គណបក្សប្រជាជនកម្ពុជា សម្រេចជ្រើសតាំងឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់អនាគត

សន្និបាតគណៈកម្មាធិការកណ្ដាលលើកទី៤៣ បានប្រព្រឹត្តទៅនៅថ្ងៃទី២៤ ខែធ្នូ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា,សម្ដេចអគ្គមហាពញ្ញាចក្រី ហេង សំរិន ប្រធានកិត្តិយសគណបក្ស,សម្ដេចក្រឡាហោម ស ខេង អនុប្រធានគណបក្ស,សម្ដេចវិបុលសេនាភក្ដី សាយ ឈុំ អនុប្រធានគណបក្ស និងគណៈអចិន្រ្តៃយ៍នៃគណៈកម្មាធិការកណ្ដាល។ 

ជាលទ្ធផល សមាជិកនៃសន្និបាតគណៈកម្មាធិការកណ្ដាលលើកទី៤៣ ដែលមានសមាជិក ៧៧៥រូប លើបរិមាណសរុប ៨៦៥រូប បានសម្រេចបន្តគាំទ្រសម្ដេចតេជោ ហ៊ុន សែន ជាបេក្ខភាពនាយករដ្ឋមន្រ្តី និងបានសម្រេចជាឯកច្ឆ័ន្ទជ្រើសរើសតាំងឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីនាពេលអនាគត។

បន្ថែមលើការគាំទ្រឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីកម្ពុជា នាពេលអនាគត សន្និបាតក៏បានសម្រេចបោះឆ្នោតជ្រើសតាំងអនុប្រធានគណបក្សចំនួន ២រូបបន្ថែមផងដែរ។ ក្នុងនោះរួមមាន សម្ដេចសេនាពិជ័យ ទា បាញ់ និងលោកជំទាវកិត្តិសង្គហបណ្ឌិត ម៉ែន សំអន ដែលធ្វើឱ្យគណបក្សប្រជាជនកម្ពុជា បច្ចុប្បន្ន មានអនុប្រធានសរុបចំនួន ៤នាក់។

ឯកឧត្តម ហ៊ុន ម៉ាណែត បានបញ្ចប់ការសិក្សានៅសាលាបណ្ឌិត្យយោធាអាមេរិក West Point, ថ្នាក់អនុបណ្ឌិតសេដ្ឋកិច្ច នៅសាកលវិទ្យាល័យ New York សហរដ្ឋអាមេរិក និងថ្នាក់បណ្ឌិតសេដ្ឋកិច្ច នៅសាកលវិទ្យាល័យ Bristol នៃចក្រភពអង់គ្លេស។ បច្ចុប្បន្ន ឯកឧត្តម ហ៊ុន ម៉ាណែត មានតួនាទីជា អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងទ័ពជើងគោក៕