ក្រសួងពាណិជ្ជកម្មថៃកំណត់គោលដៅចំណូល ១៥០០ លានដុល្លារ ពីការលក់ផលិតផលម៉ាកសម្គាល់ភូមិសាស្ត្រ

លោក ជូរីន ឡាក់សាណាវីស៊ីត (Jurin Laksanawisit) រដ្ឋមន្ត្រីក្រសួងពាណិជ្ជកម្មថៃបាននិយាយថា ក្រសួងនេះមានសុទិដ្ឋិនិយមចំពោះទស្សនវិស័យនៃការលក់ផលិតផលដែលមានបញ្ជាក់ភូមិសាស្ត្ររបស់ប្រទេសនេះ ដោយសារគុណភាពពិសេសនិងប្លែករបស់ផលិតផលទាំងនេះ។

វិញ្ញាបនបត្របញ្ជាក់ភូមិសាស្ត្រត្រូវបានប្រើដើម្បីកំណត់អត្តសញ្ញាណផលិតផលដែលមានប្រភពដើមនៅក្នុងទឹកដីនៃប្រទេសឬក៏តំបន់ជាក់លាក់ណាមួយ ដែលមានលក្ខណៈឬគុណភាពពិសេស។ វាអាចបង្កើនតម្លៃផលិតផលលើទីផ្សារក្នុងប្រទេសអភិវឌ្ឍន៍មួយចំនួន។

ថ្មីៗនេះ ក្រសួងពាណិជ្ជកម្មថៃបានចុះបញ្ជី«ផ្លែទុរេនតាឡី»នៅខេត្តក្រាប៊ី (Krabi) ជាផលិតផល ថ្មីបំផុតដែលទទួលបានវិញ្ញាបនប័ត្រសម្គាល់ភូមិសាស្ត្ររបស់ប្រទេសថៃ។

ចម្ការទុរេនគឺស្ថិតនៅក្នុងតំបន់ផ្លៃប្រាយ៉ា និងតំបន់ខៅខេននៅស្រុកផ្លៃប្រាយ៉ា ក្នុងខេត្តក្រាប៊ីដែលមានអាកាសធាតុនិងធនធានទឹកល្អ មានសារធាតុចិញ្ចឹមសំខាន់ៗ និងមិនប្រើសារធាតុគីមី។ ផ្លែធូរេនមកពីតំបន់ទាំងនេះមានគុណភាពនិងរូបរាងល្អប្លែក។

បច្ចុប្បន្ននេះ មានផលិតផលដែលបានចុះបញ្ជីសម្គាល់ភូមិសាស្ត្ររបស់ប្រទេសថៃសរុបចំនួន១៨៥ មុខនៅក្នុងប្រភេទផ្សេងៗគ្នា ដូចជាម្ហូបអាហារ ផលិតផលកសិកម្ម និងឧបករណ៍ប្រើប្រាស់ជាដើម៕