មន្ត្រីជាន់ខ្ពស់ក្រសួងពាណិជ្ជកម្មបង្ហាញគន្លឹះអភិវឌ្ឍន៍អាជីវកម្មដល់យុវជន

ថ្លែងក្នុងពិធីបើកកម្មវិធី«វេទិកាយុវជនឆ្ពោះទៅកាន់អាជីវកម្ម» នៅថ្ងៃទី២៨ ខែតុលា ឆ្នាំ២០២៣ ឯកឧត្តម បួន សារៈមុនី រដ្ឋលេខាធិការក្រសួងពាណិជ្ជកម្ម បានវាយតម្លៃខ្ពស់ ចំពោះសមាគមនិស្សិតវិទ្យាសាស្ត្រសេដ្ឋកិច្ច និងពាណិជ្ជកម្មអន្តរជាតិ (AIESEC) ដែលបានគិតគូរនិងផ្តួចផ្តើមរៀបចំកម្មវិធីនេះឡើង និងលើកទឹកចិត្តឱ្យបន្តរៀបចំវេទិកាបែបនេះជាប្រចាំ ដើម្បីផ្ដល់ជាវេទិកាសម្រាប់យុវជនក្នុងការស្វែងយល់អំពីភាពជាសហគ្រិន ការអភិវឌ្ឍអាជីវកម្ម និងភាពជាអ្នកដឹកនាំ ក៏ដូចជាផ្តល់ឱកាសឱ្យពួកគេស្វែងរកនូវជម្រើសការងារល្អៗក្នុងវិស័យអាជីវកម្ម និងសិក្សារៀនសូត្រអំពីវិស័យផ្សេងៗ រួមទាំងតួនាទីការងារក្នុងពេលអនាគតផងដែរ។

ឯកឧត្តមរដ្ឋលេខាធិការ បានចាត់ទុកថា ការរៀបចំវេទិកានេះ បានចូលរួមចំណែកយ៉ាងសំខាន់ក្នុងការអនុវត្តគោលនយោបាយ និងយុទ្ធសាស្រ្តនានារបស់រាជរដ្ឋាភិបាល ជាពិសេសយុទ្ធសាស្ត្របញ្ចកោណដំណាក់កាលទី១ ដែលរាជរដ្ឋាភិបាលទើបដាក់ចេញកាលពីពេលថ្មីៗ។

ឯកឧត្តមរដ្ឋលេខាធិការ បានបញ្ជាក់បន្ថែមថា រាជរដ្ឋាភិបាល រួមទាំងក្រសួងពាណិជ្ជកម្ម បានផ្តោតការយកចិត្តទុកដាក់ខ្ពស់ ក្នុងការលើកកម្ពស់សហគ្រិនភាព និងបច្ចេកវិទ្យា ព្រមទាំងបន្តជួយផ្សារភ្ជាប់យុវជនទៅនឹងអាជីវកម្ម ជាពិសេសបានផ្តល់ឱកាសឱ្យពួកគេបានត្រៀមខ្លួនជាស្រេចក្នុងការចូលរួមជាមួយសេដ្ឋកិច្ចឌីជីថល និងពាណិជ្ជកម្មឌីជីថល ដែលនេះជាបរិបទថ្មីនៃឌីជីថលូបនីយកម្ម និងដំណើរវិវត្តន៍ទៅកាន់ការប្រើប្រាស់បច្ចេកវិទ្យាឌីជីថល ហើយនេះគឺជាកម្លាំងចលករ ដ៏សំខាន់ក្នុងការជំរុញពាណិជ្ជកម្ម និងកំណើនសេដ្ឋកិច្ច។

គួរជម្រាបថា វេទិកាយុវជនឆ្ពោះទៅរកអាជីវកម្មនេះ រៀបចំឡើងក្រោមប្រធានបទ «ការត្រៀមរៀបចំអាជីព និងបដិវត្តន៍បច្ចេកវិទ្យារបស់ GenZ» ដែលជាព្រឹត្តិការណ៍មួយ ដែលបង្កើតឡើងដោយសមាគមនិស្សិតអន្តរជាតិ (AIESEC) ដើម្បីពង្រឹងសមត្ថភាព និងជំនាញរបស់យុវជនដោយផ្សារភ្ជាប់យុវជនទៅនឹងពិភពនៃអាជីវកម្ម និងការងារនៅក្នុងប្រទេសកម្ពុជា ក៏ដូចជាផ្តល់ឱកាសដល់យុវជនក្នុងការអភិវឌ្ឍចំណេះដឹង ជំនាញ និងបណ្តាញទំនាក់ទំនងដ៏មានតម្លៃក្នុងការរៀបចំអាជីវកម្មរបស់ពួកគេ៕