នៅថ្ងៃពុធសប្ដាហ៍នេះ សហភាពអឺរ៉ុបបានអនុម័តទណ្ឌកម្មថ្មីប្រឆាំងនឹងបេឡារុស្ស ដែលបានគាំទ្រកាឈ្លានពានរបស់រុស្ស៊ីលើអ៊ុយក្រែន ដោយបានហាមឃាត់ការនាំចេញទំនិញពីប្រទេសនេះប្រហែល ៧០% មិនឲ្យនាំចូលទៅកាន់សហភាពអឺរ៉ុប ក្រោមហេតុផលថា ប្រទេសនេះបានចូលដៃចូលជើងជាមួយរុស្ស៊ីក្នុងការចូលឈ្លានពានប្រទេសអ៊ុយក្រែន។
ការដាក់ទណ្ឌកម្មនេះ បានកើតឡើងបន្ទាប់ពីប្រទេសបេឡារុស្ស បានអនុញ្ញាតឱ្យទាហានរុស្ស៊ីផ្លាស់ទីចូលទៅក្នុងអ៊ុយក្រែន ដោយឆ្លងកាត់ទឹកដីរបស់ខ្លួន ក៏ដូចជាការផ្លាស់ប្តូររដ្ឋធម្មនុញ្ញក្នុងប្រទេសខ្លួន ដើម្បីអនុញ្ញាតឱ្យមានការដាក់ពង្រាយជាអចិន្ត្រៃយ៍នៃកងកម្លាំងរុស្ស៊ី និងអាវុធនុយក្លេអ៊ែរនៅលើដីក្នុងប្រទេសផងដែរ។ វិធានការក្នុងការដាក់ទណ្ឌកម្មទៅកាន់ប្រទេសបេឡារុស្សរបស់សហភាពអឺរ៉ុបរួមបញ្ចូលទាំងការដាក់ទណ្ឌកម្មសេដ្ឋកិច្ចថ្មី និងការចុះបញ្ជីដាក់ទណ្ឌកម្មសមាជិកជាន់ខ្ពស់នៃយោធាបេឡារុស្សចំនួន ២២រូប ដែលពាក់ព័ន្ធនឹងការឈ្លានពានប្រឆាំងនឹងអ៊ុយក្រែន។
តាមរយៈទណ្ឌកម្មសេដ្ឋកិច្ចទាំងនេះ បានប៉ះពាល់ដល់ការនាំចេញរបស់បេឡារុស្សទៅកាន់សហភាពអឺរ៉ុប និងការនាំចេញគ្រឿងចក្ររបស់សហភាពអឺរ៉ុបទៅកាន់បេឡារុស្សផងដែរ។
អត្ថបទគួរអាន
មន្ត្រីជាន់ខ្ពស់សហភាពអឺរ៉ុបបាននិយាយថា ប្រទេសបេឡារុស្សធ្លាប់ទទួលទណ្ឌកម្មកាលពីពេលមុនរួចមកហើយពីសំណាក់សហភាពអឺរ៉ុប ហើយឥឡូវនេះបានបន្ថែមទណ្ឌកម្មមួយកម្រិតទៀត ដែលគ្របដណ្តប់ជិត ៧០% នៃការនាំចេញរបស់ប្រទេសនេះទៅកាន់សហភាពអឺរ៉ុប ឬស្មើនឹងតម្លៃជាទឹកប្រាក់ប្រហែលជាង៦ពាន់៥រយលានដុល្លារអាមេរិក។ ក្នុងនោះ វិស័យដែលរងផលប៉ះពាល់ខ្លាំងជាងគេ គឺ ស៊ីម៉ងត៍ កៅស៊ូ និងឥន្ធនៈ ដែលមិនអាចនាំចូលក្នុងទីផ្សារសហភាពអឺរ៉ុបបាន។
សូមជម្រាបថា នៅក្រោមទណ្ឌកម្មថ្មី សហភាពអឺរ៉ុបក៏នឹងបញ្ឈប់ការនាំចេញទៅកាន់ប្រទេសបេឡារុសនូវផលិតផលមួយចំនួនផងដែរ ដូចជាគ្រឿងចក្រដ៏ធំ ដែលអាចប្រើប្រាស់សម្រាប់គោលបំណងយោធាជាដើម។ ក្នុងចំណោមផលិតផលដែលត្រូវបានដាក់ទណ្ឌកម្មថ្មីដោយសហភាពអឺរ៉ុបនោះ មានបច្ចេកវិជ្ជាទំនើបដែលរួមមានកុំព្យូទ័រ អេឡិចត្រូនិក ទូរគមនាគមន៍ ឧបករណ៍ចាប់សញ្ញា និងឡាស៊ែរជាដើម។ ទោះជាយ៉ាងណាក្តី ធនាគារបេឡារុស្សមិនទាន់ត្រូវបានដកចេញពីប្រព័ន្ធទូទាត់អន្តរជាតិ SWIFT ដូចការដាក់ទណ្ណកម្មទៅកាន់ប្រទេសរុស្ស៊ីនៅឡើយទេ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
