ការចុះអនុស្សរណៈនៃការយោគយល់គ្នានេះ បានធ្វើឡើងនាថ្ងៃទី១ ខែមិថុនា ឆ្នាំ២០២២ក្រោមអធិបតីភាពរបស់ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល និងឯកឧត្តម វ៉ាង វិនធៀន ឯកអគ្គរដ្ឋទូតវិសាមញ្ញានិងពេញសមត្ថភាព នៃសាធារណរដ្ឋប្រជាមានិតចិនប្រចាំកម្ពុជា។
ដ្បិតថា សព្វថ្ងៃស្ថានភាពនៃការរាតត្បាតជំងឺកូវីដ១៩ នៅកម្ពុជា បានធូរស្បើយខ្លាំង ក៏ពិតមែន តែសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅតែបន្តជំរុញឲ្យប្រជាពលរដ្ឋកម្ពុជា ចាក់វ៉ាក់សាំងដូសជំរុញឲ្យបានគ្រប់ៗគ្នា ដើម្បីឲ្យមានភាពស៊ាំក្នុងសហគមន៍ និងទប់ស្កាត់ការឆ្លងរាលដាលជាថ្មីម្ដងទៀត ពិសេសសម្ដេចជំរុញឲ្យពន្លឿនការបង្កើតរោងចក្រវេចខ្ចប់វ៉ាក់សាំងកូវីដ១៩នៅកម្ពុជាផងដែរ។
ទន្ទឹមនឹងការជំរុញឲ្យប្រជាពលរដ្ឋទៅចាក់វ៉ាក់សាំងដូសជំរុញ សម្ដេចតេជោ ក៏បានបញ្ជាក់ផងដែរថា អំពីការចុះហត្ថលេខារវាងរាជរដ្ឋាភិបាលកម្ពុជា និងរាជរដ្ឋាភិបាលចិន ដើម្បីទិញវ៉ាកសាំងដើម្បីវេចខ្ចប់ក្នុងប្រទេសកម្ពុជា ជាង១០៤លានដូសបន្ថែម ដើម្បីត្រៀមសម្រាប់ចាក់ជូនប្រជាពលរដ្ឋរយៈពេល ៣ឆ្នាំ គឺចាប់ពី ឆ្នាំ២០២៤-២០២៦។
អត្ថបទគួរអាន
ដោយឡែក សម្រាប់ឆ្នាំ២០២២ និងឆ្នាំ២០២៣ សម្ដេច ហ៊ុន សែន ក៏បានគូសបញ្ជាក់ដែរថា កម្ពុជា នៅតែបន្តប្រើប្រាស់វ៉ាក់សាំងដែលមានស្រាប់នៅក្នុងឃ្លាំងសរុបប្រមាណជាង២០លានដូស តាមរយៈការបញ្ជាទិញនិងជំនួយពីប្រទេសដទៃ។ ក្នុងនោះ វ៉ាក់សាំងមួយចំនួនដែលមិនទាន់ដឹកមកកម្ពុជា មានដូចជា សាធារណៈរដ្ឋប្រជាមានិតចិន ជាង១៥លានដូស,ប្រទេសសហរដ្ឋអាមេរិក ជាង៥លាន៥សែនដូស,ប្រទេសអូស្ត្រាលី ៥០ម៉ឺនដូស។ សម្ដេចបានបញ្ជាក់បន្ថែមថា សម្រាប់ចំនួនវ៉ាក់សាំងដែលមានស្រាប់នេះ គឺអាចឲ្យកម្ពុជា មានលទ្ធភាពគ្រប់គ្រាន់ក្នុងការផ្ដល់វ៉ាក់សាំងជូនពលរដ្ឋកម្ពុជា សម្រាប់ឆ្នាំ២០២២ និងឆ្នាំ២០២៣។
សូមបញ្ជាក់ថា គិតត្រឹមថ្ងៃទី២ មិថុនា ឆ្នាំ២០២២ កម្ពុជា មានអ្នកឆ្លងកូវីដ១៩ សរុបជង១៣ម៉ឺននាក់ និងមានអ្នកស្លាប់ដោយសារកូវីដ១៩ ប្រមាណ៣ពាន់នាក់។ ខណៈចំនួនប្រជាពលរដ្ឋដែលបានចាក់វ៉ាក់សាំងបង្ការកូវីដ១៩គ្រប់ដូសវិញ មានចំនួនជាង១៥លាននាក់ ស្មើនឹង៩៤%នៃប្រជាជនសរុប១៦លាននាក់។ ដោយឡែក បច្ចុប្បន្ន នារយៈចុងក្រោយនេះ កម្ពុជា បានទទួលនូវភាពជោគជ័យក្នុងការទប់ស្កាត់ការឆ្លងរាលដាលជំងឺកូវីដ១៩ និងបានបើកសង្គម និងសេដ្ឋកិច្ច កម្ពុជា ជាធម្មតាឡើងវិញផងដែរ។ ជាកស្ដែងរយៈពេលជិត១ខែ មកហើយ ដែលកម្ពុជា គ្មានករណីឆ្លងកូវីដ១៩ថ្មីនោះទេ។ នេះបើយោងតាមរបាយការណ៍របស់ក្រសួងសុខាភិបាលកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
