![វិស័យធនាគារ](https://cdn.cambonomist.com/media/images/chp12E44444.2e16d0ba.fill-960x540.jpg)
នៅឯវេទិកាធនាគារកណ្តាលមួយធ្វើឡើងនៅក្នុងទីក្រុងស៊ីនត្រា (Sintra) នៃប្រទេសព័រទុយហ្គាល់ ប្រធានធនាគារកណ្តាលអាម៉េរិក លោក ជើរ៉ូម ផៅវែល (Jerome Powell) បានថ្លែងថា ធនាគារកណ្ដាលអាម៉េរិក សម្រេចបានវឌ្ឍនភាពជាបណ្ដើរៗហើយក្នុងការកាត់បន្ថយអត្រាអតិផរណាឱ្យត្រលប់ទៅរកគោលដៅដែលបានកំណត់។
លោកបានបន្ថែមទៀតថា ធនាគារកណ្ដាលអាម៉េរិក ចង់ឃើញវឌ្ឍនភាពបន្ថែមទៀតនៅក្នុងការកាត់បន្ថយអតិផរណា ដើម្បីមានទំនុកចិត្តគ្រប់គ្រាន់ថា អតិផរណាកំពុងធ្លាក់ចុះជាលំដាប់ឆ្ពោះទៅដល់គោលដៅ២% មុននឹងខ្លួនចាប់ផ្ដើមដំណើរការបញ្ចុះអត្រាការប្រាក់ ឬបន្ធូរបន្ថយគោលនយោបាយ។
លោក ជើរ៉ូម ផៅវែល (Jerome Powell) បានលើកឡើងបែបនេះក្នុងវេទិកាជជែកដេញដោលមួយដែលមានការចូលរួមពីប្រធានធនាគារកណ្តាលអឺរ៉ុប (ECB) គឺលោកស្រី គ្រីស្ទីន ឡាហ្គាដ (Christine Lagarde) និងទេសាភិបាលធនាគារកណ្តាលប្រេស៊ីល គឺលោក រ៉ូបឺតូ កាំប៉ូស ណេតូ (Roberto Campos Neto)។
សូមបញ្ជាក់ថា វេទិកានេះត្រូវបានរៀបចំឡើងដោយធនាគារកណ្ដាលអឺរ៉ុប (ECB) ហើយការពិភាក្សាដេញដោលត្រូវបានសម្របសម្រួលដោយលោកស្រី សារ៉ា អ៊ីសែន (Sara Eisen) ពិធីការិនីមកពីសារព័ត៌មាន CNBC។
ការអត្ថាធិប្បាយរបស់លោក ជើរ៉ូម ផៅវែល (Jerome Powell) ធ្វើឡើង ស្របពេលដែលទីផ្សារនានាទូទាំងពិភពលោកកំពុងតាមដានយ៉ាងយកចិត្តទុកដាក់ចំពោះចំណាត់ការរបស់ធនាគារកណ្ដាលអាម៉េរិក និងចំណាត់ការរបស់បណ្ដាសមភាគីនៃធនាគារដ៏មានឥទ្ធិពលមួយនេះ ខណៈដែលធនាគារកណ្ដាលមួយចំនួនរួមទាំងធនាគារកណ្ដាលអឺរ៉ុប (ECB) ផងបានចាប់ផ្ដើមបញ្ចុះអត្រាការប្រាក់ជាបណ្ដើរៗ ហើយអតិផរណា ក៏កំពុងចាប់ផ្ដើមបង្ហាញសញ្ញាធូរស្រាល៕
ដោយ: តែម សុខុម