អ្នកនាំពាក្យរាជរដ្ឋាភិបាលថៃរូបនេះ លើកឡើងថា នាយករដ្ឋមន្ត្រីថៃ ប្រាយុទ្ធ ច័ន្ទអូចា បានបញ្ជាក់ប្រាប់ដល់ ក្រសួងសុខាភិបាល និងការិយាល័យសន្តិសុខសុខភាពជាតិ ឲ្យធ្វើការរៀបចំ និងត្រៀមខ្លួនក្នុងការចែកចាយ តេស្តរកមេរោគកូវីដ-១៩ ដែលបានចុះហត្ថលេខាបញ្ជាទិញ ៨លាន ៥សែនឈុតនេះ។
យ៉ាងណាក៏ដោយ ការិយាល័យសន្តិសុខសុខភាពជាតិ នឹងធ្វើការចែកចាយតេស្ត តាមរយៈ អង្គភាពសេវាកម្ម ស្ថិតក្រោមប្រព័ន្ធធានារ៉ាប់រងសុខភាព រួមមាន មន្ទីរពេទ្យ គ្លីនិក និងឱសថស្ថានជាដើម។
ក្រៅពីនោះ ក៏មានបណ្តាញចែកចាយផ្សេងទៀតតាមរយៈ មេដឹកនាំសហគមន៍ អ្នកសម្របសម្រួល អ្នកស្ម័គ្រចិត្តក្នុងវិស័យសុខាភិបាល ដែលអាចចែកចាយដល់ក្នុងតំបន់របស់ពួកគេ។
នាយករដ្ឋមន្ត្រីថៃ ក៏បានស្នើដល់ ប្រជាពលរដ្ឋគ្រប់រូប ឲ្យចូលរួមសហប្រតិបត្តិការជាមួយរាជរដ្ឋាភិបាលថៃ តាមរយៈការកាត់បន្ថយការធ្វើដំណើរដែលមិនចាំបាច់ ព្រោះវាជាកត្តាចម្លងដ៏សំខាន់ ទៅកាន់តំបន់ផ្សេងៗ។
អត្ថបទគួរអាន
សូមបញ្ជាក់ថា ប្រទេសថៃ នៅមួយរយៈចុងក្រោយនេះ នៅតែបន្ដរកឃើញករណីឆ្លងកូវីដ-១៩ច្រើននៅឡើយប្រមាណជាង១ម៉ឺននាក់ក្នុងមួយថ្ងៃ ហើយក្នុងនោះ តាមការយកសំណាកទៅពិនិត្យកាលពីសប្ដាហ៍មុនជាង១៥០០សំណាក គឺមានអ្នកឆ្លងមេរោគបំប្លែងថ្មីឌែលតា ដល់ទៅជាង៩៣%ទៅហើយ។ ទោះយ៉ាងណា មន្ត្រីសុខាភិបាលថៃ បានអះអាងថា ថៃនៅមិនទាន់មានរកឃើញមេរោគបំប្លែងថ្មីមួយប្រភេទទៀ ឈ្មោះ មុយ នៅឡើយទេ គិតមកទល់ពេលនេះ។
ជាមួយគ្នានេះ មន្ត្រី ក្រសួងសុខាភិបាលថៃ ថ្មីៗនេះ ក៏បានចេញមុខព្រមានដែរថា បើទោះបីជា បច្ចុប្បន្ន ប្រទេសថៃ មានសញ្ញាថយចុះ នៃករណីឆ្លងប្រចាំថ្ងៃពី ជាង២ម៉ឺននាក់មកនៅត្រឹមជាង១ម៉ឺននាក់ក៏ពិតមែន ប៉ុន្ដែ វានៅតែមានហានិភ័យឆ្លងខ្ពស់ ដែលអាចនឹងកើនដល់ ៣ម៉ឺននាក់ ប្រសិនបើប្រជាពលរដ្ឋថៃមានការបន្ធូរដៃក្នុងការអនុវត្តវិធានការគម្លាតសង្គមរបស់អាជ្ញាធរដែលបានដាក់ចេញ៕
អត្ថបទ៖ វណ្ណ វុឌ្ឍវិវឌ្ឍន៍
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
