បុគ្គលិកក្នុងវិស័យធនាគារ និងហិរញ្ញវត្ថុជាង៦ម៉ឺននាក់ត្រូវបានផ្អាកពីការងារនៅឆ្នាំ២០២៣ តើវាជាបញ្ហាដ៏អាក្រក់សម្រាប់ពិភពលោកឬ?

យ៉ាងហោចណាស់មានបុគ្គលិកបម្រើការងារនៅក្នុងធនាគារ និងហិរញ្ញវត្ថុជិត៦ម៉ឹន២ពាន់នាក់នៅក្នុងឆ្នាំ២០២៣ ត្រូវបានធនាគារចំនួន២០ទៅទូទាំងពិភពលោកផ្អាកការងារ និងបញ្ឈប់ ដោយសារបញ្ហាសេដ្ឋកិច្ច។ នេះបើតាមការចុះផ្សាយដោយទស្សនាវដ្តី ហ្វាយណាន់សល ថាមស៍ (Financial Time) ដែលបានបន្ថែមថា ស្ថាប័នធនាគារទាំងនេះ គឺមានតាំងពីធនាគារនៅស្វីស អាម៉េរិក កាណាដា អូស្រ្តាលី និងហូឡង់ជាដើម។

បើតាមការចុះផ្សាយរបស់ទស្សនាវដ្តីនេះ គ្រាន់តែធនាគារ យូប៊ីអេស/ក្រេឌីតស្វីស (UBA/Credit Suisse) ដែលជាស្ថាប័នហិរញ្ញវត្ថុនៅស្វីស ដែលរងការរង្គោះរង្គឺកន្លងមក បានកាត់បន្ថយបុគ្គលិកច្រើនជាងគេ គឺមានរហូតដល់ទៅ១ម៉ឺន៣ពាន់នាក់ រីឯធនាគារ វែល ហ្វាហ្គោ (Well Fargo) ដែលមានមូលដ្ឋាននៅអាម៉េរិក គឺបានកាត់បន្ថយបុគ្គលិកប្រមាណ១ម៉ឺន២ពាន់នាក់។

លោក លី ថេកឃ័រ ( Lee Thacker) ម្ចាស់ក្រុមហ៊ុនសេវាហិរញ្ញវត្ថុ ស៊ីលវើម៉ាញ ផាណ័រ (Silvermine Partners)បាននិយាយថា ធនាគារមួយចំនួនកំពុងស្ថិតក្នុងស្ថានភាពមិនមានស្ថិរភាព គ្មានការវិនិយោគ និងគ្មានកំណើន ខណៈធនាគារមួយចំនួនទៀតទំនងជាអាចកាត់បន្ថយការងារបន្ថែមទៀត។

ដោយឡែក លោក សឺជីអូ អេមូទី ( Sergio Ermotti ) នាយកប្រតិបត្តិធនាគារយូប៊ីអេស/ក្រេឌីតស្វីស បានលើកឡើងថា ធនាគារទាំងមូលនៅសល់បុគ្គលិកត្រឹមតែប្រមាណ១១ម៉ឺន៦ពាន់នាក់ប៉ុណ្ណោះ ប៉ុន្តែនៅក្នុងឆ្នាំ២០២៤ ធនាគារអាចនឹងពង្រឹងជំហរឡើងវិញ។

សម្រាប់ធនាគារ វែល ហ្វាហ្គោ វិញ នៅពេលនេះនៅសល់បុគ្គលិកត្រឹមតែ២៣ម៉ឺននាក់ ប៉ុន្តែគ្រាន់តែប្រាក់ខែ គឺធនាគារត្រូវចំណាយរហូតដល់ទៅ១៨៦លានដុល្លារនៅក្នុងត្រីមាសទី៣កន្លងមក។ ក្រៅពីធនាគារធំៗទាំងពីរខាងលើ ធនាគារ១៨ផ្សេងទៀត គឺបានកាត់បន្ថយបុគ្គលិកពី១ពាន់នាក់រហូតដល់៥ពាន់នាក់៕

ដោយៈ សរ សុជាតិ