ជម្លោះពាណិជ្ជកម្មសកលកាន់តែរីកធំឡើង ខណៈសង្គ្រាមនៅអ៊ុយក្រែនបានឆ្លងផុត២ឆ្នាំ

ការកើនឡើងនូវភាពតានតឹងផ្នែកភូមិសាស្ត្រនយោបាយរួមទាំងនៅមជ្ឈិមបូព៌ា និងការព្រួយបារម្ភពីសន្តិសុខសេដ្ឋកិច្ច កំពុងនាំឱ្យមានទណ្ឌកម្ម ការទប់ស្កាត់ពាណិជ្ជកម្ម និងសញ្ញានៃការបែកបាក់គ្នាកាន់តែខ្លាំងរវាងប្រទេសដែលគាំទ្ររុស្ស៊ី និងប្រទេសដែលគាំទ្រអ៊ុយក្រែន។

អង្គការពាណិជ្ជកម្មពិភពលោក (WTO) ដែលរៀបចំសន្និសីទថ្នាក់រដ្ឋមន្ត្រីរៀងរាល់ពីរឆ្នាំម្ដងដើម្បីពិភាក្សាពីច្បាប់ពាណិជ្ជកម្មសកលនៅសប្តាហ៍ក្រោយនោះ បានព្រមានជាមុនថា ការបែកបាក់ជាប្លុកប្រជែងគ្នាចំនួន២ នឹងធ្វើឱ្យសេដ្ឋកិច្ចពិភពលោកធ្លាក់ចុះ៥% ដោយបានធ្វើឱ្យប្រទេសកំពុងអភិវឌ្ឍន៍រងការឈឺចាប់ជាងគេបំផុត។

នៅក្នុងសេណារីយ៉ូដ៏ធ្ងន់ធ្ងរនេះ សហរដ្ឋអាមេរិក និងប្រទេសចិនព្រមទាំងសម្ព័ន្ធមិត្តរៀងៗខ្លួននឹងត្រូវចូលរួមក្នុងសង្រ្គាមពាណិជ្ជកម្មទ្វេភាគី ហើយប្លុកនីមួយៗនឹងកំណត់ច្បាប់ទម្លាប់របស់ពួកគេដោយមិនយកចិត្តទុកដាក់លើកិច្ចព្រមព្រៀងពហុភាគីអ្វីទៀតឡើយ។

បច្ចុប្បន្នពួកគេនៅមិនទាន់ឈានដល់ចំណុចនោះនៅឡើយទេ ប៉ុន្តែក្រុមអ្នកសេដ្ឋកិច្ចរបស់អង្គការ WTO បានបង្ហាញថា ចាប់តាំងពីការឈ្លានពានរបស់រុស្ស៊ីក្នុងខែកុម្ភៈ ឆ្នាំ២០២២ មក ប្លុកទាំងពីរនេះកំពុងតែឃ្លាតដាច់ចេញពីគ្នាកាន់តែខ្លាំងឡើងៗ។

ក្រុមសេដ្ឋវិទូបាននិយាយក្នុងរបាយការណ៍ថា ពួកគេបានរកឃើញភស្តុតាងដំបូងនៃនិន្នាការឆ្ពោះទៅរកការចងសម្ព័ន្ធកាន់តែខ្លាំងឡើងរវាងរំហូរពាណិជ្ជកម្ម និងទំនាក់ទំនងភូមិសាស្ត្រនយោបាយចាប់តាំងពីការចាប់ផ្តើមនៃសង្រ្គាមនៅអ៊ុយក្រែន ដែលជាការបង្ហាញពីសញ្ញាដំបូងនៃការបែកបាក់គ្នានៅក្នុងពាណិជ្ជកម្មពិភពលោក៕

អត្ថបទ៖ សុខ ជា