វៀតណាម បានប្តេជ្ញានឹងធ្វើឱ្យកម្រិតអតិផរណារបស់ខ្លួនឱ្យស្ថិតក្នុងកម្រិតក្រោម៤,៥% នៅឆ្នាំនេះ។ ប្រទេសវៀតណាមដែលជាមជ្ឈមណ្ឌលផលិតកម្មដ៏ធំមួយនៅក្នុងតំបន់មួយបានរាយការណ៍ពីកំណើន GDP ជិត ៧% នៅក្នុងត្រីមាសទី២ ដោយបានកើនឡើងពីកម្រិត៥,៨% ក្នុងត្រីមាសទី១ ហើយបានកំណត់គោលដៅកំណើនចន្លោះពី៦,៥% ដល់ ៧% នៅត្រីមាសទី៣។
ទន្ទឹមនឹងការដាក់គោលដៅកំណើន GDP នេះ នាយករដ្ឋមន្ត្រីវៀតណាម លោក ផាម មិញជិញ បានអះអាងថា វៀតណាមនឹងផ្តោតលើការកែលម្អបរិយាកាសវិនិយោគរបស់ខ្លួន ដើម្បីសម្រួលដល់សកម្មភាពធុរកិច្ចក្នុងរយៈពេលប៉ុន្មានខែចុងក្រោយនៅឆ្នាំនេះ និងប្តេជ្ញាបន្តអនុវត្តគោលនយោបាយសារពើពន្ធឱ្យកាន់តែប្រសើរបន្ថែមទៀត។
ជាមួយនឹងការប្តេជ្ញខិតខំជំរុញបង្កើនការប្រើប្រាស់ក្នុងស្រុក និងការវិនិយោគសាធារណៈលើការអភិវឌ្ឍហេដ្ឋារចនាសម្ព័ន្ធ នាយករដ្ឋមន្ត្រីរូបនេះបានព្រមានថា ប្រាក់កម្ចីមិនដំណើរការនៅក្នុងប្រព័ន្ធធនាគារកំពុងមានការកើនឡើង ខណៈទីផ្សារអចលនទ្រព្យនៅតែប្រឈមមុខនឹងបញ្ហានៅឡើយ៕
អត្ថបទ៖ សុខ មង្គល
