អាម៉េរិក ប្រកាសដាក់ទណ្ឌកម្មក្រុមហ៊ុនចិន ចំនួនពីរ ដែលផលិតអាវុធផ្គត់ផ្គង់ឱ្យរុស្ស៊ីធ្វើសង្គ្រាមនៅអ៊ុយក្រែន

ក្រោយទីក្រុងវ៉ាស៊ីនតោន បានចោទប្រកាន់ប្រទេសចិន ជាយូរមកហើយថា បានគាំទ្រកិច្ចខិតខំប្រឹងប្រែងធ្វើសង្រ្គាមរបស់រុស្ស៊ី ឈ្លានពានអ៊ុយក្រែន តាមរយៈការផ្គត់ផ្គង់ទំនិញប្រើប្រាស់ និងសមាសធាតុដែលអាចប្រើក្នុងការផលិតអាវុធ ដែលទីក្រុងប៉េកាំងបដិសេធនោះ នៅពេលនេះសហរដ្ឋអាម៉េរិក បានប្រកាសដាក់ទណ្ឌកម្មក្រុមហ៊ុនចិន ចំនួនពីររួមមានក្រុមហ៊ុន Xiamen Limbach Aircraft Engine និង ក្រុមហ៊ុន Redlepus Vector Industry Shenzhen។

តាមរយៈសេចក្តីប្រកាសរបស់ខ្លួន ក្រសួងរតនាគារអាម៉េរិក បានចោទប្រកាន់ក្រុមហ៊ុនចិនទាំងពីរនេះថា មានការពាក់ព័ន្ធដោយផ្ទាល់នៅក្នុងការផ្គត់ផ្គង់អាវុធដល់ទីក្រុងម៉ូស្គូ ខណៈក្រុមហ៊ុនទាំងពីរបានបដិសេធ ហើយអ្នកការទូតចិន ក៏មិនទទួលស្គាល់ការចោទប្រកាន់នេះ។ ក្រសួងនេះបានលើកឡើងថា ក្រុមហ៊ុនចិនទាំងនេះបានសហការជាមួយក្រុមហ៊ុនការពារជាតិរុស្ស៊ីក្នុងការផលិតយន្តហោះគ្មានមនុស្សបើកចម្ងាយឆ្ងាយរបស់ទីក្រុងម៉ូស្គូ។ យន្តហោះគ្មានមនុស្សបើកនេះត្រូវបានរចនា បង្កើត និងផលិតនៅក្នុងប្រទេសចិន មុនពេលបញ្ជូនទៅកាន់ប្រទេសរុស្ស៊ី ដើម្បីប្រើប្រាស់ក្នុងសមរភូមិដ៏ក្តៅគគុកនៅអ៊ុយក្រែន។

ប្រភពដដែលបាននិយាយថា យន្តហោះគ្មានមនុស្សបើក Garpiya ត្រូវបានដាក់ពង្រាយដោយរុស្ស៊ីនៅក្នុងសង្រ្គាមដ៏ឃោរឃៅរបស់ខ្លួនប្រឆាំងនឹងអ៊ុយក្រែន ដោយបានបំផ្លាញហេដ្ឋារចនាសម្ព័ន្ធសំខាន់ៗ និងបណ្តាលឱ្យមានអ្នកស្លាប់ និងរបួសយ៉ាងច្រើននាក់។

សេចក្តីថ្លែងការណ៍នេះបានចោទប្រកាន់ក្រុមហ៊ុន Xiamen Limbach Aircraft Engine ដែលមានមូលដ្ឋាននៅទីក្រុង Xiamen ថា បានផលិតម៉ាស៊ីនដ្រូនសម្រាប់ស៊េរី Garpiya ហើយបានចោទក្រុមហ៊ុន Redlepus Vector Industry Shenzhen ថា បានធ្វើការជាមួយក្រុមហ៊ុនការពារជាតិរុស្ស៊ី ដើម្បីជួយសម្រួលដល់ការដឹកជញ្ជូនយន្តហោះគ្មានមនុស្សបើកទៅកាន់ប្រទេសរុស្ស៊ី។

ពាក់ព័ន្ធនឹងការចោទប្រកាន់ក្រុមហ៊ុនទាំងពីរខាងលើ តំណាងផ្នែកលក់របស់ក្រុមហ៊ុន Xiamen Limbach Aircraft Engine បានបដិសេធថា ខ្លួនមិនបានផលិតម៉ាស៊ីនសម្រាប់យន្តហោះគ្មានមនុស្សបើក Garpiya និងនាំចេញផលិតផលរបស់ខ្លួនទៅប្រទេសរុស្ស៊ីនោះទេ។ ជាមួយគ្នានេះ ស្ថានទូតចិននៅទីក្រុងវ៉ាស៊ីនតោនបានបដិសេធការចោទប្រកាន់ចុងក្រោយនេះ ហើយបាននិយាយថា ប្រទេសចិនកំពុងដោះស្រាយការនាំចេញផលិតផលយោធាប្រកបដោយការទទួលខុសត្រូវ៕

ដោយៈ សរ សុជាតិ