តើអ្នកណានឹងក្លាយជាជនទី១ នៃបក្សកុម្មុយនីស្តវៀតណាមបន្តពីលោក ឃ្វៀន ភូជុង?

លោក តូ ឡឹម ប្រធានាធិបតីវៀតណាមបច្ចុប្បន្ន ត្រូវបានគេមើលឃើញថា ជាឥស្សរជនដ៏លេចធ្លោ និងមានសក្តានុពលមួយរូប ក្នុងការក្លាយជាអគ្គលេខាធិការបក្សកុម្មុយនីសវៀតណាម បន្ទាប់ពីលោក ឃ្វៀន ភូជុង មេដឹកនាំដ៏មានឥទ្ធិពលបំផុតរបស់វៀតណាម ដែលបានទទួលមរណភាពកាលពីសុក្រ សប្តាហ៍មុន។ នៅក្នុងប្រព័ន្ធដឹកនាំនៅវៀតណាម ជនដែលមានអំណាចកំពូលរបស់ប្រទេស គឺអគ្គលេខា​ធិការបក្ស កុម្មុយនីស បន្ទាប់មកគឺប្រធានាធិបតី ប្រធានសភា និងនាយករដ្ឋមន្រ្តី ហើយនៅពេលនេះ សារព័ត៌មាន ធំៗ គឺបានសម្លឹងឃើញថា បេក្ខជនដែលអាចបន្តវេនទំនងជាលោក តូ ឡឹម ដែលជាជនលេខ២នៅក្នុងប្រទេស។

ក្រោយពេលលោក ភូជុង បានបង្រួបបង្រួមអំណាចទៅក្នុងដៃរបស់លោកក្នុងអំឡុងពេលកាន់តំណែង១៣ឆ្នាំ តាមរយៈការធ្វើឲ្យសសរស្តម្ភនៃអំណាចទាំង៤នៅក្រោមដៃរបស់ខ្លួន លោក តូ ឡឹម ត្រូវបានគេដឹងថា គឺជាជនដែលលេចធ្លោបំផុតហើយអាចជាអ្នកដែលមានឥទ្ធិពលនៅក្នុងការរួមដៃជាមួយនឹងលោក ជុង ដើម្បីសម្អាតអំពើពុករលួយ ហើយក៏អាចថា ជាការសម្អាតខ្សែបន្ទាត់នយោបាយនៅក្នុងប្រទេស។ លោក តូ ឡឹម ដែលជាមន្រ្តីផ្នែកសន្តិសុខសាធារណៈដ៏ជំនាញហើយបានធំធាត់រហូតក្លាយជារដ្ឋមន្រ្តី រហូតមានការគាំទ្រឲ្យក្លាយជាប្រធានាធិបតី គឺជាតារាដែលកំពុងរះនៅក្នុងបក្ស។

លោក ឃ្វៀន ខាច់ យ៉ាង ( Nguyen Khac Giang) អ្នកស្រាវជ្រាវនៅវិទ្យាស្ថាន Iseas-Yusof Ishak ដែលមានមូលដ្ឋាននៅសិង្ហបុរី បានមានលើកឡើងថា វៀតណាមកំពុងស្ថិតក្នុងអំឡុងពេលមិនច្បាស់លាស់នៃការផ្លាស់ប្តូរភាពជាអ្នកដឹកនាំ។ លោកបានអះអាងថា លោកប្រធានាធិបតី តូ ឡឹម ដែលត្រូវបានតែងតាំងជាអ្នកដឹកនាំបក្សបណ្តោះអាសន្នកាលពីពេលថ្មីៗ គឺជាអ្នកនាំមុខមួយរូបក្នុងការស្នងតំណែងពីលោក ភូជុង នៅក្នុងមហាសន្និបាតបក្សដែលគេគ្រោងនឹងធ្វើឡើងនៅឆ្នាំ២០២៦ ខាងមុខ។ លោកជឿជាក់ថា លោក តូ ឡឹម ដែលកាន់តំណែងពីរក្នុងពេលដំណាលគ្នានឹងនាំឱ្យមានការព្រួយបារម្ភបន្ថែមទៀតជុំវិញការបង្រួបបង្រួមអំណាចនៅវៀតណាមបន្តទៀត។

លោក ភូជុង ត្រូវបានគេស្គាល់ថា ជាមេដឹកនាំដ៏មានឥទ្ធិពលបំផុតរបស់វៀតណាម បន្ទាប់ពីលោក ហូជីមិញ បានបូជាជីវិតមក។ លោក ភូជុង បានក្លាយជាអគ្គលេខាធិកាបក្សកុម្មុយនីស្តវៀតណាម តាំងពីឆ្នាំ២០១១ ហើយបានក្លាយជាប្រធានាធិបតី នៅចន្លោះឆ្នាំ២០១៨ ដល់ឆ្នាំ២០២១ ដោយបានដើរតួនាទីយ៉ាងសំខាន់នៅក្នុងការទាក់ទាញវិនិយោគបរទេសរាប់ពាន់លានដុល្លារពីក្រុមហ៊ុននានាជុំវិញពិភពលោក ។ លោក បានក្លាយជាតំណភ្ជាប់ដ៏សំខាន់នៅក្នុងខ្សែច្រវាក់ផ្គត់ផ្គង់សម្រាប់ក្រុមហ៊ុនដូចជា Apple និង Samsung ជាដើម។

លោក ភូជុង ក៏ជាស្ថាបនិកនាំឱ្យមានតុល្យភាពទំនាក់ទំនងរវាងទីក្រុងហាណូយជាមួយប្រទេសមហាអំណាចពិភពលោក ដោយរក្សាទំនាក់ទំនងជិតស្និទ្ធជាមួយសហរដ្ឋអាមេរិក ចិន និងរុស្ស៊ី។ លោកបានបង្រួបបង្រួមទំនាក់ទំនងជាមួយអតីតសត្រូវរបស់វៀតណាម គឺសហរដ្ឋអាម៉េរិក តាមរយៈការធ្វើឱ្យប្រសើរឡើងនូវទំនាក់ទំនងរវាងប្រទេសទាំងពីរទៅជាភាពជាដៃគូយុទ្ធសាស្ត្រគ្រប់ជ្រុងជ្រោយដែលជាកម្រិតខ្ពស់បំផុតនៃទំនាក់ទំនងការទូត៕

ដោយៈ សរ សុជាតិ