងប្រជុំគ្នាជាថ្មីម្តងទៀតនៅសប្តាហ៍ក្រោយ ដើម្បីសម្រេចចិត្តថា នឹងកាត់បន្ថយអត្រាការប្រាក់របស់ខ្លួន ដែលមានពី៥,២៥% ទៅ៥,៥% ឫយ៉ាងណា៕
ដោយៈ សរ សុជាតិ
