ការប្រកាសក្ស័យធននៅអាម៉េរិក កើនឡើង១៨%ក្នុងឆ្នាំ២០២៣ ហើយអាចនឹងកើនឡើងទៀតក្នុងឆ្នាំ២០២៤

ម្ចាស់អាជីវកម្ម ឬអ្នកបណ្តាក់ទុនដែលបានសម្រេចចិត្តការដាក់ពាក្យប្រកាសក្ស័យធននៅសហរដ្ឋអាម៉េរិក បានកើនឡើង១៨%ក្នុងឆ្នាំ២០២៣ កន្លងទៅដោយសារអត្រាការប្រាក់ឡើងកាន់តែខ្ពស់។ នេះបើតាមសេចក្តីរាយការណ៍របស់សារព័ត៌មានធំៗ ។

យោងតាមទិន្នន័យពី អ៊ីភីក អេអេស៊ីអ៊ីអា (Epiq AACER) ដែលជាស្ថាប័នផ្ដល់ទិន្នន័យក្ស័យធនបង្ហាញថា ឯកសារប្រកាសក្ស័យធនសរុបបានកើនឡើងដល់ជាង៤៤ម៉ឺន៥ពាន់ច្បាប់ ខណៈដែលក្នុងឆ្នាំ២០២២ គឺមានត្រឹមតែជិត៣៨ម៉ឺនច្បាប់ប៉ុណ្ណោះ។

ស្ថិតិបានសង្កត់ធ្ងន់ថា ពលរដ្ឋអាម៉េរិក ដែលបានមកដាក់ពាក្យក្ស័យធននៅចុងឆ្នាំបានស្ទុះឡើងខ្លាំងបំផុត ដោយនៅក្នុងខែធ្នូ មានជាង៣ម៉ឺន៧ពាន់ច្បាប់ ហើយដល់ខែវិច្ឆិកា ២០២៣ មានប្រមាណជា៣ម៉ឺន៤ពាន់ច្បាប់។

ផ្អែកតាមលក្ខខណ្ឌសេដ្ឋកិច្ច និងបញ្ហាគួបផ្សំនានា អ្នកវិភាគបានបង្ហាញទុទិដ្ឋិនិយមថា ស្ថិតិនៃការប្រកាសក្ស័យធនក្នុងឆ្នាំ២០២៤ នឹងអាចបន្តកើនឡើងបន្ថែមទៀត ទោះបីជាចំនួនអ្នកមកប្រកាសដាក់ពាក្យក្ស័យធននេះវាមិនច្រើនដល់ទៅជិត៧៦ម៉ឺនសហគ្រាស ដែលបានប្រកាសនៅអំឡុងវិបត្តិកូវីដ-១៩ ក៏ដោយចុះ។

លោក ម៉ៃឃើល ហាន់ធ័រ ( Michael Hunter) អនុប្រធានស្ថាប័ន អ៊ីភីក អេអេស៊ីអ៊ីអា (Epiq AACER) បាននិយាយថា ដូចដែលបានរំពឹងទុក ឯកសារប្រកាសការក្ស័យធនថ្មីៗក្នុងឆ្នាំ២០២៣ មានចំនួនកើនឡើងច្រើនជាងឆ្នាំ២០២២។

លោកក៏បានយល់ស្របដែរចំពោះការរំពឹងថា ចំនួនអ្នកមកដាក់ពាក្យក្ស័យធននឹងបន្តកើនឡើងនៅក្នុងឆ្នាំ២០២៤នេះ ដោយសារតែពលរដ្ឋត្រូវប្រឈមមុខនឹងបញ្ហាជាច្រើនរួមមានទាំងការចំណាយកាន់តែខ្ពស់លើអត្រាការប្រាក់ និងការកើនឡើងនៃកម្រិតបំណុលគ្រួសារនៅសង្គមអាម៉េរិក ផងដែរ។

តាមស្ថិតិពីធនាគារកណ្ដាលអាម៉េរិក សាខាក្រុងញូវយ៉ក បង្ហាញថា ទំហំនៃបំណុលគ្រួសារសរុបដែលពលរដ្ឋអាម៉េរិក កំពុងតែប្រឈមនៅពេលនេះបានកើនឡើងដល់ជាង១៧ទ្រីលានដុល្លារ៕

ដោយៈ សរ សុជាតិ