ឥណ្ឌូនេស៊ីទទួលបានសំណើរសុំវិនិយោគពីក្រុមហ៊ុនយក្សTesla របស់អាមេរិក

ឥណ្ឌូនេស៊ី គឺជាប្រទេសផលិតសារធាតុនីកែល ធំជាងគេបំផុតនៅលើពិភពលោក។ សារធាតុនីកែល ជាវត្ថុធាតុដើមសំខាន់មួយ សម្រាប់ផលិតជាអាគុយ EV ដើម្បីប្រើសម្រាប់រថយន្តដែលដើរដោយថាពលអគ្គិសនីដូចជាTesla នេះជាដើម។ 

កន្លងមករដ្ឋាភិបាលប្រទេសនេះ បានព្យាមយាមទាក់ទាញ និងជំរុញឲ្យក្រុមហ៊ុនយក្សអាមេរិក Tesla ធ្វើការវិនិយោគនៅក្នុងប្រទេស ដើម្បីជួយអភិវឌ្ឍមហិច្ឆតានៃផែនការឧស្សាហកម្មខ្នាតធំរបស់ខ្លួន។

ជាក់ស្តែងពេលនេះ ខាងក្រុមហ៊ុនអាមេរិកបានដាក់សំណើរមកឥណ្ឌូនេស៊ីរួចហើយ រង់ចាំតែការជួបពិភាក្សាគ្នាបន្ថែមទៀតប៉ុណ្ណោះ។​ មន្ត្រីជាន់ខ្ពស់នៃក្រសួងរ៉ែ និងថាមពលបានឲ្យដឹងថា ភាគីឥណ្ឌូនេស៊ី គ្រោងជួបពិភាក្សា និងស្តាប់ការពន្យល់បន្ថែមពីខាងក្រុមហ៊ុន Tesla នៅសប្តាហ៍ក្រោយតាមរយៈប្រព័ន្ធVideo Conferences។ 

គួររំឮកថា កាលពីឆ្នាំ២០២០កន្លងទៅ ឥណ្ឌូនេស៊ីបានសម្រេចផ្អាកការនាំចេញសារធាតុនីកែលរបស់ខ្លួនទៅក្រៅប្រទេស គោលបំណងដើម្បីពង្រឹងខ្សែសង្វាក់ផលិតកម្មក្នុងស្រុក នឹងគ្រោងកែច្នៃនីកែលដែលខ្លួនមានជាលោហធាតុ និងផលិតជាអាគុយ ដើម្បីបំពេញតម្រូវការរថយន្តអគ្គិសនី ដែលកំពុងមានការពេញនិយមខ្លាំងនៅជុំវិញពិភពលោក៕