ធនាគារពិភពលោកបានអះអាងថា នៅឆ្នាំ ២០២២ អសន្តិសុខស្បៀងសកលបានប៉ះពាល់ដល់មនុស្សច្រើនជាងឆ្នាំ ២០១៩ ទៅទៀត ដោយសារតែជំងឺរាតត្បាតកូវីដ១៩, ការប្រែប្រួលអាកាសធាតុ, ជម្លោះភូមិសាស្ត្រនយោបាយ និងការរំខានដល់ខ្សែសង្វាក់ផ្គត់ផ្គង់។ កត្តាទាំងនេះនាំឱ្យតម្លៃម្ហូបអាហារកើនឡើង។ នៅឆ្នាំ២០២៣នេះ ឥណ្ឌូនេស៊ីដែលជាប្រធានប្តូរវេនអាស៊ាន បានចាប់យកបញ្ហាសន្តិសុខស្បៀងនេះគឺជាមូលបទសំខាន់ប្រចាំឆ្នាំ ។ នេះបើតាម សេចក្តីរាយការណ៍របស់ទីភ្នាក់ងារសារព័ត៌មាន Antara ។
ប្រភពដដែលបានអះអាងថា ប្រជាជនសរុបចំនួន ៣៤៥ លាននាក់ នៅក្នុងប្រទេសចំនួន ៨២ ត្រូវបានគេអះអាងថា បានកំពុងរងផលប៉ះពាល់ពីអសន្តិសុខស្បៀងជាសាកលក្នុងឆ្នាំ ២០២២ ខណៈដែលកាលពីឆ្នាំ២០១៩ មានប្រជាពលរដ្ឋតែ ១៣៥ លាននាក់ និងប្រទេសតែ ៥៣ប៉ុណ្ណោះ ដែលបានរងគ្រោះ។
ធនាគារពិភពលោកក៏បានកត់សម្គាល់ផងដែរថា គ្រោះរាំងស្ងួតធ្ងន់ធ្ងរដែលបង្កឡើងដោយបាតុភូត អែលនីណូ និងការប្រែប្រួលអាកាសធាតុ បានបង្កើនការប្រឈមមុខនឹងការខូចផលដំណាំ និងភាពអត់ឃ្លាន សម្រាប់ប្រជាជនដែលរស់នៅក្នុងអនុតំបន់សាហារ៉ាអាហ្វ្រិក អាស៊ីខាងត្បូង និងបណ្តាប្រទេសអាស៊ីអាគ្នេយ៍។ មកដល់ពេលនេះពលរដ្ឋប្រហែល ៨០ ភាគរយនៃចំនួនប្រជាជនពិភពលោកកំពុងប្រឈមមុខនឹងហានិភ័យខ្ពស់បំផុតនៃអសន្តិសុខស្បៀងក្នុងប្រទេសទាំងនោះ។ ក្រសួងការបរទេសឥណ្ឌូនេស៊ីបានរាយការណ៍ថា មកទល់ពេលនេះ អតិផរណាជាមធ្យមក្នុងបណ្តាប្រទេសអាស៊ីអាគ្នេយ៍បានឈានដល់ ១៥ ភាគរយ ដែលជាអត្រាខ្ពស់បំផុត។
អត្ថបទគួរអាន
អ្នកវិភាគបានអះអាងថា អាស្រ័យហេតុនេះ ការដោះស្រាយបញ្ហាអសន្តិសុខស្បៀងក្នុងគ្រាមានវិបត្តិបានក្លាយជារបៀបវារៈមួយដ៏សំខាន់នៃការធ្វើជាប្រធានអាស៊ានរបស់ប្រទេសឥណ្ឌូនេស៊ីនៅឆ្នាំនេះ ខណៈដែលមូលបទសំខាន់របស់អាស៊ាន គឺផ្តោតលើភាពសំខាន់របស់អាស៊ានក្នុងនាមជាចំណុចកណ្តាលនៃកំណើន។ ក្នុងនាមជាប្រធានប្ដូរវេនរបស់អាស៊ាន ឥណ្ឌូណេស៊ីកំពុងស្វែងរកកិច្ចសហប្រតិបត្តិការ ដែលរួមបញ្ចូលគ្នារវាងសន្តិសុខថាមពល ស្ថិរភាពហិរញ្ញវត្ថុ សុខភាព និងសន្តិសុខស្បៀង។
នៅឆ្នាំ២០២៣នេះ បណ្តាប្រទេសអាស៊ានបានពិភាក្សាអំពីវឌ្ឍនភាពនៃសេចក្តីប្រកាសរបស់មេដឹកនាំអាស៊ានស្តីពីការពង្រឹងសន្តិសុខស្បៀងនិងអាហារូបត្ថម្ភក្នុងគ្រាមានវិបត្តិនៅឯកិច្ចប្រជុំក្រុមប្រឹក្សាសន្តិសុខស្បៀងអាស៊ាន (AFSRB) លើកទី ៤៣។ យោងតាមសេចក្តីប្រកាសនោះ បណ្តាប្រទេសអាស៊ីអាគ្នេយ៍នឹងបង្កើតបណ្តាញកិច្ចសហប្រតិបត្តិការក្នុងចំណោមវិស័យកសិកម្ម ពាណិជ្ជកម្ម ហិរញ្ញវត្ថុ និងស្ថាប័នពាក់ព័ន្ធនឹងការដឹកជញ្ជូននៅក្នុងតំបន់ ដើម្បីពង្រឹងសន្តិសុខស្បៀង។ កិច្ចសហការនេះក៏នឹងមានបំណងជំរុញខ្សែសង្វាក់ផ្គត់ផ្គង់ក្នុងតំបន់ និងលើកកម្ពស់ការធ្វើកសិកម្មប្រកបដោយនិរន្តរភាពផងដែរ។
សូមបញ្ជាក់ថា បណ្ដាមេដឹកនាំនៃប្រទេសសមាជិកអាស៊ាននឹងចូលរួមក្នុងកិច្ចប្រជុំកំពូលអាស៊ានលើកទី ៤៣ ដែលគ្រោងធ្វើនៅទីក្រុងហ្សាកាតាក្នុងខែកញ្ញាឆ្នាំ ២០២៣។ ពេលនោះ មេដឹកនាំត្រូវបានគេរំពឹងថានឹងឯកភាពគ្នាលើសេចក្ដីថ្លែងការណ៍មួយទាក់ទងនឹងសន្តិសុខស្បៀង ដែលជាអាទិភាពមួយក្នុងចំណោមលទ្ធផលរំពឹងទុកផ្នែកសេដ្ឋកិច្ចរបស់អាស៊ាន៕
