«ការផ្តល់កម្ចីសង្វាក់ផលិតកម្ម
និងគម្រោងអភិវឌ្ឍន៍វារីវប្បកម្មសម្រាប់និរន្តរភាពពាណិជ្ជកម្មនៅកម្ពុជា»
គឺជាប្រធានបទនៃការចុះ MOU រវាងគ្រឹះស្ថានមីក្រូហិរញ្ញវត្ថុ
អេ អឹម ខេ ជាមួយអង្គការ World Vision នៃគម្រោងអភិវឌ្ឍន៍វារីវប្បកម្មសម្រាប់និរន្តរភាពពាណិជ្ជកម្មនៅកម្ពុជា(ខាស់)
នៅថ្ងៃទី៧ កុម្ភៈ ឆ្នាំ២០២១។
លោក គា បូរាណ បានលើកឡើងថា តាមរយៈ MOU នេះ វានឹងជួយសម្រួលដល់វារីវប្បករក្នុងការទទួលបានប្រាក់កម្ចី សម្រាប់ពង្រីកអាជីវកម្មក្នុងវិស័យវារីវប្បកម្មនៅកម្ពុជា។ សម្រាប់ MOU ដែលមានសុពលភាពរយៈពេល២ឆ្នាំនេះ នឹងផ្តោតសំខាន់លើការពង្រឹង និងអភិវឌ្ឍន៍សហគ្រាសធុនតូច និងធុនមធ្យម។
«ដើម្បីលើកកម្ពស់វិស័យវារីវប្បកម្មនៅកម្ពុជា អេ អឹម ខេ បានបង្កើតភាពជាដៃគូជាមួយគម្រោងអភិវឌ្ឍន៍វារីវប្បកម្ម សម្រាប់និរន្តរភាពពាណិជ្ជកម្មនៅកម្ពុជារបស់អង្គការទស្សនៈពិភពលោកក្នុងការផ្តល់ជូនសេវាហិរញ្ញវត្ថុ ដើម្បីឲ្យតួអង្គនីមួយៗ ដែលជាម្ចាស់អាជីវកម្មក្នុងវិស័យវារីវប្បកម្មទទួលបានទុនបន្ថែមយកទៅពង្រីកអាជីវកម្មរបស់ពួកគេ»។ នេះជាការលើកឡើងរបស់លោក គា បូរាណ។
លោកសង្ឃឹមថា ភាពជាដៃនេះនឹងជួយអភិវឌ្ឍន៍ វិស័យវារីវប្បកម្មនៅកម្ពុជាឲ្យកាន់តែរីកចម្រើនថែមមួយកម្រិតទៀត។ ជាពិសេសជួយបង្កើនផលិកកម្មត្រីនៅក្នុងស្រុក និងកាត់បន្ថយការនាំចូលពីក្រៅប្រទេស។ បន្ថែមលើនេះ វានឹងជួយលើកកម្ពស់សេដ្ឋកិច្ចកសិករ និងសេដ្ឋកិច្ចកម្ពុជាឲ្យកាន់តែប្រសើរឡើង។
លោក គា បូរាណ សង្កេតឃើញថា វិស័យកសិកម្មជាវិស័យមួយ ដែលមានដំណើរល្អជាងគេ ស្របពេលវិស័យផ្សេងៗបានរងផលប៉ះពាល់ដោយសារវិបត្តិកូវីដ-១៩។ ប៉ុន្តែ លោកអះអាងថា វិស័យកសិកម្មមានហានិភ័យខ្ពស់ជាងវិស័យនានា ក្នុងការទទួលបានសេវាហិរញ្ញវត្ថុ។
ថ្នាក់ដឹកនាំ អេ អឹម ខេ រូបនេះអះអាងថា គោលបំណងតែមួយគត់ដែល អេ អឹម ខេ ចុះ MOU ជាមួយអង្គការទស្សនៈពិភពលោក គឺចង់ឲ្យវិស័យវារីវប្បកម្មនៅកម្ពុជាមានការរីកចម្រើន។ នេះជាមូលហេតុដែលមីក្រូហិរញ្ញវត្ថុមួយនេះចាប់ដៃគូជាមួយ World Vision ដែលមានទស្សនវិស័យដូចគ្នាជាមួយ អេ អឹម ខេ និងមានបទពិសោធន៍ បច្ចេកទេសខ្ពស់ក្នុងវិស័យវារីវប្បកម្ម។
ជាមួយគ្នានេះលោក ឡេង វីរៈ នាយកប្រតិបត្តិការ នៃអង្គការទស្សនៈពិភពលោក បានចាត់ទុកវិបត្តិកូវីដ-១៩ ជាឱកាសសម្រាប់កម្ពុជាក្នុងការពង្រឹងសមត្ថភាព និងផ្សព្វផ្សាយពីសមិទ្ធផលក្នុងស្រុក ពិសេសលើវិស័យកសិកម្ម និងវារីវប្បកម្ម។
បើតាមលោក វីរៈ ក្នុងមួយថ្ងៃប្រជាពលរដ្ឋអាចចំណាយ២០ភាគរយលើការទិញត្រីលើការចំណាយប្រចាំថ្ងៃ ដូច្នេះ បើកម្ពុជាអាចបំលែងការចំណាយទៅលើការទិញត្រីនៅក្រៅប្រទេសមកធ្វើជាចំណួល នឹងជួយឲ្យសេដ្ឋកិច្ចកម្ពុជាកាន់តែរីកចម្រើន។
គួររំលឹកថា គម្រោងខាស់ គឺជានាយកដ្ឋានមួយដែលទទួលបានការឧបត្ថម្ភថវិកាពីនាយកដ្ឋានស្បៀងអាហារ និងកសិកម្មអាមេរិក ដើម្បីពន្លឿនផលិតកម្មត្រី ដែលមានតម្រូវការខ្ពស់សម្រាប់ទីផ្សារប្រទេសកម្ពុជា និងអភិវឌ្ឍនិរន្តរភាពឧស្សាហកម្មវារីវប្បកម្ម។៕
