នេះបើយោងតាមការស្ទង់មតិធ្វើឡើងដោយមជ្ឈមណ្ឌលគ្រប់គ្រង និងការពារជំងឺឆ្លងរបស់អាមេរិក (CDC) ដែលទើបចេញផ្សាយថ្មីៗនេះ។ ខណៈដែលនៅតំបន់អឺរ៉ុបវិញ គឺមានប្រជាជនចន្លោះពី ៦០ ទៅ៨០ភាគរយ នៃចំនួនប្រជាជនសរុប ក៏បានឆ្លងកូវីដ១៩ផងដែរ។
ការស្ទង់មតិរបស់មជ្ឈមណ្ឌលគ្រប់គ្រង និងការពារជំងឺឆ្លងអាមេរិក ដែលបានបង្ហាញថា មានប្រជាជនអាមេរិក ១៩០លាននាក់ ឬស្មើនឹងជិត៦០% នៃប្រជាជនសរុប បានឆ្លងកូវីដ១៩នោះ គឺតួលេខនេះ មានខ្ពស់ជាងឆ្ងាយ បើធៀបនឹងចំនួនករណីឆ្លងកូវីដ១៩សរុប ដែលបានកត់ត្រាជាក់លាក់ដោយរដ្ឋាភិបាលអាមេរិកមានត្រឹមតែជាង ៨០លាននាក់ប៉ុណ្ណោះ។
របាយការណ៍ពីការស្ទង់មតិដដែលនេះបានឲ្យដឹងទៀតថា ក្នុងចំណោមអ្នកឆ្លងកូវីដ១៩នៅអាមេរិក គឺប្រហែល ៧៥% នៃមនុស្សដែលមានអាយុក្រោម ១៨ ឆ្នាំ គឺបានឆ្លងកូវីដ១៩។ ចំនួននេះមានការកើនឡើងយ៉ាងខ្លាំងក្នុងអំឡុងពេល កូវីដ អូមីក្រុង ឆ្លងរាតត្បាត កាលពីរដូវរងារ។ បច្ចុប្បន្នសហរដ្ឋអាមេរិក កំពុងផ្តល់ការចាក់វ៉ាក់សាំងដូសទី៤ដល់មនុស្សដែលមានអាយុចាប់ពី ៥០ ឆ្នាំឡើងទៅ ព្រមទាំងចាក់ដូសទី៣ ដល់មនុស្សដែលមានអាយុក្រោមនោះផងដែរ។ ហើយកុមារអាយុក្រោម៥ ឆ្នាំ គឺជាក្រុមតែមួយគត់ ដែលមិនទាន់មានសិទ្ធិទទួលការចាក់វ៉ាក់សាំង។
គូសបញ្ជាក់ថា សហរដ្ឋអាមេរិក ទោះបីជាមានការកើនឡើងការសម្រាកព្យាបាលនៅមន្ទីរពេទ្យក៏ដោយ ក៏ចំនួនអ្នកស្លាប់ដោយសារកូវីដ១៩កំពុងបន្តធ្លាក់ចុះ ហើយបច្ចុប្បន្នមានអ្នកស្លាប់ត្រឹមតែជាង ៣០០ នាក់ប៉ុណ្ណោះក្នុងមួយថ្ងៃ។ ប្រទេសនេះត្រូវបានគេរំពឹងថានឹងឈានដល់ដំណាក់កាលដ៏អាក្រក់នៃការស្លាប់មួយលាននាក់ក្នុងប៉ុន្មានសប្តាហ៍ខាងមុខនេះ។
អត្ថបទគួរអាន
ដោយឡែក នៅខាងតំបន់អឺរ៉ុបឯណោះវិញ គណៈកម្មការអឺរ៉ុបបាននិយាយថា មានចន្លោះពី ៦០% ទៅ ៨០% នៃចំនួនប្រជាជនសហភាពអឺរ៉ុបសរុប ត្រូវបានគេប៉ាន់ប្រមាណថា បានឆ្លងមេរោគ កូវីដ-១៩។ រដ្ឋាភិបាលសហភាពអឺរ៉ុបមានផែនការបង្កើនការចាក់ថ្នាំបង្ការជំងឺកូវីដ-១៩ ដល់កុមារផងដែរ។ ជាងនេះទៀត ស្នងការសុខាភិបាលសហភាពអឺរ៉ុបលោកស្រី ស្ទេឡា គីយ៉ាកឃីដេស (Stella Kyriakides) បានប្រាប់សន្និសីទសារព័ត៌មានមួយថា គេបានប៉ាន់ប្រមាណថាចន្លោះពី ៦០% ទៅ ៨០% នៃចំនួនប្រជាជនសហភាពអឺរ៉ុបរហូតមកដល់ពេលនេះបានឆ្លងមេរោគកូវីដ-១៩។
យ៉ាងណាក៏ដោយចុះ បើមើលទៅលើតួលេខកត់ត្រាជាក់ស្ដែងវិញ គឺមកទល់ពេលនេះ មានប្រហែលតែ៣០% នៃប្រជាជនសហភាពអឺរ៉ុបសរុបប៉ុណ្ណោះដែលបានឆ្លងកូវីដ១៩ ប៉ុន្ដែ ការប៉ាន់ប្រមាណថា អ្នកឆ្លងមានដល់៨០%នោះ គឺដោយសារគឺជឿថា មានករណីឆ្លងកូវីដ១៩ជាច្រើនមិនបានរាយការណ៍នោះទេ ពោលគឺចំនួនសរុបអាចមានអ្នកឆ្លងដល់ទៅជិត៨០% ឬស្មើនឹងជាង៣៥០លាននាក់៕
អត្ថបទ៖ ម៉ុន សុកែវ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
