រដ្ឋាភិបាលកាណាដាបារម្ភថា ការធ្វេសប្រហែលនឹងនាំឱ្យមានហានិភ័យខ្ពស់ នៅពេលដែលភាពតានតឹងផ្នែកហិរញ្ញវត្ថុរបស់អ្នកខ្ចីឈានដល់កម្រិតលែងអាចគ្រប់គ្រងបាន បន្ទាប់ពីមានការដំឡើងអត្រាការប្រាក់ដោយធនាគារកណ្ដាលកាណាដា។
និយតករហិរញ្ញវត្ថុរបស់ប្រទេសកាណាដាកំពុងជំរុញឱ្យធនាគារនានាដោះស្រាយហានិភ័យបង្កឡើងដោយការពង្រីករយៈពេលសងរំលស់កម្ចីទិញផ្ទះឱ្យទាន់ពេលវេលា។ ការជំរុញនេះបានកើតឡើងនៅពេលដែលអ្នកខ្ចីជាច្រើនកំពុងព្យាយាមដោះស្រាយបញ្ហាតម្លៃប្រាក់កម្ចីទិញផ្ទះដែលកើនកាន់តែខ្ពស់ បន្ទាប់ពីមានការដំឡើងអត្រាការប្រាក់គួរឱ្យភ្ញាក់ផ្អើលដោយធនាគារកណ្ដាលកាណាដាកាលពីសប្តាហ៍មុន។
ការិយាល័យនិយ័តករហិរញ្ញវត្ថុកាណាដា (OSFI) បានគូសបញ្ជាក់អំពីក្ដីបារម្ភចំពោះការកើនឡើងនៃហានិភ័យនៅក្នុងចំណោមធនាគារកាណាដា ខណៈដែលធនាគារកណ្តាលរបស់ប្រទេសនេះបានចាត់វិធានាការដំឡើងអត្រាការប្រាក់ឡើងវិញ បន្ទាប់ពីការផ្អាកដំឡើងអស់រយៈពេល ៤ ខែ។ ធនាគារកណ្តាលប្រទេសកាណាដាបានដំឡើងអត្រាការប្រាក់ដល់កម្រិតខ្ពស់បំផុត បើគិតក្នុងរយៈពេល ២២ ឆ្នាំកន្លងទៅ គឺឈានដល់អត្រា ៤,៧៥% ហើយអ្នកវិភាគកំពុងសង្ស័យថានឹងមានការដំឡើង ០,២៥% ទៀត នៅខែក្រោយ។
អត្ថបទគួរអាន
ធនាគារធំៗជាច្រើនរបស់កាណាដាបានអនុញ្ញាតឲ្យអ្នកដែលបង់រំលស់កម្ចីទិញផ្ទះតាមអត្រាអថេរ អាចពង្រីករយៈពេលបង់រំលស់របស់ពួកគេបាន ដើម្បីរក្សាការបង់រំលស់ឱ្យនៅកម្រិតដដែល។ ការណ៍នេះជួយសម្រួលបន្ទុកចំណាយលើបំណុលដែលមានចំនួនច្រើនជាបណ្តោះអាសន្ន ប៉ុន្តែវាបន្ថែមហានិភ័យចំពោះអ្នកខ្ចីនៅពេលក្រោយ។
និយតករបាននិយាយនៅក្នុងសេចក្តីថ្លែងការណ៍មួយដែលផ្ញើមកទីភ្នាក់ងារសារព័ត៌មានរើយធើថា និយ័តករហិរញ្ញវត្ថុកាណាដារំពឹងថានឹងមានវិធីសាស្ត្រគ្រប់គ្រងគណនីដ៏ប្រុងប្រយ័ត្ននិងសកម្មជាងមុន រួមទាំងវិធីដោះស្រាយបញ្ហាបង់រំលស់មិនសមស្រប និងការទទួលស្គាល់ហានិភ័យខ្ពស់នៃប្រាក់កម្ចីទាំងនេះផង។ និយ័តករបានបន្តថា ការងារទាំងនេះគួរតែត្រៀមនិងត្រូវធ្វើឱ្យបានមុនពេលដែលភាពតានតឹងផ្នែកហិរញ្ញវត្ថុក្នុងចំណោមអ្នកខ្ចី ឈានដល់កម្រិតលែងអាចគ្រប់គ្រងបាន។
និយតករហិរញ្ញវត្ថុនៃប្រទេសកាណាដាបានព្រមានកាលពីខែមេសាថា ទោះបីជាការកែសម្រួលសម្រាប់រយៈពេលខ្លីសំដៅពង្រីកថេរវេលាបង់រំលស់កម្ចីទិញផ្ទះជួយសម្រាលបន្ទុកអ្នកខ្ចីក៏ដោយ ក៏វានឹងធ្វើឱ្យពួកគេជាប់បំណុលកាន់តែយូរ។
យោងតាមទីភ្នាក់ងារលំនៅដ្ឋានរបស់ប្រទេសកាណាដា CMHC, ប្រហែលជា ៥០% នៃអ្នកខ្ចីនៅដើមឆ្នាំ ២០២២ បានជ្រើសរើសយកកម្ចីទិញផ្ទះ ដោយទាញយកអត្ថប្រយោជន៍ពីអត្រាការប្រាក់ទាបរបស់ធនាគារកណ្តាល និងការបញ្ចុះតម្លៃរបស់ធនាគារដែលផ្តល់កម្ចី។ ប៉ុន្តែនៅខែមករា ឆ្នាំ២០២៣នេះ មានតែជិត ១៧% នៃអ្នកខ្ចីប៉ុណ្ណោះ ដែលជ្រើសរើសយកកម្ចីទិញផ្ទះដែលមានអត្រាប្រែប្រួល។
អ្នកវិភាគនៅក្រុមហ៊ុន ដេហ្សាដាំង (Desjardins) លោក រ៉យស៍ មេនដេស (Royce Mendes) បានកត់សម្គាល់ឃើញថា នៅក្នុងត្រីមាសទី១ ឆ្នាំ២០២៣ ធនាគារកាណាដាធំៗទាំង៦ មានច្រើនជាង ២០% នៃឥណទានផ្ទះរបស់ពួកគេ ដែលត្រូវសងត្រលប់ក្នុងរយៈពេលលើសពី ៣០ ឆ្នាំ។ អត្រានេះកើនឡើងលើសពីឆ្នាំមុន១០ដង។ វាជាលទ្ធផលនៃប្រាក់កម្ចីដែលមានអត្រាអថេរ ហើយបានក្លាយជាកម្ចីមិនរំលស់ ពោលគឺកម្ចីដែលតម្រូវឱ្យសងប្រាក់ដើមទាំងអស់តែមួយគ្រា និងសងការប្រាក់ក្នុងរយៈពេលកំណត់មួយ។ លោក មេនដេស កត់សម្គាល់បន្ថែមថា ក្នុងពេលជាមួយគ្នានេះ អ្នកជាប់កម្ចីដែលមានអត្រាប្រែប្រួល កំពុងប្រឈមមុខនឹងការទូទាត់សំណងច្រើនជាងមុនយ៉ាងតិច ៣០% ដើម្បីបន្តបង់រំលស់ទៅតាមកាលវិភាគដើមរបស់ពួកគេ ហើយជាលទ្ធផល អ្នកខ្លះអាចនឹងជ្រើសយកការពន្យារថេរវេលាបង់សំណងកាន់តែយូរជាង៣០ឆ្នាំទៅទៀត៕
ដោយ ៖ ឯម មាឃ
