តាមប្រភពព័ត៌មានរ៉យទ័របានឲ្យដឹងថា នៅថ្ងៃបិទបញ្ចប់ជំនួបកំពូលប្រទេសរីកចម្រើនខ្លាំង G20 ធ្វើនៅប្រទេសអ៊ីតាលី រយៈពេលពីរថ្ងៃ ពីថ្ងៃទី៣០ដល់៣១តុលា ក្រុមប្រទេសធំៗទាំង២០ បានសម្រេចរកឃើញកិច្ចព្រមព្រៀងអាកាសធាតុមួយប្រកបដោយមហិច្ឆតា ជាងកិច្ចព្រមព្រៀងអាកាសធាតុ ដែលគេធ្លាប់សម្រេចបាននៅក្នុងទីក្រុងប៉ារីស ប្រទេសបារាំងទៅទៀត។ ប្រមុខដឹកនាំនៃក្រុមប្រទេសមានសេដ្ឋកិច្ចរីកចម្រើនទាំង២០នេះ បានប្តេជ្ញា ដាក់កម្រិតលើការឡើងកម្តៅផែនដីត្រឹម ១,៥អង្សា ដោយគ្រប់ប្រទេសទាំងអស់សន្យានឹងបញ្ចេញសកម្មភាពច្បាស់លាស់ និងមានប្រសិទ្ធភាពជាងមុន។
យ៉ាងណាមិញ ការប្តេជ្ញាចិត្តនេះមិនត្រូវបានសកម្មជនបរិស្ថានសាទរនោះទេ។ មិនបានសាទរក៏ដោយសារតែពួកគេអះអាងថា មេដឹកនាំទាំង២០ បើមើលឲ្យបានដិតដល់ទៅ គឺមិនបានផ្តល់ការប្តេជ្ញាចិត្តជាក់លាក់ យកជាសាច់ការ ឬដុំកំភួននោះទេ គឺមានតែការសន្យា និង សន្យាដដែល ជាដដែល ថានឹងបញ្ចេញសកម្មភាពច្បាស់លាស់មួយ ប៉ុន្តែគេមិនដឹងថាជាសកម្មភាពអ្វី ហើយតាមការសន្យាលើកមុនៗ ក៏មិនដែលសម្រេចបានផ្លែផ្កាអ្វីដែរ។ អាកាសធាតុបន្តប្រែប្រួលពីមួយឆ្នាំទៅមួយឆ្នាំ ខណៈផែនដីបន្តឡើងកំដៅឥតស្រាកស្រាន្ដនៅឡើយ។
ក្រុមសកម្មជន និងអ្នកស្រលាញ់បរិស្ថានរាប់ពាន់នាក់ បានចេញមកតាមដងផ្លូវក្នុងទីក្រុងរ៉ូម ប្រទេសអ៊ីតាលី ជាទីដែលមេដឹកនាំប្រទេសទាំង២០កំពុងប្រជុំ ដើម្បីសំដែងការមិនពេញចិត្ត តវ៉ា និងទាមទារឲ្យប្រទេសធំៗទាំងអស់នេះ ចូលរួមជួយសង្គ្រោះផែនដី។
អត្ថបទគួរអាន
ដោយឡែក នៅក្នុងកិច្ចប្រជុំ ទោះមានការប្តេជ្ញាចិត្តថ្មីក៏ពិតមែន ប៉ុន្តែថ្នាក់ដឹកនាំកំពូលទាំងអស់នោះ នៅតែបន្តខ្វែងគំនិតគ្នាលើបញ្ហាមួយចំនួនដដែល។ ជាក់ស្តែង សមាជិកក្រុមប្រទេសG20 ជាច្រើន ដែលស្ថិតនៅក្នុងដំណាក់កាលផ្សេងៗគ្នា នៃការអភិវឌ្ឍន៍សេដ្ឋកិច្ច នៅតែមានការខ្វែងគំនិតគ្នា លើគោលដៅសំខាន់ទាក់ទងការកាត់បន្ថយការបំភាយឧស្ម័នផ្ទះកញ្ចក់ឲ្យដល់កម្រិតសូន្យនៅឆ្នាំ ២០៥០។
ប្រទេសធំៗទាំងនេះ នៅតែខ្វែងគំនិតគ្នា ដោយបាននិយាយរុញដាក់គ្នាទៅវិញទៅមក ថាអ្នកណាគួរធ្វើសកម្មភាពអ្វី អ្នកណាមិនគួរធ្វើអ្វី ហើយដោយមិនបានតាំងចិត្តរៀងៗខ្លួនបន្ថែមទៀត ដើម្បីបុព្វហេតុអាកាសធាតុពិភពលោកនោះឡើយ។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
