តើក្រុមមហាសេដ្ឋីរបស់ចិន ចាត់ចែងទុកដាក់ទ្រព្យសម្បត្តិរបស់ខ្លួននៅទីណាខ្លះ ក្រោយសេដ្ឋកិច្ចចិនកំពុងដាំក្បាលចុះ?

របាយការណ៍របស់ក្រុមហ៊ុនប្រឹក្សាយោបល់អចលនទ្រព្យពិភពលោក Knight Frank ដែលមានការិយាល័យកណ្ដាលនៅទីក្រុងឡុងដ៍ ប្រទេសអង់គ្លេស បានបង្ហាញថា ក្រុមមហាសេដ្ឋីរបស់ប្រទេសចិន ដែលម្នាក់ៗមានទ្រព្យសម្បត្តិយ៉ាងតិច៣០លានដុល្លារអាម៉េរិក ត្រូវបានព្យាករថា នឹងកើនឡើងខ្លាំងរហូតដល់ជិត៥០% ពីជិត១០ម៉ឺននាក់ គិតត្រឹមឆ្នាំ២០២៣ ឈានរហូតដល់ជិត១៤ម៉ឺន៥ពាន់នាក់នៅត្រឹមឆ្នាំ២០២៨។ នេះបើយោងតាមការចុះផ្សាយរបស់សារព័ត៌មាន CNBC។

របាយការណ៍ដដែលបង្ហាញទៀតថា ស្របពេលសេដ្ឋកិច្ចចិន កំពុងដាំក្បាលចុះ ខណៈដែលវិបត្តិក្នុងវិស័យអចលនទ្រព្យរបស់ប្រទេសនេះ ក៏មិនទាន់ធូរស្រាលនៅឡើយ មហាសេដ្ឋីចិនទាំងនេះ ​កំពុងបង្វែរមួយចំណែកធំនៃទ្រព្យសម្បត្តិរបស់ពួកគេក្រោមរូបភាពវិនិយោគលើទ្រព្យសកម្មអន្តរជាតិ និងការទិញអចលនទ្រព្យប្រណីតៗទាំងក្នុង និងក្រៅប្រទេសផងដែរ។

អ្វីដែលជាការគួរឱ្យកត់សម្គាល់ ទិន្នាការនេះបានធ្វើឱ្យទីផ្សារអចលនទ្រព្យប្រណីតនៅក្រុងសៀងហៃ កំពុងផ្ទុះខ្លាំង ដោយប្រតិបត្តិការទិញលក់ផ្ទះប្រណីត ដែលមានតម្លៃចាប់ពីជាង២,៧លានដុល្លារឡើងទៅបានកើនឡើងរហូតដល់៣៨% ក្នុងឆមាសទី១ ដើមឆ្នាំ២០២៤ នេះ។

របាយការណ៍ដដែលបានបង្ហាញទៀតថា ទន្ទឹមនឹងនេះ ក្រុមមហាសេដ្ឋីចិន ក៏កំពុងសម្រុកធ្វើពិពិធកម្មការវិនិយោគរបស់ពួកគេទៅលើរូបិយប័ណ្ណ ឥណទានឯកជន ភាគហ៊ុនឯកជន ប័ណ្ណបំណុល ឬប័ណ្ណរតនាគារអាម៉េរិក និងភាគហ៊ុននៅលើបណ្ដាផ្សារហ៊ុនអភិវឌ្ឍន៍ផងដែរ។

ការបង្វែរទ្រព្យសម្បត្តិមួយចំណែកធំដើម្បីវិនិយោគលើទ្រព្យសកម្មចម្រុះ ដែលកាន់តែមានសុវត្ថិភាពជាងមុនពីសំណាក់ក្រុមមហាសេដ្ឋីចិននេះ បានឆ្លុះបញ្ចាំងពីការឆ្លើយតបយ៉ាងប្រុងប្រយ័ត្នរបស់ពួកគេទៅនឹងបញ្ហាប្រឈមផ្នែកសេដ្ឋកិច្ច និងស្ថានភាពទីផ្សារពិភពលោក៕

​ ដោយ: តែម សុខុម