បើតាមសេចក្តីជូនដំណឹងរបស់ក្រុមហ៊ុន ASF Sporting Good Co.,Ltd នាថ្ងៃទី២៥ ខែកញ្ញាឆ្នាំ២០២៣ បានបង្ហាញថា ដោយសារវិបត្តិសេដ្ឋកិច្ចសាកល និងបញ្ហាសង្គ្រាមរវាងរស្ស៊ី និងអ៊ុយក្រែនដែលកំពុងកើតមាននាពេលបច្ចុប្បន្ននេះ បានធ្វើនាំឱ្យរោងចក្រខ្លួនមិនមានការបញ្ជទិញ ហើយក្រុមហ៊ុនក៏អស់លទ្ធភាពក្នុងការរង់ចាំការបញ្ជាទិញពីភ្ញៀវតទៅទៀតដែរ។ ដូច្នេះហើយ ក្រុមហ៊ុន ASF Sporting Good Co.,Ltd នឹងបិទដំណើរការរោងចកក្ររបស់ខ្លួនទាំងស្រុងចាប់ពីថ្ងៃទី១ ខែតុលា ឆ្នាំ២០២៣ខាងមុខនេះតទៅ។ ជុំវិញបញ្ហានេះ ឯកឧត្តម វ៉ី សំណាង អភិបាលខេត្តកំពង់ស្ពឺ បានគូសបញ្ជាក់ថា ការប្រកាសបិទរបស់រោងចក្រនេះ គឺដោយសារក្រុមហ៊ុនមិនទទួលបានការបញ្ជាទិញ ដូចនេះហើយក្រុមហ៊ុនមិនមានលទ្ធភាពគ្រប់គ្រាន់ក្នុងការបើកប្រាក់ខែឱ្យកម្មករកម្មការិនី និងបុគ្គលិកបន្តទៀតបាន។
អភិបាលខេត្តកំពង់ស្ពឺរូបនេះ បានសង្កត់ធ្ងន់ថា ការបោះទុនរកស៊ីរបស់វិនិយោគិនបរទេសនៅកម្ពុជា គឺពួកគេតែងតែត្រូវការប្រាក់ចំណេញត្រឡប់ទៅវិញ ក៏ប៉ុន្តែនៅពេលដែលមានការខាតបង់នោះ ប្រាកដណាស់ពួកគេនឹងត្រឡប់ទៅវិញ។ បើតាមថ្នាក់ដឹកនាំខេត្តកំពង់ស្ពឺរូបនេះ រោងចក្រដែលបានប្រកាសឈប់ដំណើរការនេះ មានកម្មករនិយោជិតកំពុងបម្រើការងារសរុបប្រមាណ ២៦៤នាក់។
អត្ថបទគួរអាន
ទោះបីមានរោងចក្រខ្លះបានប្រកាសបិទដំណើរការអាជីវកម្មរបស់ខ្លួនក៏ពិតមែន ប៉ុន្តែឯកឧត្តម វ៉ី សំណាង ក៏បានបញ្ជាក់ឱ្យដឹងដែរថា នៅក្នុងខេត្តកំពង់ស្ពឺនាពេលបច្ចុប្បន្ន ក៏មានរោងចក្រមួយចំនួនបានបង្កើតថ្មីៗជាបន្តបន្ទាប់ផងដែរ ខណៈរោងចក្រទាំងនោះក៏កំពុងមានតម្រូវការកម្មករកម្មការិនីប្រមាណជាង ៥០០០នាក់បន្ថែមទៀត។ ដូច្នេះហើយកម្មករកម្មការិនីដែលកំពុងធ្វើការនៅក្នុងរោងចក្រ ដែលបានប្រកាសបិទទ្វារនៅខែតុលាខាងមុខនេះ ពួកគាត់អាចបន្តការងារនៅក្នុងរោងចក្រថ្មីៗ ដែលកំពុងមានតម្រូវការកម្លាំងពលកម្មនាពេលបច្ចុប្បន្ននេះបាន។
បើតាមរបាយការណ៍ពីក្រសួងការងារ បច្ចុប្បន្នខេត្តកំពង់ស្ពឺមានកម្មករនិយោជិតកំពុងបម្រើការងារសរុបជាង១៥ម៉ឺននាក់ ដែលផ្តល់ចំណូលគិតជាប្រាក់ឈ្នួលសរុបប្រមាណ ៤៧០លានដុល្លារក្នុងមួយឆ្នាំៗ នៅតាមរោងចក្រ-សហគ្រាសចំនួន ៣៨៥។ ក្នុងនោះ សម្រាប់វិស័យកាត់ដេរមានចំនួន១៩១ រោងចក្រ និងប្រើកម្លាំងកម្មករនិយោជិតសរុបជិត១៤ម៉ឺននាក់ ផ្តល់ប្រាក់ឈ្នួលសរុបជាង ៤៣០លានដុល្លារក្នុងមួយឆ្នាំ។
សូមបញ្ជាក់ថា នៅឆមាសទី១ឆ្នាំ២០២៣ ការនាំចេញផលិតផលវាយនភណ្ឌសម្លៀកបំពាក់ ស្បែកជើង និងផលិតផលធ្វើដំណើររបស់កម្ពុជា បានធ្លាក់ចុះជិត២០% បើធៀបនឹងរយៈពេលដូចគ្នាកាលពីឆ្នាំមុន ដោយសារការធ្លាក់ចុះនៃការបញ្ជាទិញ ដែលបណ្តាលមកពីបញ្ហាសេដ្ឋកិច្ចសកលធ្លាក់ចុះ និងវិបត្តិសង្គ្រាមនៅអ៊ុយក្រែន។ នេះបើយោងតាមប្រធានសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា៕
