![កាហ្វេយន្ដហោះ](https://cdn.cambonomist.com/media/images/canva-photo-editor_-_2020-06-28T16.2e16d0ba.fill-960x540.png)
សារព័ត៌មាន The Pattayanews បានរាយការណ៍នៅថ្ងៃទី ២៤ ខែមិថុនាកន្លងទៅថ្មីៗនេះថា ហាងកាហ្វេដែលធ្វើពីតួយន្ដហោះ ដែលមានឈ្មោះថា Coffee War ត្រូវបានអាជ្ញាធរថៃ សម្រេចឲ្យផ្អាកការលក់ជាបណ្ដោះអាសន្ន បន្ទាប់ពី ហាងកាហ្វេមួយនេះ មានភ្ញៀវតម្រង់ជួរដើម្បីចូលផឹកកាហ្វេក្នុងហាងនេះ ខ្ទង់ពាន់នាក់ក្នុងមួយថ្ងៃៗ។
អធិការស្រុក Sattahip លោក Anucha Intasorn និងមន្ត្រីមកពីការិយាល័យសុខភាពសាធារណៈ បានបញ្ជាក់កាលពីថ្ងៃទី ២៣ មិថុនាថា អាជ្ញាធរមានសមត្ថកិច្ច បានធ្វើការសើបអង្កេតទៅលើហាងកាហ្វេឈ្មោះ Coffee War នេះ ដែលហាងនេះ គឺយកតួយន្ដហោះ ប្រភេទ Airbus A300 មកធ្វើជាងហាងលក់កាហ្វេ។
![ហាងកាហ្វេយន្ដហោះនៅថៃ ត្រូវបានអាជ្ញាធរសម្រេចឲ្យបិទបណ្ដោះអាសន្ន ក្រោយពីមានមនុស្សតម្រង់ជួរចូលផឹកច្រើនហួសប្រមាណ](https://cdn.cambonomist.com/media/images/canva-photo-editor_-_2020-06-28T16.2e16d0ba.fill-960x540_Rm9GyS0.png)
ក្រោយពីមានកិច្ចប្រជុំ អាជ្ញាធរបានបញ្ជាឲ្យបិទហាងកាហ្វេនេះជាបណ្ដោះអាសន្ន រយៈពេល ៧ថ្ងៃ។ ការបិទហាងកាហ្វេជាបណ្ដោះអាសន្ននេះ គឺដោយសារតែ អាជ្ញាធរមើលឃើញថា ហាងកាហ្វេនេះ គឺមានមនុស្សកកកុញច្រើនពេក ដែលវាគឺទាក់ទងនឹងវិធានការការទប់ស្កាត់ការឆ្លងរីករាលដាលកូវីដ-១៩។ មន្ត្រីសុខភាពសារណៈ បានចាត់ទុកថា ការប្រមូលផ្ដុំនូវហ្វូងមនុស្សច្រើនបែបនេះ អាចនឹងកត្តាប្រឈមខ្ពស់ក្នុងការឆ្លងរីករាលដាលនៃមេរោគកូវីដ-១៩។
![កាហ្វេយន្ដហោះ](https://cdn.cambonomist.com/media/images/83139472_575912169732564_2695333125648256389_o.original.jpg)
បើតាមប្រភពព័ត៌មានពី អ្នកគ្រប់គ្រងហាងកាហ្វេនេះ បានប្រាប់សារព័ត៌មានក្នុងស្រុកថៃថា ការយកយន្ដហោះចាស់ប្រភេទ Airbus A300 មកធ្វើជាងហាងកាហ្វេនេះ គឺចំណាយទឹកប្រាក់ប្រមាណ ១០លានបាត ឬស្មើនឹងប្រមាណជាង ៣២ម៉ឺនដុល្លារអាមេរិក ហើយវាក៏ជាហាងកាហ្វេមួយដែលមានភាពខុសប្លែកជាងគេមិនធ្លាប់មាននៅក្នុងប្រទេសថៃផងដែរ។
![ហាងកាហ្វេយន្ដហោះនៅថៃ ត្រូវបានអាជ្ញាធរសម្រេចឲ្យបិទបណ្ដោះអាសន្ន ក្រោយពីមានមនុស្សតម្រង់ជួរចូលផឹកច្រើនហួសប្រមាណ](https://cdn.cambonomist.com/media/images/canva-photo-editor_-_2020-06-28T16.2e16d0ba.fill-960x540_czP46Bx.png)
ហាងកាហ្វេនេះ លក់កាហ្វេមួយកែវក្នុងតម្លៃប្រមាណ ៦០ ទៅ៨០ បាត ឬស្មើនឹងប្រមាណ ១,៩៤ ទៅ ២,៥៨ ដុល្លារអាមេរិក ហើយភ្ញៀវដែលអាចចូលទៅក្នុងហាងដើម្បីផឹកកាហ្វេបាន គឺទទួលយកតែ ៦០នាក់ប៉ុណ្ណោះ ក្នុងមួយលើក ដោយម្នាក់ៗមានពេលអង្គុយផឹកកាហ្វេក្នុងហាងនេះ តែ ៤០នាទីប៉ុណ្ណោះ។
ហាងកាហ្វេនេះ ត្រូវបានកំណត់ថា នឹងបើកដំណើរការឡើងវិញ នៅថ្ងៃទី ២៩ ខែមិថុនានេះ បន្ទាប់ពីអ្នកគ្រប់គ្រងហាង បន្តអនុវត្តនូវវិធានការការពារមេរោគឆ្លង បានកាន់តែប្រសើរជាងនេះ អាស្រ័យតាមការត្រួតពិនិត្យដោយនាយកដ្ឋានសុខាភិបាល៕