លោក ចាងប៉េង ចាវ (Changpeng Zhao) សហស្ថាបនិកក្រុមហ៊ុន Binance ដែលជាក្រុមហ៊ុនគ្រប់គ្រងសេវាកម្មប្តូរ និងទូទាត់ប្រាក់សម្រាប់ជំនួញហិរញ្ញវត្ថុថ្មី ដែលគេហៅថា គ្រីបតូខឺរិនស៊ី ត្រូវបានតុលាការនៅទីក្រុងសេអាថល (Seattle) សហរដ្ឋអាម៉េរិក កាត់ទោសដាក់ពន្ធនាគារ៤ខែពីបទពាក់ព័ន្ធនឹងការលាងលុយតាមប្រតិបត្តិការរបស់ក្រុមហ៊ុន Binance។
សារព័ត៌មានហិរញ្ញវត្ថុធំៗបានរាយការណ៍ថា ទោះបីលោក ចាវ ដែលជាអតីតនាយកប្រតិបត្តិរបស់ក្រុមហ៊ុន Binance ត្រូវជាប់ពន្ធនាគារក៏ពិតមែន ប៉ុន្តែលោកនៅតែបន្តបង្កើនទ្រព្យសម្បត្តិតម្លៃ៣៣ពាន់លានដុល្លាររបស់លោកបន្តទៀតនៅក្នុងរយៈពេលជាប់ពន្ធនាគារនេះ។ លោក ចាវ បានសារភាពពាក់ព័ន្ធនឹងបទចោទប្រកាន់របស់តុលាការក្រុងសេអាថល ប៉ុន្តែភាគហ៊ុនក្រុមហ៊ុន Binance នៅតែប្រសើរ ហើយត្រូវគេព្យាករថា នឹងបន្តកើនឡើងបន្ថែមទៀតនៅក្នុងអំឡុងពេលដែលលោកជាប់ពន្ធនាគារ។
ក្រោយពេលដែលលោកបានសារភាព អ្នកនាំពាក្យក្រុមហ៊ុន Binance បាននិយាយនៅក្នុងសេចក្តីថ្លែងការណ៍ថា ស្ថានភាពក្រុមហ៊ុននៅតែបន្តសកម្មភាពជាប្រក្រតី ហើយក្រុមហ៊ុន ក៏កាន់តែយកចិត្តទុកដាក់បន្ថែមទៀតនៅលើប្រព័ន្ធសុវត្ថិភាព ក៏ដូចជាការគ្រប់គ្រងប្រឆាំងនឹង ការលាងលុយកខ្វក់។ ទំហំលុយកខ្វក់ ដែលលោក ចាវ បានជាប់ទាក់ទងគឺមានទំហំទឹកប្រាក់ប្រមាណជា៤ពាន់៣រយលានដុល្លារ ហើយក្រោយរឿងអាស្រូវនេះផ្ទុះឡើង លោកបានបង្ហាញពីការទទួលខុសត្រូវ និងបានលាលែងពីតំណែងជានាយកប្រតិបត្តិរបស់ក្រុមហ៊ុន កាលពីខែវិច្ឆិកា ឆ្នាំ២០២៣។
មកដល់ពេលនេះ លោក ចាវ មានអាយុត្រឹមតែ៤៧ឆ្នាំប៉ុណ្ណោះ ប៉ុន្តែលោកត្រូវបានទស្សនាវដ្តី Forbes អះអាងថា គឺជាកំពូលមហាសេដ្ឋីលំដាប់ពិភពលោកវ័យក្មេងមួយរូប។ លោក ចាវ ត្រូវបានគេដឹងថា បានចាកចេញពីចិន ទៅរស់នៅកាណាដា នៅអាយុ១២ ឆ្នាំ ហើយបានធំធាត់នៅទីនោះជាមួយនឹងគ្រួសារដែលមានឪពុកម្តាយជាអតីតគ្រូបង្រៀន នៅក្នុងប្រទេសចិន។ លោកធ្លាប់មានប្រវត្តិធ្វើការនៅផ្សារហ៊ុននៅជប៉ុន ហើយក៏ធ្លាប់មករកស៊ីនៅប្រទេសចិន មួយរយៈកាលពីឆ្នាំ២០០៥ផងដែរ។ លោកបានចាប់ផ្តើមចាប់អារម្មណ៍នឹងប្រតិបត្តិការការទូទាត់ cryptocurrency នៅឆ្នាំ២០១៣ រួចក៏បានសហការជាមួយនឹងដៃគូបង្កើត Binance ឡើងនៅក្នុងឆ្នាំ២០១៧៕
ដោយៈ សរ សុជាតិ
