មជ្ឈមណ្ឌលស្រាវជ្រាវនេះបាននិយាយថា តម្លៃទីផ្សារត្រូវគេរំពឹងថានឹងមានចំនួនសរុបដល់ជាង ២ ៥០០ លានដុល្លារក្នុងឆ្នាំ២០២៣។ បើទោះបីថា ចំនួននេះ ហាក់មានការថយចុះធៀបនឹងឆ្នាំ២០២២ក្ដី ប៉ុន្តែវានៅតែមានលើសពីកម្រិតកាលពីមុនជំងឺកូវីដរាតត្បាត។ ដោយសារអ្វី? នោះ ក៏ព្រោះតែមួយផ្នែកមានកំណើននូវការប្រើប្រាស់កម្មវិធីបញ្ជាទិញអាហារតាមអេបទូរស័ព្ទដៃ យុទ្ធនាការទីផ្សារ និងការកើនឡើងនៃការទូទាត់សាច់ប្រាក់តាមការបញ្ជាទិញនីមួយៗ។
មជ្ឈមណ្ឌលស្រាវជ្រាវសេដ្ឋកិច្ច K-Research បាននិយាយនៅក្នុងរបាយការណ៍ថា នៅពេលជីវិតរស់នៅរបស់ប្រជាជនបានត្រឡប់ទៅរកភាពប្រក្រតីឡើងវិញហើយ ការដឹកជញ្ជូនអាហារកំពុងមានទំនោរថយចុះដែរ។
របាយការណ៍នេះបាននិយាយថា ប្រទេសផ្សេងទៀតក៏កំពុងជួបប្រទះនឹងថមថយនៅក្នុងផ្នែកដឹកជញ្ជូនអាហារដូចគ្នាដែរ នៅពេលប្រជាជនកំពុងត្រឡប់ទៅរកជីវិតធម្មតាឡើងវិញ បន្ទាប់ពីមានភាពប្រសើរឡើងនៃស្ថានភាពជំងឺកូវីដ១៩។
ការស្ទង់មតិរបស់មជ្ឈមណ្ឌល K-Research ថ្មីៗនេះបានរកឃើញអ្នកឆ្លើយសំណួរចំនួន ៣៧%បាននិយាយថា ពួកគេប្រើប្រាស់សេវាដឹកជញ្ជូនអាហារតិចជាងមុនចាប់តាំងពីដើមឆ្នាំនេះ ហើយអ្នកឆ្លើយសំណួរ ២៧% និយាយថា ការប្រើប្រាស់របស់ពួកគេនៅតែដដែលចំណែក ៣១% ទៀតបាននិយាយថា ពួកគេបានប្រើប្រាស់សេវាកម្មនេះច្រើនជាងមុន ខណៈដែល ៥% មិនបានប្រើប្រាស់សេវាកម្មនេះទាល់តែសោះ។
ការស្ទង់មតិនេះបានបង្ហាញថា បច្ចុប្បន្នមនុស្សបានប្រើប្រាស់សេវាដឹកជញ្ជូនអាហារនៅក្នុងប្រទេសថៃជាមធ្យម ៥ ដងក្នុងមួយខែ ពោលគឺធ្លាក់ចុះពីចំនួន ៧ ដង ក្នុងអំឡុងពេលជំងឺកូវីដ១៩ ហើយមជ្ឈមណ្ឌល K-Research បាននិយាយថា កម្រិតនៃតម្រូវការប្រើប្រាស់នេះ ត្រូវគេរំពឹងថានឹងមានស្ថិរភាព ឬក៏អាចនឹងធ្លាក់បន្តិចបន្តួចនាពេលអនាគត៕
អត្ថបទ៖ សុខ ជា
